រាជធានីភ្នំពេញ ៖ នៅក្នុងពេលវិបត្តិកូវីដ ១៩ ពិសេសនៅឆ្នាំ ២០២១ កន្លងមកនេះប្រាក់រៀលបានធ្លាក់ថ្លៃ ។ ដើម្បីរក្សាតម្លៃប្រាក់រៀល ធនាគារជាតិនៃកម្ពុជា ថាខ្លួនបានទិញប្រាក់រៀលពីទីផ្សារប្រមាណជាង ៥០០ លានដុល្លារអាមេរិក និងបានរក្សាអត្រាប្តូរប្រាក់ទីផ្សារឱ្យមានស្ថិរភាពក្នុងរង្វង់ ៤,០៩៦ រៀលក្នុង ១ ដុល្លារអាមេរិកដោយបានថយតម្លៃថ្លៃប្រមាណ ១% ធៀបនឹងឆ្នាំ ២០១៩ ។
ក្នុងរបាយការណ៍និយាយពីវឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ ២០២១ និងទស្សនវិស័យឆ្នាំ ២០២២ ធនាគារជាតិកម្ពុជាឲ្យដឹងថា ការបង្កើនចំណាយសាធារណៈរបស់រាជរដ្ឋាភិបាលនៅពេលជំងឺកូវីដ ១៩ រាតត្បាត គួបផ្សំនឹងការថយចុះតម្រូវការប្រាក់រៀល បានដាក់សម្ពាធលើប្រាក់រៀលឲ្យថយតម្លៃ ជាពិសេសក្នុងបរិការណ៍ដែលកម្ពុជាមានកម្រិតដុល្លារនីយកម្មខ្ពស់នោះ ។
«ដើម្បីរក្សាស្ថិរភាពប្រាក់រៀលដែលបានរួមចំណែកការពារអំណាចទិញរបស់ប្រជាពលរដ្ឋ ធនាគារជាតិកម្ពុជាបានធ្វើអន្តរាគមន៍ស្រូបយកប្រាក់រៀលពីទីផ្សារជាបន្តបន្ទាប់ប្រមាណ ៥០០ លានដុល្លារអាមេរិក និងបានរក្សាអត្រាប្តូរប្រាក់ទីផ្សារឲ្យមានស្ថិរភាពក្នុងរង្វង់ ៤,០៩៦ រៀលក្នុង ១ ដុល្លារអាមេរិក ។ ស្ថិរភាពអត្រាប្តូរប្រាក់ និងការគ្រប់គ្រងបរិមាណសាច់ប្រាក់ក្នុងសេដ្ឋកិច្ចសមស្រប បានរួមចំណែកយ៉ាងសំខាន់ក្នុងការរក្សាភាពថ្លៃ ដោយអត្រាអតិផរណាមានកម្រិតទាប ២,៩%» នេះបើតាមការលើកឡើងរបស់ធនាគារជាតិនៃកម្ពុជា ។
គួរជម្រាបថា នៅចុងឆ្នាំ ២០២១ ធនាគារជាតិនៃកម្ពុជា តែងតែប្រកាសពីការដាក់ឲ្យដេញថ្លៃប្រាក់ដុល្លារជាច្រើនលើសខុសពីឆ្នាំ២០២០ ។ ឆ្នាំ ២០២០ ប្រាក់ដុល្លារតែ ៥០ លានប៉ុណ្ណោះបានដាក់ដេញថ្លៃ ។ ការប្រកាសឲ្យដេញថ្លៃប្រាក់ដុល្លារក្នុងឆ្នាំ ២០២១ កន្លងមកនេះ គេសង្កេតឃើញថា ការដេញថ្លៃម្តងៗធនាគារជាតិនៃកម្ពុជា ដាក់ឲ្យដេញថ្លៃពីទំហំប្រាក់ ៥ លានដុល្លារ ១០ លានដុល្លារ ឬ២០ លានដុល្លារឡើងទៅ ។
កន្លងមកលោក អ៉ិន ចាន់នី ប្រធាននាយកប្រតិបត្តិធនាគារអេស៊ីលីដា បានឱ្យដឹងថា ការដេញថ្លៃប្រាក់ដុល្លារ ជាពិសេសក្នុងអំឡុងស្ថានភាពជំងឺកូវីដ-១៩ នេះ គឺមានសារៈប្រយោជន៍ណាស់ បើអាស្រ័យទៅតាមគោលនយោបាយរូបិយវត្ថុជាតិ ដែលធនាគារជាតិបានអនុវត្ត ។ លោកថា ការដាក់ដេញថ្លៃបែបនេះ ក៏ជាវិធានការមួយសម្រាប់រក្សាតម្លៃប្រាក់រៀលក្នុងប្រទេសកម្ពុជា និងធ្វើឱ្យប្រាក់រៀលមានតម្លៃ និងស្ថិរភាពល្អ បើប្រៀបធៀបជាមួយរូបិយប័ណ្ឌបរទេសជាពិសេសគឺ ប្រាក់ដុល្លារ ៕
ចែករំលែកព័តមាននេះ