ភ្នំពេញ៖ ក្រសួងការបរទេស នៅព្រលប់ថ្ងៃទី៤ ខែមករានេះ បានប្រកាសផ្សព្វផ្សាយពីលទ្ធផលនៃជំនួបតាមទូរស័ព្ទ រវាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយឯកឧត្តម ចូកូ វីដូដូ ប្រធានាធិបតីនៃសាធារណរដ្ឋឥណ្ឌូនេស៊ី នៅថ្ងៃទី០៤ ខែមករា ឆ្នាំ២០២២។ នោះគឺមេដឹកនាំទាំងពីរ បានពិភាក្សាពាក់ព័ន្ធនឹងស្ថានការណ៍បច្ចុប្បន្ន នៅប្រទេសមីយ៉ាន់ម៉ា ដោយថ្នាក់ដឹកនាំទាំងពីរ ក៏បានផ្លាស់ប្តូរទស្សនៈអំពីការវិវឌ្ឍន៍ថ្មីៗ នៅមីយ៉ាន់ម៉ា និងបានគូសបញ្ជាក់ពីសារសំខាន់ក្នុងការពង្រឹងកិច្ចខិតខំប្រឹងប្រែងរបស់អាស៊ាន ដើម្បីជួយមីយ៉ាន់ម៉ា ក្នុងការស្វែងរកដំណោះស្រាយសមស្រប សំដៅឈានទៅសម្រេចបាននូវការបង្រួបបង្រួមជាតិ សន្តិភាព និងស្ថិរភាពយូរអង្វែង និងការអភិវឌ្ឍ។
អំឡុងពេលនៃកិច្ចសន្ទនាតាមទូរស័ព្ទ កាលពីព្រឹកថ្ងៃទី៤ ខែមករានេះ ឯកឧត្តម ចូកូ វីដូដូ បានសម្តែងនូវអំណរសាទរយ៉ាងកក់ក្តៅ ចំពោះកម្ពុជា ក្នុងការចូលកាន់តំណែងជាប្រធានអាស៊ាន ក្នុងឆ្នាំ២០២២។ ឯកឧត្តមប្រធានាធិបតីឥណ្ឌូនេស៊ី បានបញ្ជាក់សាជាថ្មីម្តងទៀត នូវការគាំទ្រយ៉ាងពេញទំហឹងរបស់ឥណ្ឌូនេស៊ី ចំពោះការធ្វើជាប្រធានអាស៊ានរបស់កម្ពុជា ក្នុងឆ្នាំ២០២២ ឲ្យទទួលបានជោគជ័យ។
ឯកឧត្តមប្រធានាធិបតីឥណ្ឌូនេស៊ី ជឿជាក់ថា ជោគជ័យរបស់កម្ពុជា នឹងរួមចំណែកដល់ជោគជ័យរបស់ឥណ្ឌូនេស៊ី ក្នុងការធ្វើជាប្រធានអាស៊ាន នៅឆ្នាំ២០២៣។
សូមរម្លឹកថា ជំនួបតាមទូរស័ព្ទនេះ បានកើតឡើង ខណៈដែលសម្តេចតេជោនាយករដ្ឋមន្ត្រី ហ៊ុន សែន នឹងអញ្ជើញទៅកាន់ប្រទេសមីយ៉ាន់ម៉ា នាថ្ងៃទី៧-៨ ខែមករា ឆ្នាំ២០២២ ក្នុងបំណងស្វែងរកដំណោះស្រាយឲ្យមីយ៉ាន់ម៉ា អាចវិលត្រឡប់មកចូលរួមកិច្ចប្រជុំកំពូលអាស៊ាន នៅឆ្នាំ២០២២ និងអនុវត្តតាមសេចក្តីសម្រេច ៥ចំណុចរបស់អាស៊ាន កាលពីខែមេសា ឆ្នាំ២០២១ បន្ទាប់ពីមេដឹកនាំយោធាមីយ៉ាន់ម៉ា លោក មីន អ៊ុងលាំង បានធ្វើរដ្ឋប្រហារ ឡើងកាន់អំណាច កាលពីថ្ងៃទី១ ខែកុម្ភៈ ឆ្នាំ២០២១៕
ចែករំលែកព័តមាននេះ