រាជធានីភ្នំពេញ ៖ រឿង សោភ័ណ្ឌ មកពីក្លិបមកុដរាជសីហ៍ បានបង្ហាញនូវភាពជឿជាក់ថាអាចយកឈ្នះ ពេជ្រ សីហា មកពីសមាគមកីឡាប្រដាល់ក្រសួងការពារជាតិនៅវគ្គផ្ដាច់ព្រ័ត្រដណ្ដើមខ្សែក្រវាត់គោជល់ក្នុងប្រភេទទម្ងន់៦៩គីឡូក្រាម នៅលើសង្វៀនស៊ីអិនស៊ី ថ្ងៃសៅរ៍ទី១៨ មិថុនា នេះ ។
គូនេះមានឱកាសឡើងមកដល់វគ្គផ្ដាច់ព្រ័ត្របន្ទាប់ពីរឿង សោភ័ណ្ឌ បានផ្ដួល ឡុង សុភី មកពីក្លិបសាលវ័ន្ដកីឡាឱ្យសន្លប់នៅក្នុងទឹកទី២ ចំណែក ពេជ្រ សីហា ផ្ដួលកីឡាករឡាវឈ្មោះធុតស៍ភុន ស.សុម៉ាលី ឱ្យសន្លប់ក្នុងទឹកទី៣នៅវគ្គពាក់កណ្ដាលផ្ដាច់ព្រ័ត្រ ។ កីឡាករទាំងពីរសុទ្ធតែពូកែប្រើស្នៀតកណ្ដាប់ដៃដូចគ្នា គ្រាន់តែរឿង សោភ័ណ្ឌ មានភាពរហ័សរហួនជាង ។ ចំណែក ពេជ្រ សីហា ល្អបានតែវាយជាប្រយោលប៉ុណ្ណោះ បើចូលកៀកវិញមិនអាចទៅរួចជាមួយរឿង សោភ័ណ្ឌ បានឡើយ។ ចាំមើលរវាង រឿង សោភ័ណ្ឌ និងពេជ្រ សីហា នរណាក្លាយជាម្ចាស់ខ្សែក្រវាត់ជើងឯកគោជល់ ។
ចំណែក ឡុង សុភី ត្រូវជួបប្រកួតជាមួយ ធុតស៍ភុន ស.សុម៉ាលី ដណ្ដើមយកចំណាត់ថ្នាក់លេខ៣ ខណៈរូបគេធ្លាប់ចាញ់កីឡាករឡាវរូបនេះម្ដងរួចហើយ មិនដឹងថា គេអាចសងសឹកបានឬអត់នោះទេ ។
ក្រៅពីគូដណ្ដើមខ្សែក្រវាត់នៅលើសង្វៀនដដែលក៏មានការប្រកួតជាលក្ខណៈមិត្តភាពរវាងកីឡាករសុខ សុវណ្ណ មកពីសមាគមកីឡាប្រដាល់ក្រសួងការពារជាតិ ជាមួយកីឡាករថៃឈ្មោះ រើហ្វាស៊ីត ណាយុតថៃ និងកីឡាករ ឡុង ជិន មកពីក្លិបខ្លារខិនមានរិទ្ធ ប្រកួតជាមួយកីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក។
ចំណែកនៅលើសង្វៀនស៊ីធីអិនឯណោះវិញ សម្រាប់ថ្ងៃសៅរ៍នេះក៏មានការប្រកួតប្រដាល់ដែលប្រជុំដោយកីឡាករខ្លាំងៗជាច្រើនគូផងដែរ ក្នុងនោះគូអន្តរជាតិមាន២គូ។ កីឡាករទេស ជីវ៉ា មកពីក្លិបកងពលតូចលេខ៧០ ត្រូវប្រកួតជាមួយកីឡាករថៃឈ្មោះកៅភោដាំ ហានរ៉ាវី ។ កីឡាករមាស ភារម្យ មកពីក្លិបបញ្ជាការដ្ឋានកងទ័ពជើងទឹក ប្រកួតជាមួយកីឡាករថៃឈ្មោះភិតមុន្នី ម៉ូតសាំងសារ៉ាខាម ។ រីឯការប្រកួតរវាងកីឡាករក្នុងស្រុកមានកីឡាករសល់ អាម៉ា មកពីក្លិបកុសលកីឡា ប្រកួតជាមួយកីឡាករទេសឧត្តម មកពីក្លិបកងពលតូចលេខ៧០ ។ កីឡាករពេជ្រ ប៊ុនឆេន មកពីសមាគមកីឡាប្រដាល់ក្រសួងការពារជាតិ ប្រកួតជាមួយ កីឡាកររស់ វិបុល មកពីក្លិបសាលវ័ន្តកីឡា ។
ដោយឡែកការប្រកួតនៅថ្ងៃអាទិត្យស្អែកវិញសម្រាប់គូអន្តរជាតិក៏មានពីរគូដែរដែលតម្រូវទៅលើកីឡាការិនី នូវ ស្រីពៅ មកពីក្លិបតាឡីដំរីមានរិទ្ធ ប្រកួតជាមួយកីឡាការិនីថៃឈ្មោះ ណងណាំរ៉ាន ត.ត្រេតស៊ីឡា និងកីឡាករចាន់ សំអាត មកពីក្លិបកងពលតូចអន្តរាគមន៍លេខ៨ភ្នំទ្រព្យ ប្រកួតជាមួយកីឡាករថៃឈ្មោះយុគភេត ស.ស្រីវីឆា ។ ចំណែកគូប្រកួតមិត្តភាពធម្មតាមានកីឡាករឃិត សុវណ្ណនិល មកពីក្លិបឃ្លាំងមឿងកីឡា ប្រកួតជាមួយកីឡាករម៉ី សុផាត់ មកពីក្លិបមកុដរាជសីហ៍ និងកីឡាករផន ភឿត មកពីក្លិបឃ្លាំងមឿងកីឡា ប្រកួតជាមួយកីឡាករចាន់ សច្ចា មកពីក្លិបតាព្រហ្មមានជ័យ ៕
ចែករំលែកព័តមាននេះ