ខេត្តព្រះវិហារ ៖ ថ្ងៃទី១៦ ខែមិថុនា ឆ្នាំ២០១៦ អង្គការសមាគមអភិរក្សសត្វព្រៃ (WCS) សហការជាមួយក្រសួងបរិស្ថាន មជ្ឈមណ្ឌលអង្គរសម្រាប់ការអភិរក្សជីវចម្រុះ និងសហគមន៍ទេសចរណ៍ធម្មជាតិត្មាតប៉ើយ បានលែងសត្វត្រយងចំកំកសមួយក្បាលដែលជាប្រភេទរងគ្រោះជិតផុតពូជបំផុត សត្វមៀមធំវូចំនួន៣ក្បាល សត្វអកពស់ព្រៃចំនួន២ក្បាល និងសត្វទីទុយត្រីថ្ងាសត្នោតចំនយន១ក្បាល ។ សត្វស្លាបទាំង៧នេះ ត្រូវបានលែងឱ្យទៅរស់នៅក្នុងព្រៃសហគមន៍ការពារធម្មជាតិត្មាតប៉ើយ ស្ថិតក្នុងដែនជម្រកសត្វព្រៃគូលែនព្រហ្មទេព ដែលជាកន្លែងពួកវាត្រូវបានជួយសង្គ្រោះដោយសមាជិកសហគមន៍ ។
កាលពីខែឧសភា ឆ្នាំ២០១៦ សមាជិកសហគមន៍តំបន់ការពារធម្មជាតិត្មាតប៉ើយ បានប្រទះឃើញកូនសត្វត្រយងចំកំកសមួយក្បាល ស្ថិតក្នុងសភាពទន់ខ្សោយ និងមិនអាចហើរបាន ។ កូនត្រយងនេះត្រូវបានគេនាំយកទៅកាន់មជ្ឈមណ្ឌលអង្គរសម្រាប់ការអភិរក្សជីវចម្រុះនៅខេត្តសៀមរាប ដើម្បីទទួលបានការថែទាំមុនពេលវាត្រូវបានគេលែងឱ្យទៅរស់នៅក្នុងដែនជម្រកសត្វព្រៃគូលែនព្រហ្មទេពវិញ ។
លោក Michael Meyerhoff អ្នកថែទាំសត្វព្រៃនៅមជ្ឈមណ្ឌលអង្គរសម្រាប់ការអភិរក្សជីវចម្រុះ មានប្រសាសន៍ថា ៖ «កូនត្រយងចំកំកសនេះ មិនគ្រប់គីឡូឡើយពេលបញ្ជូនមកដល់មជ្ឈមណ្ឌលអង្គរសម្រាប់ការអភិរក្សជីវចម្រុះ ។ វាត្រូវបានគេទុកដាក់ឱ្យឆ្ងាយដើម្បីកាត់បន្ថយការរំខានពីមនុស្ស ។ យើងបានផ្តល់ចំណីឱ្យវាដូចជាសត្វល្អិត ត្រី និងកង្កែប រហូតដល់វាមានទម្ងន់គ្រប់គ្រាន់ និងរឹងមាំ ហើយអាចហើរ និងចិញ្ចឹមខ្លួនឯងបាន ។
លោក Michael Meyerhoff បន្តថា ៖ «ក្រោយពីកូនត្រយងចំកំកសនេះមានទម្ងន់គ្រប់គ្រាន់ និងអាចហើរបានហើយនោះ យើងបានសហការជាមួយអង្គការ WCS ដើម្បីស្វែងរកទីជម្រកសមស្របដើម្បីលែង ដែលមានទីតាំងស្ថិតនៅក្បែរកន្លែងដែលពួកវាត្រូវបានគេជួយសង្គ្រោះ ។ យើងបានលែងវាក្បែរត្រពាំងមួយក្នុងព្រៃដែលអាចផ្តល់ជាទីជម្រក និងចំណីអាហារសម្រាប់វាផងដែរ» ។
ត្រយងចំកំកស ត្រូវបានគេចាត់ទុកជាប្រភេទសត្វស្លាបទឹកដែលទទួលរងការគំរាមកំហែងខ្លាំងជាងគេបង្អស់នៅក្នុងតំបន់អាស៊ីអាគ្នេយ៍ ។ ការបង្កាត់ពូជរបស់សត្វត្រយងចំកំកសនៅក្នុងដែនជម្រកសត្វព្រៃគូលែនព្រហ្មទេព គឺជាផ្នែកមួយដ៏សំខាន់ គាំទ្រដល់ចំនួនសត្វត្រយងចំកំកសនៅលើសាកលលោក ខណៈគេបានអះអាងថា មានត្រយ៉ងចំកំកស បានពងកូននៅតំបន់ខ្ពង់រាបភាគខាងកើត និងភាគខាងជើងប្រទេសកម្ពុជា ។
លោក Stefan Harrison ទីប្រឹក្សាបច្ចេកទេសប្រចាំតំបន់ខ្ពង់រាបភាគខាងជើងរបស់អង្គការ WCS មានប្រសាសន៍ថា ៖ «បើពុំមានការគាំទ្រ និងការចូលរួមចំណែកពីប្រជាសហគមន៍ និងមជ្ឈមណ្ឌលអង្គរសម្រាប់ការអភិរក្សជីវចម្រុះទេនោះ ពួកយើងប្រហែលជាមិនអាចសង្គ្រោះត្រយងចំកំកស និងសត្វស្លាប់៦ក្បាលផ្សេងទៀតបានឡើយ ។
គុណសម្បត្តិទាំងអស់នេះ គឺជារបស់គណៈកម្មការទេសចរណ៍ធម្មជាតិត្មាតប៉ើយ ពីព្រោះឥឡូវនេះសត្វស្លាបទាំងអស់ទទួលបានការថែរក្សា និងមានតម្លៃសម្រាប់ប្រជាជនសហគមន៍ ខណៈពួកគេកំពុងតែរស់នៅយ៉ាងល្អ និងសុខសាន្ត ។ សម្រាប់ខ្ញុំ ទាំងអស់នេះបានបង្ហាញពីការចូលរួមចំណែកដ៏សំខាន់របស់វិស័យទេសចរណ៍ធម្មជាតិក្នុងការងារអភិរក្ស» ។
នៅតំបន់ទេសភាពខ្ពង់រាបភាគខាងជើង អង្គការ WCS សហការជាមួយក្រសួងបរិស្ថាន និងប្រជាជនមូលដ្ឋានបាន និងកំពុងធ្វើការងារយ៉ាងសកម្មដើម្បីអភិរក្សប្រភេទសត្វជិតផុតពូជជាច្រើន និងទីជម្រករបស់វាក្នុងរយៈពេល១៦ឆ្នាំចុងក្រោយនេះតាមរយៈសកម្មភាពជាច្រើនដូចជាការលើកកម្ពស់ការយល់ដឹង និងជីវភាពរស់នៅរបស់ប្រជាសហគមន៍ជាដើម ។
កូនមៀមធំវូ និងទីទុយត្រីថ្ងាសត្នោត ត្រូវបានសមាជិកសហគមន៍ត្មាតប៉ើយប្រទះឃើញបន្ទាប់ពីញាស់ ។ ពួកវាត្រូវបានគេប្រទះឃើញនៅលើដីមិនអាចហើរបាន និងនៅក្បែរភូមិ ដែលឆ្កែស្រុកអាចប្រទះឃើញ និងស៊ីពួកវា ។ សមាជិកសហគមន៍ ក៏សម្រេចចិត្តយកពួកវាទៅថែទាំ និងរង់ចាំរហូតទាល់តែវាធំ អាចហើរនិងរស់នៅដោយខ្លួនឯងក្នុងព្រៃបាន ។
ចំណែកអកពស់ព្រៃទាំង២ក្បាលនោះវិញ ត្រូវបានគេជួយសង្គ្រោះ ខណៈពួកវាត្រូវគេដាក់លក់ជាសត្វចិញ្ចឹមខុសច្បាប់នៅផ្សារ ។ ស្លាបរបស់វាត្រូវបានគេចង ដូច្នេះហើយពួកវាត្រូវបានរក្សាទុកនៅមជ្ឈមណ្ឌលអង្គរសម្រាប់ការអភិរក្សជីវចម្រុះជាច្រើនខែ រហូតទាល់តែពួកវាអាចហើរបាន ។
ដែនជម្រកសត្វព្រៃគូលែនព្រហ្មទេព មានជាប្រភេទទីជម្រកចម្រុះដូចជាព្រៃល្បោះ ព្រៃពាក់កណ្តាលស្រោង និងត្រពាំងដែលគាំទ្រដល់ការរកចំណី និងរស់នៅដែលពិតជាមានសារសំខាន់ណាស់សម្រាប់សត្វត្រយងចំកំកស ៕
ចែករំលែកព័តមាននេះ