ព្រះសពព្រះសាសនមុនី ជេត ឌិន ព្រះមេគណខេត្ដស្វាយរៀងបានបូជាហើយ
ខេត្តស្វាយរៀង ៖ នៅថ្ងៃទី១៦ ខែមិថុនា ឆ្នាំ២០១៦ វេលាម៉ោង៤រសៀលនេះ សម្ដេចព្រះសង្ឃរាជាធិបតីគត្ដិឧទ្ទេសបណ្ឌិតទេពវង្សសម្ដេចព្រះអគ្គមហាសង្ឃរាជ
ខេត្តស្វាយរៀង ៖ នៅថ្ងៃទី១៦ ខែមិថុនា ឆ្នាំ២០១៦ វេលាម៉ោង៤រសៀលនេះ សម្ដេចព្រះសង្ឃរាជាធិបតីគត្ដិឧទ្ទេសបណ្ឌិតទេពវង្សសម្ដេចព្រះអគ្គមហាសង្ឃរាជនៃព្រះរាជាណាចក្រកម្ពុជាសម្ដេចព្រះមហាសុមេធាធិបតី នន្ទ ង៉ែត សម្ដេចព្រះសង្ឃនាយក លោកជំទាវ ម៉ែនសំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភានិងអធិការកិច្ចព្រមទាំងលោកអភិបាលខេត្តក្រុមប្រឹក្សាខេត្តស្រុកក្រុង ព្រះសង្ឃមន្ត្រីរាជការជុំវិញខេត្ត ប្រជាពុទ្ធិបរិសទ័ប្រមាណជាង២០០០អង្គនាក់ បានអញ្ជើញចូលរួមបូជាព្រះសពព្រះសាសនមុនីជេត ឌិន ព្រះរាជាគណៈថ្នាក់ទោ និងជាព្រះមេគណខេត្តស្វាយរៀង។
ក្នុងឱកាសនោះដែរលោក ហ៊ុន ណេង តំណាងរាស្ត្រ និងជាអតីតអភិបាលខេត្ត លោក ជៀង អំ រដ្ឋលេខាធិការក្រសួងការពាជាតិ ព្រមទាំងព្រះសង្ឃជាមេគណខេត្តជាង១០ខេត្តនិមន្តអញ្ជើញមកបូជាព្រះសពផផងដែរ។ លោកជំទាវ ម៉ែន សំអន មានប្រសាសន៍នៅក្នុងពិធីនោះថា ស្ថិតក្នុងបរិយាកាសដ៏ក្ដុកក្ដួលរំជួលចិត្ដខណៈពេលដែលយើងទាំង អស់គ្នា បានបាត់បង់នូវឧត្ដមបុគ្គល ជាទីគោរពស្រឡាញ់ បាត់បង់នូវព្រះគ្រូឧបជ្ឈាយ៍ ដ៏មានចំណេះវិជ្ជាជ្រៅជ្រះក្នុងវិស័យពុទ្ធចក្រ មានគុណធម៌ មានព្រហ្មវិហារធម៌ និងការសណ្ដោសប្រណីដល់សិស្សគណទាំងអស់ និងជានិមិត្ដរូបនៃស្រែបុណ្យដ៏ត្រជាក់សុខក្សេមក្សាន្ដចំពោះ សាធុជនពុទ្ធបរិស័ទទាំងឡាយ គឺព្រះសាសនមុនី ជេត ឌិន ព្រះរាជាគណៈថ្នាក់ទោ និងជាព្រះមេគណខេត្ដស្វាយរៀង ដែលមួយព្រះជន្មរបស់ព្រះអង្គ គឺបូជាថ្វាយចំពោះព្រះពុទ្ធសាសនា នៃខេមរជនយើង ។
លោកជំទាវ ម៉ែន សំអន បានបន្តទៀតថាក្នុងនាមរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ដ្រី និងរូបជំទាវផ្ទាល់សូមថ្លែងអំណរព្រះគុណយ៉ាងជ្រាលជ្រៅជាទីបំផុត ប្រគេនចំពោះព្រះសង្ឃទូទាំងខេត្ដស្វាយរៀង ក៏ដូចជាព្រះសង្ឃនៅតាមបណ្ដាខេត្ដនានា រួមទាំងព្រះសង្ឃគង់នៅបរទេស ដែលជាសិស្សគណទាំងអស់ ដែលបានចំណាយធនធានផ្ទាល់ព្រះអង្គ ផ្ទាល់ខ្លួនក្ដី តាមការអំពាវនាវក្ដី និងចំណាយកម្លាំងកាយ កម្លាំងចិត្ដចូលរួមរៀបចំពិធីបុណ្យបង្សុកូលជាប្រចាំរៀងរាល់ថ្ងៃ គឺក្នុងមួយស្រុក និងក្រុងមានចំនួន៣ថ្ងៃ និងមានរហូតទៅដល់៦វេន ។
កាយវិការដ៏ប្រពៃនេះ គឺជាការបំពេញកត្ដញូមួយយ៉ាងធំធេងចំពោះអ្នកដ៏មានគុណ ក៏ដូចជាគ្រូឧបជ្ឈាយ៍យាចារ្យនៃយើង គឺព្រះសាសនមុនី ជេត ឌិន រាជាគណៈថ្នាក់ទោ និងជាព្រះមេគណខេត្ដរបស់យើង (នេះមិនគិតពីការចំណាយកម្លាំងទៅថែទាំ និងចំណាយបច្ច័យផ្ទាល់ខ្លួន ក្នុងការព្យាបាលព្រះរោគព្រះអង្គក្នុងកំឡុងពេលព្រះអង្គកំពុងព្រះអាពាធ)។ មិនតែប៉ុណ្ណោះលោកជំទាវ ម៉ែន សំអន ក៏បានថ្លែងអំណរគុណចំពោះអាជ្ញាធរខេត្ដ ក្រុង ស្រុក និងបណ្ដាអង្គភាព មន្ទីរស្ថាប័ននានា នៅជុំវិញខេត្ដ ដែលបានយកចិត្ដទុកដាក់ ជួយខ្នះខ្នែងតាំងពីពេលដែល ព្រះសាសនមុនី ជេត ឌិន ព្រះអង្គបានធ្វើព្រះអនិច្ចធម្មទៅកាលថ្ងៃទី១៥កើត ខែមាឃ ឆ្នាំមមែ បស្ដស័ក ព.ស ២៥៥៩ ត្រូវនឹងថ្ងៃទី២២ ខែកុម្ភៈ ឆ្នាំ២០១៦ ដោយបានរៀបចំឲ្យមានការគោរពវិញ្ញាណក្ខន្ធព្រះអង្គ និងនិមន្ដព្រះសង្ឃបង្សុកូល បានគ្រប់អង្គភាពស្ថាប័ននានានៅក្នុងទូទាំងខេត្ត។ហើយបានប្រព្រឹត្ដទៅដោយទឹកសុទ្ធាជ្រះថ្លា ពោរពេញដោយភាពរលូន មិនមានសៅហ្មងក្នុងចិត្ដ នេះសរបញ្ជាក់ឲ្យឃើញថាបងប្អូនបានលះបង់នូវមច្ឆរិយ គឺសេចក្ដីកំណាញ់ ដើម្បីបូជាដល់ព្រះពុទ្ធសាសនា និងខិតខំកសាងនូវមនុញ្ញផល និងកុសលផលបុណ្យសម្រាប់ជាតិនេះ និងទៅជាតិខាងមុខទៀត ។
សូមថ្លែងអំណរគុណចំពោះគណៈកម្មការវត្ដ លោកអាចារ្យ ដូនជី តាជី និងអ្នកជួយផ្គត់ផ្គង់ភស្ដុភាទាំងអស់ ដែលបានយកចិត្ដទុកដាក់ជួយឧបត្ថម្ភ និងរៀបចំធ្វើពិធីកម្មខាងសាសនា និងការផ្គត់ផ្គង់ចង្ហាន់ប្រគេនព្រះសង្ឃក្នុងរយៈពេល៣ខែកន្លងមកនេះ ។បន្ទាប់ពីក្រុមគ្រួសារចៅ ចៅទួតព្រះសពហែប្រទក្សិណព្រំមេនរួចមក សម្តេចព្រះមហាសុមេធាធិបតី នន្ទ ង៉ែត សម្តេចសង្ឃនាយកបានអុចទៀន និងលោកជំទាវឧបនាយករដ្ឋមន្ត្រី ម៉ែន សំអន ថ្វាយព្រះភ្លើងបូជាព្រះសព រួចព្រះសង្ឃ បំបួសកូននាគចំនួន៨៧អង្គដើម្បីតបមហាកត្តញ្ញូកត្តវេទីគុណដល់ព្រះសព នៅព្រឹកថ្ងៃទី១៧ និមន្តព្រះសង្ឃ៥០០អង្គរាប់បាត ថ្វាយមហាកុសលប្រគេនព្រះវិញ្ញាណក្ខន្ធព្រះសាសនមុនី ជេត ឌិន ព្រះរាជាគណថ្នាក់ទោសោយនូវសុគតិភព៕
ចែករំលែកព័តមាននេះ