អ្នកលក់ម្ហូបអាហារស្រែកថា ស្អុយណាស់ ! លក់មិនដាច់ទេ!
ខេត្តកំពង់ចាម ៖ ផ្សារធំក្រុងកំពង់ចាម មានរាប់រយតូប ត្រូវបានគ្រប់គ្រងដោយម្ចាស់ផាស៊ីឈ្មោះថាន់ អ៊ាងលី មានទីតាំងស្ថិតនៅសង្កាត់កំពង់ចាម ក្រុងកំពង់ចាម
ខេត្តកំពង់ចាម ៖ ផ្សារធំក្រុងកំពង់ចាម មានរាប់រយតូប ត្រូវបានគ្រប់គ្រងដោយម្ចាស់ផាស៊ីឈ្មោះថាន់ អ៊ាងលី មានទីតាំងស្ថិតនៅសង្កាត់កំពង់ចាម ក្រុងកំពង់ចាម ត្រូវបានគេមើលឃើញថាខ្វះអនាម័យ សូម្បីតែគំនរសំរាមនៅត្រង់ច្រកចូលខាងត្បូងផ្សារក៏មិនខ្ចីកើប ហើយថែមទាំងមានទឹកស្អុយហូរចេញពីក្នុងលូមកថ្នល់ជះក្លិនស្អុយពិបាកនឹងដកដង្ហើមថែមទៀត។
អាជីវករឈ្មោះ សោភា ភេទស្រី លក់ម្ហូបអាហារប្រាប់ឲ្យដឹងនាព្រឹកថ្ងៃទី១៦ ខែមិថុនា ឆ្នាំ២០១៦នេះថា នាពេលកន្លងមកមិនដែលស្ទះលូរហូតដល់ទឹកស្អុយហូរចេញពីក្នុងលូមកលើថ្នល់ ឡើងស្អុយពិបាកនឹងដកដង្ហើមណាស់ដោយលក់ដូរមិនដាច់នោះទេ។ ហើយអ្នកយកផាស៊ីធ្លាប់ទារលុយម្នាក់៥.០០០រៀល លុះពេលដែលបូមបាន៣ទៅ៤ថ្ងៃស្ទះវិញដដែល ហើយការស្ទះលូខ្លាំងទើបតែមាននៅឆ្នាំ២០១៥និង២០១៦នេះទេដល់ពេលឃើញទឹកស្អុយអញ្ជឹងអ្នកទិញ គេមកដល់ទៅហួសរកកន្លែងផ្សេង។
អាជីវករឈ្មោះ សន ណារ៉ា ភេទស្រី អាយុ៣៨ឆ្នាំ ដែលលក់បាយនៅផ្សារធំក្រុងកំពង់ចាមប្រាប់ឲ្យដឹងថា គាត់និងប្តីបានជួលតូបរបស់គេដើម្បីលក់ដូរដោះស្រាយជីវភាពគ្រួសារ ទើបតែបានរយៈពេល១ឆ្នាំនេះទេ ប្រសិនណាបើប្រពន្ធ័លូរៀបចំល្អមិនស្ទះនោះ គាត់លក់ដូរដាច់តែប៉ុន្មានថ្ងៃមកហើយរហូតមកដល់ព្រឹកថ្ងៃទី១៦ ខែមិថុនា ឆ្នាំ២០១៦ លូបានស្ទះក៏ហៀរទឹកស្អុយ មកកាត់មុខតូបរបស់គាត់ត្រៀបត្រាដោយពិបាកនឹងធ្វើឲ្យភ្ញៀវចូលមកហូបបាយ ភ្ញៀវគ្រាន់តែឃើញទឹកស្អុយបែបនេះ នាំគ្នាទៅហួសលក់មិនដាច់ទេ ហើយក៏ពិបាកនឹងដកដង្ហើមណាស់ ។ អាជីវករលក់ចានឆ្នាំងឈ្មោះ អួន គឹមហ៊ាន ភេទស្រី អាយុ៤៧ឆ្នាំ ប្រាប់ឲ្យដឹងថា តូបស្ថិតនៅកាច់ជ្រុងជាប់ផ្លូវថ្នល់លូដែលស្ទះនៅមុខតូបរបស់គាត់ បានកើតមានឡើង៣ទៅ៤ខែមកហើយ តំបូងតិចៗត្រូវយកបាវច្រកខ្សាច់មកដាក់បាំងនៅត្រង់មាត់លូ ឃើញថាបានគ្រាន់បើមួយរយៈតែពេលទឹកស្អុយហូរចេញមកនាំគ្នាដងទៅចាក់ចូលក្នុងលូមួយទៀតនៅក្បែរនោះ ក៏ត្រូវបានគេលែងឲ្យចាក់ព្រោះតែស្អុយពេករហូតមដល់ព្រឹកថ្ងៃទី១៦ ខែមិថុនាស្ទះខ្លាំងហូរទឹកចេញមកច្រើន ដោយមិនមានភ្ញៀវចូលមកទិញចានឆ្នាំងរបស់គាត់ទេ សូម្បីតែផាស៊ីក៏មិនបានបង់លុយឲ្យ៣ថ្ងៃហើយ ។
ថៅកែផ្សារធំក្រុងកំពង់ចាម មិនអាចសុំការបំភ្លឺបានទេនារសៀលថ្ងៃទី១៦ ខែមិថុនានេះ ។ លោក ចាន់ ផល្លី អភិបាលក្រុងកំពង់ចាម ប្រាប់ឲ្យដឹងនារសៀលថ្ងៃទី១៦ ខែមិថុនានេះថា ចំពោះលូដែលស្ទះខាងលើនោះមិនជាបន្ទុករបស់សាលាក្រុងនោះទេ គឺជាបន្ទុករបស់ថៅកែផ្សារធំក្រុងកំពង់ចាម ហើយរូបលោកនឹងសហការីចុះទៅពិនិត្យមើលដើម្បីបញ្ចៀសបញ្ហា ព្រមទាំងរៀបចំស្តារលូហើយ៕
ចែករំលែកព័តមាននេះ