ខេត្តប៉ៃលិន ៖ ប្រជាពលរដ្ឋជាច្រើននាក់ រស់នៅក្នុងខេត្តប៉ៃលិន បានធ្វើការរិះគន់ថា ពីមួយថ្ងៃទៅមួយថ្ងៃ មួយឆ្នាំទៅមួយឆ្នាំ អាកាសធាតុកាន់តែមានកម្ដៅខ្លាំងឡើងៗ ស្ទើរទ្រាំលែងកើត ។ ចំណែកឯទឹកស្ទឹង ត្រពាំង បឹងបួរ ដែលកាលពីមុនមានទឹកប្រើប្រាស់គ្រប់គ្រាន់ ខួបប្រាំងវស្សា រហូតមកដល់ពេលនេះ រីងខះស្ទើរអស់រលីងដែរ ដោយសារតែប្រជាពលរដ្ឋខ្លួនឯងនាំគ្នាកាប់បំផ្លាញព្រៃឈើតាំងពីព្រៃដុះទ្រុបទ្រុល បានក្លាយទៅជាចម្ការដំណាំពោត និងដំឡូងមីអស់រលីង ។ ជាក់ស្តែង កាលពីវេលាម៉ោង១០និង៣០នាទីព្រឹកថ្ងៃទី១៦ ខែមិថុនា ឆ្នាំ២០១៦កន្លងទៅនេះ នៅជើងភ្នំខៀវមួយកន្លែង ត្រង់ចំណុចក្បែររមណីយដ្ឋានចម្ការខ្នុរ ក្នុងភូមិបហ៊ុយត្បូង សង្កាត់បយ៉ាខា ក្រុងប៉ៃលិន ត្រូវជនខិលខូច បានបន្តកាប់ទន្ទ្រានព្រៃយកដីដាំដំណាំ ដោយមិនគិតខ្វល់ពីផលប៉ះពាល់ដល់បរិស្ថាននោះឡើយ ។
ចំណែកឯខាងមន្ទីរបរិស្ថាន និងខាងរដ្ឋបាលព្រៃឈើខេត្តប៉ៃលិនវិញ បានត្រឹមឆ្លើយប្រចាំគ្នាថា មិនមែនជាកន្លែងដែនការពាររបស់ខ្លួនឡើយ ។ ប្រជាពលរដ្ឋដែលរងគ្រោះដោយសារភាពរាំងស្ងួតហួតហែង ប៉ះពាល់ដល់ការដាំដំណាំរបស់ខ្លួនបានលើកឡើងថា គ្រោះធម្មជាតិរាំងស្ងួត និងគ្រោះទឹកជំនន់ មិនមែនកើតឡើងដោយចៃដន្យនោះឡើយ គឺមនុស្សជាអ្នកសាង និងប្រព្រឹត្តព្រោះថា តាមការសង្កេតមើលរបស់ពួកគាត់កាលពីរាប់សិបឆ្នាំកន្លងមកហើយ មិនធ្លាប់មានភាពរាំងស្ងួតអូសបន្លាយរយៈពេលយូរបែបនេះទេ ។
ប៉ុន្តែបន្ទាប់ពីឈ្មួញ និងប្រជាពលរដ្ឋបន្តនាំគ្នាលួចកាប់រានព្រៃជើងភ្នំខៀវ និងតំបន់ផ្សេងៗទៀត ពីមួយថ្ងៃទៅមួយថ្ងៃ ពីមួយឆ្នាំទៅមួយឆ្នាំ រហូតដល់ជិតដល់កំពូលភ្នំ និងព្រៃតំបន់អភិរក្ស ត្រូវគេលួចកាប់រាល់ថ្ងៃរហូតដល់អស់រលីង ទើបធ្វើឱ្យអាកាសធាតុក្លាយទៅជាបែបនេះ ។ ប្រជាពលរដ្ឋបញ្ជាក់ទៀតថា ចំណែកឈើតូចធំនានា ប្រជាពលរដ្ឋស្លូតត្រង់មួយចំនួនមិនអាចចូលទៅកាប់នោះឡើយ មានតែប្រជាពលរដ្ឋមានខ្នងជាមេព្រៃ ឬជាមន្ត្រីបរិស្ថានទើបហ៊ានចូលទៅកាប់រួចលក់ចែកលុយគ្នា ។ ដូច្នេះព្រៃឈើដែលនៅសេសសល់ទាំងប៉ុន្មានមិនសង្ឃឹមថា អាចឈរនៅដុះបន្តទៀតឡើយ នៅថ្ងៃខាងមុខនឹងរលាយជាក់ជាមិនខាន ដោយសារតែមន្ត្រីមួយចំនួនប្រចាំគ្នា និងឃុបឃិតជាមួយពលរដ្ឋមួយចំនួនកាប់បំផ្លាញប៉ុណ្ណោះ ។
ពលរដ្ឋលើកឡើងមកនិយាយគ្នាលេងនៅតាមតុកាហ្វេឱ្យដឹងថា បើចង់ហាមពលរដ្ឋដែលលួចកាប់ព្រៃនៅតំបន់ហាមឃាត់ ឬតំបន់អភិរក្សអាចធ្វើទៅបាន ប៉ុន្តែគេមិនធ្វើនោះទេ ព្រោះរាល់ថ្ងៃគេឱ្យឈ្មួញចូលទៅកាប់រួចបង់លុយឱ្យសមត្ថកិច្ច ក្នុងមួយម៉ូតូ១ម៉ឺន ទៅពីរម៉ឺនរៀលឯណោះ ។ បើម៉ូតូណាមិនបង់ទេ នឹងរឹបអូសយកម៉ូតូនិងឈើទៅដាក់នៅ ប៉ុស្តិ៍ ដូច្នេះហើយព្រៃឈើនៅតំបន់ភ្នំខៀវត្រូវតែរលាយ ។
ពាក់ព័ន្ធទៅនឹងបញ្ហានេះ លោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យ ដឹងថា ខាងលោកអត់ដឹងរឿងនេះទេ ហើយបន្ទាប់ពីទទួលបានព័ត៌មាននេះ ខាងលោកនឹងចាត់មន្ត្រីក្រោមឱវាទឱ្យចុះទៅត្រួតពិនិត្យ ។ លោកបន្តទៀតថា ម្យ៉ាងវិញទៀត ព្រៃឈើនៅតំបន់បយ៉ាខា ខាងលោកអត់គ្រប់គ្រងនោះទេ គឺប្រគល់ឱ្យសហគមន៍ជាអ្នកមើលការខុសត្រូវវិញ ដោយនៅពេលខាងមុខលោកនឹងយកតំបន់ព្រៃនោះមកគ្រប់គ្រងថែរក្សាការ ពារម្តងវិញ ៕
ចែករំលែកព័តមាននេះ