រាជធានីភ្នំពេញ ៖ បច្ចុប្បន្នមធ្យោបាយធ្វើដំណើរពិតជាសម្បូរបែបដែលអ្នកដំណើរអាចមានជម្រើសច្រើន ដែលផ្ទុយស្រឡះកាលពីទសវត្សរ៍មុនៗ ។ យ៉ាងណាក៏ដោយ តម្លៃគឺជាកត្ដាប្រកួតប្រជែងមួយរបស់អ្នកប្រកបរបរផ្ដល់សេវាមួយនេះ បន្ទាប់ពីកត្ដាសុវត្ថិភាព ផាសុកភាព និងពេលវេលាជាដើម ហើយអ្នកធ្វើដំណើរតែងគិតអំពីវា និងធ្វើការសម្រេចចិត្តជ្រើសរើសថា តើមធ្យោបាយណាមួយដែលល្អសម្រាប់ពួកគេ ។
ក្រឡេកមើលពីសេវាតាក់ស៊ី និងរ៉ឺម៉កម៉ូតូ(គេនិយមហៅរឺុម៉កកង់៣)វិញ មានមតិជាច្រើនបានលើកឡើងខុសៗគ្នា អ្នកខ្លះថា ជិះតាក់ស៊ីស្រួលជាង មានផាសុកភាព សុវត្ថិភាព និងតម្លៃថោកជាងជិះរ៉ឺម៉កម៉ូតូ ប៉ុន្ដែផ្ទុយពីនេះ ក៏មានអ្នកដំណើរខ្លះនិយាយថា ជិះរ៉ឺម៉កម៉ូតូស្រួលជាង ព្រោះពេលធ្វើដំណើរទៅណាមកណា មិនចាំបាច់រង់ចាំយូរ ថ្វីដ្បិតតែមិនសូវមានផាសុកភាព សុវត្ថិភាពដូចតាក់ស៊ី និងថ្លៃខុសគ្នាតិចតួច តែចំពោះអ្នកពុលរថយន្ត វាជាជម្រើសដ៏ល្អ ។
បើតាមអ្នកស្រី ផាន ស្រីចាន់ ដែលជ្រើសរើសយកសេវាតាក់ស៊ីបានប្រាប់ថា ៖ « ខ្ញុំគិតថាវាមានសុវត្ថិភាពនៅពេលធ្វើដំណើរតាមផ្លូវ យើងអត់ខ្លាចចោរប្លន់, មិនខ្លាចគ្រោះថ្នាក់ចរាចរណ៍ ហើយបើក្រុមគ្រួសារមានក្មេងតូចៗ គឺវារឹតតែងាយស្រួលថែមទៀត ។ តែបើយើងជ្រើសរើសរ៉ឺម៉កម៉ូតូ យើងខ្លាចចោរឆក់ ខ្លាចក្មេងលេង ព្រោះយើងមានកូនតូចៗ ខ្លាចធ្លាក់ » ។ អ្នកស្រីបន្តថា ៖ « ចំពោះតម្លៃវិញ សម្រាប់ខ្ញុំគិតថា តាក់ស៊ីធូរថ្លៃជាងរ៉ឺម៉កម៉ូតូ ណាមួយគ្រួសារខ្ញុំគាត់ចូលចិត្តជិះតាក់ស៊ីច្រើនជាង ដោយសារតែតម្លៃធូរថ្លៃ និងមានលេខកុងទ័រចម្ងាយឲ្យយើងឃើញស្រាប់ » ។
យ៉ាងណាក៏ដោយ ក៏មានអ្នកធ្វើដំណើរតាមរ៉ឺម៉កម៉ូតូមួយចំនួនបានលើកឡើងថា ជិះរ៉ឺម៉កម៉ូតូរហ័ស និងមិនចំណាយពេលរង់ចាំយូរ មានន័យថា គ្រប់ផ្លូវសំខាន់ៗនៅតាមទីប្រជុំជននានា សុទ្ធតែមានរ៉ឺម៉កម៉ូតូរត់ទាំងអស់ ចំណែកតាក់ស៊ីហាក់មិនទាន់សម្បូរបែបនៅឡើយ ។
អ្នកស្រី ហេង គីថា ដែលជាអនិកជនខ្មែរនៅបរទេសប្រាប់ថា ជិះរ៉ឺម៉កម៉ូតូមានសុវត្ថិភាពល្អ និងអាចមើលទេសភាពបាននៅពេលធ្វើដំណើរ ។ អ្នកស្រីថា ៖ « ពេលត្រឡប់មកស្រុកខ្មែរម្តងៗ ខ្ញុំតែងតែជ្រើសរើសយកសេវារ៉ឺម៉កម៉ូតូនេះរាល់ពេល ចំណែកតម្លៃខុសគ្នាបន្ដិចបន្ដួច គឺមិនចោទជាបញ្ហានោះទេ » ។
បើតាមលោក ដា លុច អ្នកបើករថយន្តក្រុមហ៊ុន Global Taxi បានឲ្យដឹងថា ក្រុមហ៊ុនដែលផ្តល់សេវាដឹកអ្នកដំណើរបច្ចុប្បន្នមានច្រើន និងមានតម្លៃប្រកួតប្រជែង ។ សព្វថ្ងៃនេះ តាមការកត់សម្គាល់មានភ្ញៀវមួយចំនួនចូលចិត្តជិះតាក់ស៊ីវាស់ម៉ែត្រ បើគាត់ជិះពីក្នុងក្រុងមកដល់ព្រលានយន្តហោះអន្តរជាតិភ្នំពេញ អស់ប្រាក់ប្រហែល៧ទៅ៨ដុល្លារ តែបើជិះពីព្រលានយន្តហោះទៅក្រៅក្រុងបន្ដិច ដូចជាតំបន់បឹងស្នោជាដើម អស់ប្រាក់ជិត១០ដុល្លារ អីចឹងគាត់ជិះតាក់ស៊ីចំណេញជាង ។ ចំពោះក្រុមហ៊ុន Global Taxi របស់លោក ក្នុងចម្ងាយ១.២០០ម៉ែត្រ ថ្លៃ៤ពាន់រៀល ។ បើតាមដំណឹងនៅខែខាងមុខនេះ ក្រុមហ៊ុនគ្រោងនឹងនាំចូលរថយន្តថ្មីប្រហែល២០គ្រឿងបន្ថែមទៀតដើម្បីពង្រីកសេវាដឹកភ្ញៀវ ។
លោក ទូច សំអុល អ្នកបើករថយន្តតាក់ស៊ីក្រុមហ៊ុនមហាកំផែង បានឲ្យដឹងថា តាក់ស៊ីរបស់លោក ក្នុង១គីឡូម៉ែត្រថ្លៃ២.៥០០រៀល ហើយក្នុង១ថ្ងៃលោកអាចដឹកភ្ញៀវបានពីរឬបីជើងដែរ។ គិតមកដល់សព្វថ្ងៃ ក្រុមហ៊ុនមានរថយន្តសម្រាប់ដឹកអ្នកដំណើរចំនួន៦២គ្រឿងហើយ ។
ការលើកឡើងស្រដៀងគ្នានេះដែរ បើតាមតំណាងអ្នកបើកបរតាក់ស៊ីក្រហម បានឲ្យដឹងថា សព្វថ្ងៃនេះ ក្រុមហ៊ុនតាក់ស៊ីក្រហមមានរថយន្តប្រមាណ៤០គ្រឿង ហើយតម្លៃដឹកភ្ញៀវក្នុង១គីឡូម៉ែត្រ ថ្លៃ២.៥០០រៀល ។
ចំណែកអ្នករត់រ៉ឺម៉កម៉ូតូនៅខាងក្រៅព្រលានយន្តហោះអន្តរជាតិភ្នំពេញ លោក ជៀប រុម បានឲ្យដឹងថា សេវារ៉ឺម៉កម៉ូតូនៅខាងក្រៅព្រលានយន្តហោះ គឺធូរថ្លៃជាងខាងក្នុង ព្រោះសេវានៅខាងក្នុងថ្លៃ៩ដុល្លារសម្រាប់ដឹកភ្ញៀវចេញពីព្រលានយន្ដហោះចូលទៅក្នុងក្រុង តែភ្ញៀវខ្លះចង់ជិះរ៉ឺម៉កម៉ូតូមានតម្លៃថោកជាងនេះ គេចេញមកជិះខាងក្រៅ ។
លោកថា ៖ « បើភ្ញៀវជិះរ៉ឺម៉កម៉ូតូចេញពីព្រលានយន្តហោះទៅផ្សារថ្មី មាត់ទន្លេ ឬទៅផ្សារទំនើបអុីអន ទារថ្លៃពីភ្ញៀវពី៥ទៅ៧ដុល្លារក្នុងមួយជើង តែពេលត្រឡប់មកវិញ ទោះបីជាភ្ញៀវឲ្យថ្លៃទាបជាងនេះក៏យកដែរ ចៀសវាងត្រឡប់មកវិញទទេ » ។
ការផ្តល់សេវាកន្លងមក ភ្ញៀវភាគច្រើនចូលចិត្តជិះរ៉ឺម៉កម៉ូតូ ដោយសារភ្ញៀវខ្លះពុលរថយន្ដ ដូច្នេះ គាត់ជិះកង់បីវាល្ហើយជាង ហើយភ្ញៀវបរទេសក៏ចូលចិត្តជិះរ៉ឺម៉កម៉ូតូច្រើនដែរ។ ប៉ុន្តែភ្ញៀវខ្លះទៀតអត់ជិះរ៉ឺម៉កម៉ូតូទេ គឺចាំតែជិះរថយន្តតាក់ស៊ីប៉ុណ្ណោះ បើទោះបីជារថយន្តតាក់ស៊ីមិនទាន់មកដល់ក៏ដោយ ។ នេះបើតាមការបញ្ជាក់របស់អ្នករត់រ៉ឺម៉កម៉ូតូរូបនេះ ។
យ៉ាងណាក៏ដោយ នេះគ្រាន់តែជាផ្នែកមួយនៃការលើកឡើងរបស់អ្នកធ្វើដំណើរដែលជ្រើសរើសសេវាដែលខ្លួនពេញចិត្តប៉ុណ្ណោះ តែវាជាគំនិតមួយសម្រាប់អ្នកធ្វើដំណើរសម្រេចចិត្តថាតើគួរជ្រើសរើសការជិះតាក់ស៊ី ឬរ៉ឺម៉កម៉ូតូ ?
ចែករំលែកព័តមាននេះ