ខេត្តសៀមរាប៖ កម្លាំងនគរបាលជំនាញនៃស្នងការដ្ឋានខេត្តសៀមរាប បានសហការគ្នា ចេញល្បាតបង្ការទប់ស្កាត់បទល្មើសផ្សេងៗ ក្នុងភូមិសាស្ត្រក្រុងសៀមរាប ដើម្បីឲ្យពលរដ្ឋ និងភ្ញៀវទេសចរ មកកម្សាន្ត ប្រកបដោយសេចក្តីសុខសប្បាយ នាឱកាសឆ្លងឆ្នាំថ្មីឆ្នាំសាកល។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការដ្ឋានខេត្តសៀមរាប បានមានប្រសាសន៍ថា លោកបានដាក់ផែនការយុទ្ធសាស្ត្រ ដើម្បីការពារ និងរឹតបន្តឹងផ្នែកសន្តិសុខ នៅក្រុងសៀមរាប ចាប់តាំងពីថ្ងៃទី២៥ ខែធ្នូ ឆ្នាំ២០២១ រហូតដល់ថ្ងៃទី១ ខែមករា ឆ្នាំ២០២២ ហើយក៏ចេញល្បាតជាបន្តបន្ទាប់ ដើម្បីបង្ការទប់ស្កាត់បទល្មើសផ្សេងៗផងដែរ។
លោកបន្ថែមថា កម្លាំងជំនាញព្រហ្មទណ្ឌនៃស្នងការដ្ឋាននគរបាលខេត្តសៀមរាប បានចេញល្បាតបង្ការទប់ស្កាត់បទល្មើសផ្សេងៗ ក្នុងភូមិសាស្ត្រ ក្រុងសៀមរាប ដើម្បីឲ្យពលរដ្ឋ និងភ្ញៀវទេសចរ មកកម្សាន្ត ប្រកបដោយសេចក្តីសុខសប្បាយ នាឱកាសឆ្លងឆ្នាំថ្មីនេះ។
លោកបន្តថា កម្លាំងទាំងនេះ រួមមាន៖ កម្លាំងការិយាល័យនគរបាលព្រហ្មទណ្ឌកម្រិតស្រាលដឹកនាំដោយលោកវរសេនីយ៍ឯក ហង្ស សុផាតភីរម្យ (លេខទូរស័ព្ទលេខ ០១២ ៥៩៨២៨១) ទទួលខុសត្រូវល្បាតរក្សាសន្តិសុខ និងសុវត្ថិភាព នៅតំបន់ផាប់ស្ទ្រីត និងភូមិសាស្ត្រខាងលិចស្ទឹង។
កម្លាំងការិយាល័យនគរបាលព្រហ្មទណ្ឌកម្រិតធ្ងន់ ដឹកនាំដោយលោកវរសេនីយ៍ទោ សុខ ម៉េងអៀង (លេខទូរស័ព្ទលេខ ០១៧ ៩១០ ៦០៦) ទទួលខុសត្រូវល្បាតរក្សាសន្តិសុខ និងសុវត្ថិភាពក្នុងតំបន់មហាសណ្ឋាគារអង្គរ និងភូមិសាស្ត្រខាងកើតស្ទឹង។
នាឱកាសឆ្លងឆ្នាំថ្មី២០២២ ខាងមុខនេះ សូមជូនពរឲ្យបងប្អូនប្រជាពលរដ្ឋ និងភ្ញៀវទេសចរជាតិ និងអន្តរជាតិ ដែលមកកម្សាន្ត នៅក្នុងខេត្តសៀមរាប ទទួលបានសេចក្តីសុខសប្បាយគ្រប់ទីកន្លែង៕
ចែករំលែកព័តមាននេះ