រាជធានីភ្នំពេញ ៖ ការមិនច្បាស់លាស់ពីជំងឺកូវីដ ១៩ ពិសេសវត្តមានវីរុសបំប្លែងថ្មីៗ ដូចជាអូមីក្រុងជាដើមនោះ បានធ្វើឲ្យវិស័យអចលនទ្រព្យនៅកម្ពុជាក្នុងឆ្នាំ ២០២២ ខាងមុខ ក៍មិនមានភាពប្រាកដប្រជាថា…
រាជធានីភ្នំពេញ ៖ ការមិនច្បាស់លាស់ពីជំងឺកូវីដ ១៩ ពិសេសវត្តមានវីរុសបំប្លែងថ្មីៗ ដូចជាអូមីក្រុងជាដើមនោះ បានធ្វើឲ្យវិស័យអចលនទ្រព្យនៅកម្ពុជាក្នុងឆ្នាំ ២០២២ ខាងមុខ ក៍មិនមានភាពប្រាកដប្រជាថា យ៉ាងនោះដែរ ។ តើឆ្នាំ ២០២២ វិស័យអចលនទ្រព្យនឹងល្អប្រសើរជាងឆ្នាំ ២០២១ ឬយ៉ាងណា ? ពុំមានចម្លើយពិតប្រាកដក្នុងរឿងនេះនៅឡើយទេ ដោយគេត្រូវរង់ចាំមើលពីស្ថានភាពជំងឺកូវីដ ១៩ ជាមុនសិន ។
ក្រុមអ្នកជំនាញវិស័យអចលនទ្រព្យ មួយក្រុមនៅព្រឹកថ្ងៃទី ៣០ ធ្នូ ២០២១ នេះ បានជួបជជែកគ្នាពីបញ្ហាប្រឈម របស់វិស័យអចលនទ្រព្យដែលអាចនឹងកើតឡើងដោយសារតែស្ថានភាពមិនច្បាស់លាស់របស់កូវីដ ១៩ ។ លោក ឡុង គឹមសួគ៌ ជាអគ្គនាយកក្រុមហ៊ុន អចលនទ្រព្យ Century 21 Advance Property ដែលបានចូលរួមក្នុងការពិភាក្សានោះ បានលើកឡើងថា បើពិនិត្យមើលការចាក់វ៉ាក់សាំងជូនពលរដ្ឋរបស់រដ្ខាភិបាល គឺជោគជ័យមានចំនួនច្រើនលើសលប់ រហូតដល់រដ្ឋាភិបាលបានបើកប្រទេស បើកសេដ្ឋកិច្ចឡើងវិញ ។
ប៉ុន្តែបើគេសង្កេតទៅលើទីផ្សារអចលនទ្រព្យវិញ នៅទទួលផលប៉ះពាល់ពីកូវីដ ១៩ នៅឡើយមិនទាន់ត្រឡប់ទៅរកសកម្មភាពដូចកាលមុនផ្ទុះកូវីដ ១៩ នៅឡើយនោះទេ ។ លោកថា ការលក់អចលនទ្រព្យនៅក្នុងពេលបច្ចុប្បន្ននេះ នៅតែបន្តទទួលរងផលប៉ះពាល់ប្រហាក់ប្រហែលជា ៥០ ភាគរយ ទាំងវិស័យដីធ្លី ខុនដូ និងលំនៅឋានក្នុងបុរី ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យស៊ីភីអិល បាននិយាយថា មិនសូវជាចាប់អារម្មណ៍ពីផលប៉ះពាល់ និងការប្រឈមដែលកើតចេញពីកូវីដ ១៩ នោះទេ ។ សំខាន់លោកបាន ផ្ដោតទៅសកម្មភាពដោះស្រាយ និងបន្តធ្វើការអភិវឌ្ឍ ដោយក្ដីរំពឹងខ្ពស់ ទោះបីជាមិនបានផលធំដុំ តែយ៉ាងហោចណាស់ លោកនៅតែដើរទៅមុខ ។ លោកឧកញ៉ាបន្តថា អ្វីដែលយើងត្រូវធ្វើគឺការអភិវឌ្ឍខ្លួនយើងឱ្យកាន់តែធំ ហើយនៅពេលដែលវិបត្តិត្រូវបានបញ្ចប់ ពេលនោះយើងមានទុនមានការត្រៀមខ្លួនរួចហើយសម្រាប់ការប្រយុទ្ធបន្ត ។
លោក សំ សុខនឿន ប្រធានសមាគមអចលនទ្រព្យសកលបាននិយាយថា ឆ្នាំ ២០២២ ជាឆ្នាំដែលពិបាកព្យាករណ៍សម្រាប់វិស័យអចលនវត្ថុ ដោយសារតែវត្តមានអូមីក្រុងចេះតែរាលដាលខ្លាំង នៅខាងក្រៅប្រទេស ។ លោកបានបញ្ជាក់ថា បើសិនជារដ្ឋាភិបាលមានវិធានការទប់ស្កាត់នូវមេរោគបំប្លែងនេះ មានប្រសិទ្ធភាព កុំឱ្យរាលដាលនោះ វិស័យអចលនទ្រព្យអាចនឹងដំណើរល្អ ប៉ុន្តែបើចង់ឱ្យខ្លាំងដូចកាលមុនកូវីដ ១៩ ប្រហែលជាត្រូវការពេលវេលាយូរបន្តិច ។
នៅថ្ងៃទី ៣០ ខែធ្នូនេះ ក្រសួងរៀបចំដែនដី នគរូបនីយកម្ម និងសំណង់ បានបង្ហាញពីទិន្នន័យសំណង់ទូទាំងប្រទេសមានចំនួន ៤ ៣០៣ គម្រោង និងមានតម្លៃប៉ាន់ស្មានជាង ៥.៣៣៣ លានដុល្លារអាមេរិក បើប្រៀបធៀបនឹងឆ្នាំ ២០២០ ថយចុះជាង ៣១% ៕
ចែករំលែកព័តមាននេះ