អ៊ំស្រីទីវ ឆាត អាយុ៦២ឆ្នាំ ជាកសិកររស់នៅភូមិថ្មរាប ឃុំពង្រ ស្រុករលាប្អៀរ ខេត្តកំពង់ឆ្នាំង ។ គាត់មានបទពិសោធន៍ល្អក្នុងការដាំដើមឃិនឆាយ ទទួលបានលទ្ធផលល្អ ដែលបទពិសោធន៍នេះ សូមបង្ហាញជូនដូចខាងក្រោម ៖ ១-ការរៀបចំថ្នាល និងសាបគ្រាប់ ដើម្បីជំរុញឱ្យការដាំដុះមានលក្ខណៈល្អ គាត់បានរៀបចំថ្នាលសំរាប់បណ្តុះដោយលាយនូវសារធាតុដូចជា ផេះ និងអង្កាមពុកផុយ ដោយយកទៅច្របល់លាយជាមួយដីឱ្យសព្វ រួចស្រោចទឹកឱ្យសើមៗ បន្ទាប់មកកាប់លើកជារង សំរាប់ដាំដោយមានទំហំមួយម៉ែត្របួនជ្រុង ។ យកគ្រាប់ ដែលបានទិញពីផ្សារមកសាបនៅលើថ្នាល រួចស្រោចទឹកឱ្យជោកមួយថ្ងៃ២ដង គឺពេលព្រឹក និងពេលល្ងាច ។ ការស្រោចនេះ ធ្វើរាល់បីថ្ងៃម្តង ។ បន្ទាប់ពីដុះ គាត់បានស្រោចទឹកជីបន្ថែមពីលើ ដើម្បីជួយជំរុញដល់ការលូតលាស់របស់កូនដំណាំ ព្រោះកូនឃិនឆាយនេះពិបាកបណ្តុះជាងដំណាំផ្សេងៗ ។ ២-ការរៀបចំរានសំរាប់ដាំ និងការដាំ ក្រោយពេលបណ្តុះបាន១៥ថ្ងៃ គ្រាប់ដំណាំចាប់ផ្តើមដុះពន្លក បន្ទាប់មកគាត់បានរៀបចំធ្វើរានដាំ ។ រានដាំឃិនឆាយលើកផុតពីដីប្រហែលជាកន្លះម៉ែត្រ ដោយមានទំហំបណ្តោយប្រវែង៤,៥ម៉ែត្រ និងទទឹង១,២ម៉ែត្រ ។ នៅលើរាន គាត់បានដាក់លាយល្បាយដីមានដូចជា ដីស្រទាប់លើ ផេះអង្កាម និងអង្កាមពុកផុយ រួចច្របល់ឱ្យសព្វ បន្ទាប់មកយកទៅដាក់ពង្រាយឱ្យពេញរាន ។ មុនដាំ គាត់បានស្រោចទឹកនៅលើរានឱ្យសើម ហើយដកកូនឃិនឆាយទៅដាំ ដោយទុកចន្លោះគុម្ព០,៧តឹក ដើម្បីងាយស្រួលក្នុងការដាក់ជីជ្រុំគល់ និងពន្លឺចូលបានគ្រប់គ្រាន់ (កូនឃិនឆាយអាចយកទៅដាំបាន នៅពេលវាមានអាយុ២០ថ្ងៃ) ។ ៣-ការថែទាំ ការស្រោចទឹក ៖ បន្ទាប់ពីដាំរួច គាត់បានស្រោចទឹកជាប់ជាប្រចាំគឺ ពេលព្រឹក និងពេលល្ងាច លើកលែងនៅពេលមានភ្លៀង ។ រាល់បីថ្ងៃម្តង គាត់បានស្រោចទឹកបំប៉នកូនដំណាំ ។ ទឹកដី របស់គាត់ផ្សំឡើងដោយសារធាតុជាច្រើនដូចខាងក្រោម ៖ ធាតុផ្សំ -ទន្ទ្រាងខេត្តចំនួន១បាច់ ស្មើនឹង៥គីឡូ ក្រាម ។ -លាមកគោ២បង្គី -លាមកមាន់១០គីឡូក្រាម -ផេះ១០គីឡូក្រាម -ក្បាលត្រី៥គីឡូក្រាម -ទឹកនោមគោ១០០លីត្រ -សារធាតុផ្សំសំរាប់បន្ថែមពីខាងក្រៅមានដូចជា ពោះវៀនមាន់ ផ្លែឈើទុំ ក្តាម ខ្យង ពស់ កង្កែបជាដើម ។ របៀបធ្វើ យកសារធាតុផ្សំទាំងអស់ ទៅច្របល់ឱ្យសព្វច្រកចូលទៅក្នុងការុង ចងមាត់ឱ្យជិត ។ យកសារធាតុនោះទៅដាក់ចូលទៅក្នុងពាង រួចចាក់ទឹកនោមគោចូលទៅក្នុងពាង (ដាក់ទឹកនោមគោសុទ្ធ) ត្រាំរហូតដល់រយៈពេល១០ថ្ងៃ ទើបយកទៅប្រើប្រាស់។ របៀបប្រើ ក្រោយរយៈពេល១០ថ្ងៃ គាត់បានយកទឹកថ្នាំ១កំប៉ុង ទឹកដោះគោលាយជាមួយនឹងទឹក១០លីត្រ ស្រោចទៅលើដំណាំរាល់៣ថ្ងៃម្តង ។ នៅពេលដំណាំដាំបានរយៈពេល១ខែ ត្រូវជ្រុំជ្រោយគល់ដំណាំម្តង ដើម្បីកុំឱ្យដីហាប់ណែន នាំឱ្យកូនឃិនឆាយលូតលាស់មិនល្អ ។ ៤-ការប្រមូលផល ឃិនឆាយជាប្រភេទដំណាំប្រមូលផលបណ្តាក់ គឺគេមិនដកទាំងដើមឱ្យអស់នោះទេ គឺការប្រមូលដោយបេះធាង និងកាត់កូនដែលបែកខ្នែងយកទៅលក់ ឬបរិភោគ ។ ក្នុងការដាំដុះ គាត់ចំណាយប្រាក់សំរាប់ទិញគ្រាប់អស់ចំនួន១.០០០រៀល និងកំលាំងពលកម្មដាំដុះខ្លួនឯង។ ឃិនឆាយអាយុបាន២ខែ អាចប្រមូលផលបាន។ តាំងពីចាប់ផ្តើមដាំនៅខែមករា រហូតដល់ខែ ឧសភា គាត់ប្រមូលផលបានចំនួន៦ដងមក ។ ការប្រមូលផលម្តងគាត់លក់បានប្រាក់ចំនួន៨.០០០រៀល សរុបស្មើនឹង៤៨.០០០រៀល ។ ជាក់ស្តែងដំណាំរបស់គាត់ប្រមូលផលពុំទាន់អស់ទេ ហើយគិតថា ដំណាំរបស់គាត់នឹងអាចប្រមូលផលបានពី៨-១០ដងទៀត ព្រោះវាចេះតែលូតលាស់ជាបន្តប្រសិនបើការថែទាំបានដិតដល់នោះ ។ សរុបមក បច្ចេកទេសសំខាន់ៗ ក្នុងការដាំឃិនឆាយមាន ៖ -រៀបចំថ្នាលសាបគ្រាប់ដោយដាក់ផេះអង្កាមច្របល់លាយជាមួយដី -សាបគ្រាប់លើថ្នាល និងថែទាំស្រោចបំប៉នជីទឹកឱ្យកូនដំណាំឆាប់លូតលាស់ -ដាំនៅលើរាន ដោយទុកចន្លោះគុម្ព ដើម្បីងាយស្រួលធ្វើស្មៅ និងទទួលពន្លឺគ្រប់គ្រាន់ -ស្រោចទឹកជីបំប៉ន៣ថ្ងៃម្តង ដើម្បីឱ្យឃិនឆាយលូតលាស់បានល្អ ៕ (ដកស្រង់ចេញពីទស្សនាវដ្តីកសិករ)
ចែករំលែកព័តមាននេះ