ប្រទេសវៀតណាម ៖ ធនាគារពិភពលោក (WB) បានព្យាករកាលពីថ្ងៃអង្គារថា វៀតណាមនឹងមានកំណើនសេដ្ឋកិច្ចជាមធ្យមក្នុងអត្រា៦,៣% នៅឆ្នាំ២០១៦-២០១៨ ។
នៅក្នុងរបាយការណ៍ទស្សនវិស័យសេដ្ឋកិច្ចសកលរបស់ធនាគារពិភពលោក ដែលចេញផ្សាយចុងក្រោយបានព្យាករថា កំណើនសេដ្ឋកិច្ចវៀតណាមនៅឆ្នាំ២០១៦នេះ មានអត្រា៦,២% បន្ទាប់មកនឹងកើនឡើង៦,៣% នៅក្នុងឆ្នាំ២០១៧ និងឆ្នាំ២០១៨ ។
ការកើនឡើងនេះ គឺដោយសារការកើនឡើងនៃការវិនិយោគដោយផ្ទាល់ពីបរទេស កំណើននៃការនាំចេញ និងទីផ្សារការងារខ្លាំង។ នេះបើយោងតាមរបាយការណ៍របស់ធនាគារពិភពលោក ។
ធនាគារពិភពលោកបានព្យាករទៀតថា ក្នុងចំណោមបណ្តាប្រទេសកំពុងអភិវឌ្ឍន៍នៅតំបន់អាស៊ាន វៀតណាម និងហ្វ៊ីលីពីនមានកំណើនទស្សនវិស័យសេដ្ឋកិច្ចខ្លាំងក្លាជាងគេ ។
យោងតាមរបាយការណ៍នៃការធ្វើកំណែទម្រង់សហគ្រាសគ្រប់គ្រងដោយរដ្ឋក្នុងប្រទេសវៀតណាម ដែលរួមមានការធ្វើឲ្យប្រសើរឡើងលើតម្លាភាពនិងរដ្ឋាភិបាល គឺអាចកាត់បន្ថយលើនូវកង្វះធនធានសារពើភ័ណ្ឌបាន ។
រីឯការធ្វើកំណែទម្រង់លើវិស័យធនាគារ គឺអាចជួយកែប្រែនូវប្រសិទ្ធភាព និងទុកដាក់មូលធននៅក្នុងប្រទេសវៀតណាម ។ នេះបើតាមធនាគារពិភពលោក ។
កាលពីពេលថ្មីៗនេះ ធនាគារ Hong Kong and Shanghai Banking Corporation (HSBC) ក៏បានរក្សាការព្យាករផលិតផលក្នុងស្រុកសរុប (GDP) នៅឆ្នាំ២០១៦ ក្នុងអត្រា៦,៣%ដដែល ។
តាមរបាយការណ៍ចុងក្រោយរបស់ធនាគារ HSBC បង្ហាញថា កម្តៅកើនឡើងនឹងបន្តជះឥទ្ធិពលដល់ទិន្នផលកសិកម្ម ។ ទោះជាយ៉ាងណា គេរំពឹងថា ផ្នែកឧស្សាហកម្ម និងសេវាកម្ម នឹងអាចជួយដល់កំណើនផលិតផលក្នុងស្រុកសរុបនៅត្រីមាសទី២ឆ្នាំនេះ ក្នុងអត្រា៦,១% ។
របាយការណ៍បង្ហាញទៀតថា នៅក្នុងត្រីមាសទី២ឆ្នាំនេះ នឹងមានការរើបឡើងវិញនៃសេដ្ឋកិច្ចជាតិ ។
ទោះបីជាសន្ទស្សន៍អ្នកគ្រង់គ្រងការបញ្ជាទិញមានស្ថានភាពមិនល្អក្នុងតំបន់ក្តី ក៏សន្ទស្សន៍នេះបានបន្តកើនឡើងដែរ ដោយសារតែមានពិន្ទុខ្ពស់ក្នុងរយៈពេល១០ខែ គឺ៥២,៧ពិន្ទុនៅខែឧសភា និង៥២,៣ពិន្ទុនៅខែមុន ។
ចំនួនអ្នកបញ្ជាទិញថ្មី ក៏បានកើនឡើងយ៉ាងខ្លាំងផងដែរ ដែលបញ្ជាក់ថា ប្រតិបត្តិការផលិតហាក់មានកំណើននៅខែមិថុនា ។ សន្ទស្សន៍ផលិតកម្មឧស្សាហកម្ម និងការនាំចេញ ក៏មានកំណើនជាបន្ទបន្ទាប់ក្នុងរយៈពេលនេះដែរ ។
ធនាគារ HSBC បានធ្វើដំណោះស្រាយក្នុងរយៈពេលមធ្យមលើការធ្វើកំណែទម្រង់ហិរញ្ញវត្ថុ នៅវៀតណាម រួមមាន ការពង្រីកប្រាក់ចំណេញ និងកែតម្រូវតាមវិធីសាស្ត្រគណនេយ្យឲ្យស្របតាមស្តង់ដាអន្តរជាតិ ។
របាយការណ៍បញ្ជាក់ថា វិធានការរដ្ឋបាលដែលគ្រប់គ្រងដើម្បីទប់ស្កាត់ការគេចពន្ធ ការប្រកាសពីករណីគេចពន្ធ និងដំណើរការនៃបង់ពន្ធអាករឡើងវិញ ក៏ជាដំណោះស្រាយដ៏ល្អប្រសើរផងដែរ ៕
ចែករំលែកព័តមាននេះ