ឪពុកម្តាយដែលមានប្រាក់ចំណូលអាចមានលទ្ធភាព គួរតែស្វែងរកទិញដី ផ្ទះ ឬខុនដូទុកសម្រាប់កូនៗនៅតូចៗ ក្នុងគោលបំណងទុកឲ្យពួកគេពេលពេញវ័យ និងជួយឲ្យកូនៗអាចមានជំហររឹងមាំនៅថ្ងៃអនាគត។ ជាក់ស្ដែង នៅក្នុងទីក្រុង Vancouver ប្រទេសកាណាដា ពេលនេះឪពុកម្ដាយដែលមានលទ្ធភាពធូរធារកំពុងតែស្វែងរកទិញលំនៅឋានទុកសម្រាប់កូនៗរបស់ពួកគេ ។
តាមប្រសាសន៍របស់ទីប្រឹក្សាហិរញ្ញវត្ថុ ប្រចាំស្ថាប័ន ហិរញ្ញវត្ថុ BlueShor បានឲ្យដឹងថា នៅពេលនេះ ប្រជាជនកាន់តែខ្លាចទៅៗ ដែលវាបានគូសបញ្ជាក់ពីកំណើននៃតម្លៃអចលនទ្រព្យ លំនៅឋានកាលពីពេលថ្មីៗនេះ ។
លោក Skinner បានមានប្រសាសន៍ថា ៖ « មានមនុស្សជាច្រើនមកសួរខ្ញុំថា តើកូនចៅរបស់ខ្ញុំអាចនឹងមានលទ្ធភាពទិញផ្ទះបានដែរទេនៅពេលដែលពួកគេពេញវ័យ ។ តាមពិត ពួកគេកំពុងតែទិញចំណូលអចលនទ្រព្យនៅថ្ងៃនេះ ក្នុងគោលបំណងផ្ទេរអចលនទ្រព្យនោះ នៅពេលដែលកូនៗរបស់គេពេញវ័យ » ។
បើយោងតាមការស្ទង់មតិរបស់ក្រុមហ៊ុនធានារ៉ាប់រងបង់រំលស់ឯកជន Genworth Canada បានឲ្យដឹងថា ៤០%នៃអ្នកទិញផ្ទះជាលើកដំបូងនៅក្នុងទីក្រុង Vancouver ត្រូវបានជួយដោយឪពុកម្តាយរបស់ពួកគេ បើធៀបនឹងអត្រា២២% នៅតំបន់ផ្សេងទៀតនៃប្រទេសកាណាដា ។
លោក Skinner បានឲ្យដឹងថា វាគឺជារឿងធម្មតាទៅហើយ ដែលអតិថិជនរបស់លោក បានជួយកូនរបស់ពួកគេក្នុងកម្ចី២០ម៉ឺនដុល្លារទៅ៥០ម៉ឺនដុល្លារដើម្បីទិញផ្ទះមួយខ្នងដែលជាញឹកញាប់នៅក្នុងតំបន់ក្បែរៗគ្នានោះ ។
លំនៅឋានក្នុងក្រុង West Vancouver ត្រូវបានគេមើលឃើញថា ឡើងថ្លៃក្នុងរយៈពេលប៉ុន្មានឆ្នាំនេះ ពោលគឺវាបានកើនដល់បីបួនលានដុល្លារនៅក្នុងរយៈពេលត្រឹមតែពីរបីខែប៉ុណ្ណោះ។ លោក Jason Soprovich អ្នកជំនាញរៀបចំការលក់អចលនទ្រព្យ West Vancouver បានមានប្រសាសន៍ឲ្យដឹងថា លោកបានឃើញថា ម្ចាស់ផ្ទះទាំងនោះបានទុកប្រាក់ដោយឡែកសម្រាប់កូនរបស់ពួកគេ ពីការលក់ផ្ទះនោះ ។ ជាក់ស្តែង គ្រួសារទាំងអស់នោះត្រូវបានលើកទឹកចិត្តក្នុងការជួយកូនឱ្យរស់នៅជិតឪពុកម្តាយរបស់ខ្លួន។
ទោះជាយ៉ាងណា លោក Skinner បានឲ្យដឹងថា ការទិញអចលនទ្រព្យសម្រាប់កូនចៅគឺជានិន្នាការថ្មី ។ កន្លងមក លោកបានជួយដល់អតិថិជនចំនួន៦នាក់ហើយ ។
ដំណើរការនេះ រួមមានការបង្កើតការវិនិយោគ និងជួលអចលនទ្រព្យ រហូតដល់ក្មេងទាំងនោះពេញវ័យ។ ជាទូទៅ គ្រួសារទាំងនោះដែលបានធ្វើការវិនិយោគ បានទទួលប្រាក់ចំណូលយ៉ាងហោចណាស់ ក៏២០ម៉ឺនដុល្លារដែរជាប្រចាំឆ្នាំ និងទ្រព្យសុទ្ធដែលរួមមានទាំងអចលនទ្រព្យ មានតម្លៃចាប់ពី៤លានដុល្លារ ទៅ១០លានដុល្លារ ។
លោក Skinner បានបន្ថែមថា ៖ « ពួកគេទិញផ្ទះ និងខុនដូក្នុងគោលបំណងទុកឲ្យកូនៗរបស់ពួកគេនៅពេលអនាគត ហើយថ្វីបើតម្លៃអចលនទ្រព្យនៅក្នុងទីក្រុង West Vancouver កំពុងតែកើនឡើងក្តី ក៏ឪពុកម្តាយទាំងឡាយ បានស្វែងរកអចលនទ្រព្យនៅក្នុងទីក្រុង North Vancouver និងទីក្រុង Vancouver ដែរ » ៕
ចែករំលែកព័តមាននេះ