បុគ្គលិកអង្គការ ២នាក់នៅបាត់ខ្លួន ក្រោយយោធាមីយ៉ាន់ម៉ា បើកការវាយប្រហារមួយ សម្លា.ប់មនុស្សជិត ៤០នាក់
ទីក្រុងរ៉ង់ហ្គូន ៖ អង្គការសប្បុរសធម៌អន្តរជាតិមួយឈ្មោះ Save the Children និយាយថា បុគ្គលិករបស់ខ្លួន ២នាក់ នៅបាត់ខ្លួន…
ទីក្រុងរ៉ង់ហ្គូន ៖ អង្គការសប្បុរសធម៌អន្តរជាតិមួយឈ្មោះ Save the Children និយាយថា បុគ្គលិករបស់ខ្លួន ២នាក់ នៅបាត់ខ្លួន ក្នុងប្រទេសមីយ៉ាន់ម៉ា បន្ទាប់ពីសាកសពជិត ៤០នាក់ ត្រូវបានរកឃើញ បន្ទាប់ពីការវាយប្រហារមួយ ដោយយោធាមីយ៉ាន់ម៉ា នេះបើយោងតាម BBC ចេញផ្សាយនៅថ្ងៃទី២៧ ធ្នូ ២០២១នេះ ។
មន្ត្រីអង្គការសប្បុរសធម៌ អោយដឹងថា កងទ័ពបានបង្ខំមនុស្សឲ្យចេញពីរថយន្ត ខ្លះត្រូវបានចាប់ខ្លួន ខ្លះទៀតត្រូវសម្លាប់ ដោយដុតសាកសពពួកគេ ។ កុមារ និងស្ត្រី ត្រូវបានគេជឿថា ស្ថិតក្នុងចំណោមជនរងគ្រោះ ក្នុងការប្រហារដែលបានកើតឡើងកាលពីថ្ងៃសុក្រ ទី២៤ ធ្នូ ២០២១ នៅក្នុងរដ្ឋ Kayah ភាគខាងកើតប្រទេសភូមា ។
អ្នកនាំពាក្យយោធាមីយ៉ាន់ម៉ា ប្រកាសថា ពួកគេ បានសម្លាប់ក្រុមភេរវករ ប្រដាប់អាវុធជាច្រើននាក់ នៅក្នុងតំបន់ ។
សូមជម្រាបថា ការតវ៉ាទ្រង់ទ្រាយធំ បាននិងកំពុងកើតឡើងនៅទូទាំងប្រទេសមីយ៉ាន់ម៉ា ចាប់តាំងពីយោធា បានដណ្តើមកាន់កាប់ កាលពីខែកុម្ភៈ កន្លងមក ។ ហើយមេដឹកនាំគណបក្សជាប់ឆ្នោត លោកស្រី អ៊ុងសាន ស៊ូជី និងសមាជិកគណបក្សសម្ព័ន្ធជាតិ ដើម្បីប្រជាធិបតេយ្យ NLD ស្ថិតក្នុងចំណោមអ្នកដែលត្រូវឃុំខ្លួន ។
នៅក្នុងសេចក្តីថ្លែងការណ៍មួយ កាលពីថ្ងៃសៅរ៍ អង្គការសប្បុរសធម៌អន្តរជាតិខាងលើ បានថ្កោលទោសការវាយប្រហារនេះ ដែលបានធ្វើឲ្យមនុស្សយ៉ាងហោចណាស់ ៣៨នាក់ត្រូវស្លាប់ ។ ហើយបុគ្គលិក ២នាក់ ដែលធ្វើដំណើរទៅផ្ទះ នៅថ្ងៃឈប់សម្រាក ក៏ត្រូវជាប់នៅក្នុងឧប្បត្តិហេតុនោះដែរ ហើយនៅតែបាត់ខ្លួននៅឡើយ ដោយរថយន្តឯកជនរបស់ពួកគេ រងការវាយប្រហារ និងឆេះខ្ទេចអស់ ។
នាយកប្រតិបត្តិអង្គការសប្បុរសធម៌ លោកស្រី Inger Ashing ថ្លែងថា “យើងមានការភ័យរន្ធត់ ចំពោះអំពើហិង្សា ដែលបានធ្វើឡើងលើជនស៊ីវិលស្លូតត្រង់ និងបុគ្គលិករបស់យើង ដែលកំពុងធ្វើការជួយដល់កុមាររាប់លាននាក់ដែលខ្វះខាតនៅទូទាំងប្រទេសមីយ៉ាន់ម៉ា” ។
លោកស្រី បាននិយាយបន្តថា ការស៊ើបអង្កេតលើឧប្បត្តិហេតុនេះ កំពុងបន្ត ។ ព្រោះមានរូបថត ដែលបង្ហាញពីការវាយប្រហារ នៅទីប្រជុំជន Hpruso ដែលរថយន្ត ឆេះនៅសល់តែគ្រោងដែក ។
ដោយឡែក កងកម្លាំងការពារជាតិមួយ មានឈ្មោះ Karenni ដែលជាកងជីវពលធំជាងគេមួយ ដែលប្រឆាំងនឹងរបបយោធាមីយ៉ាន់ម៉ា បាននិយាយថា អ្នកស្លាប់ មិនមែនជាសមាជិកកងជីវពលរបស់ខ្លួនទេ ប៉ុន្តែជាជនស៊ីវិល ដែលកំពុងរត់ស្វែងរកការជ្រកកោនពីជម្លោះ ។
មេបញ្ជាការម្នាក់ បានប្រាប់ទីភ្នាក់ងារសារព័ត៌មានរ៉យទ័រថា “យើងមានការភ្ញាក់ផ្អើលជាខ្លាំង នៅពេលឃើញសាកសពទាំងអស់មានទាំងកុមារ ស្ត្រី និងមនុស្សចាស់” ។
អ្នកនាំពាក្យរបស់យោធាមីយ៉ាន់ម៉ា លោក Zaw Min Tun ក៏បានប្រាប់ទីភ្នាក់ងារសារព័ត៌មាន AFP ដែរថា ការប្រយុទ្ធគ្នា បានផ្ទុះឡើងនៅទីក្រុង Hpruso កាលពីថ្ងៃសុក្រ បន្ទាប់ពីទាហានរបស់ខ្លួន បានព្យាយាមបញ្ឈប់រថយន្តចំនួន ០៧គ្រឿង ដែលកំពុងបើកបរ “គួរឲ្យសង្ស័យ” ។ ទាហានបានសម្លាប់មនុស្សជាច្រើននាក់ នៅក្នុងការប៉ះទង្គិចគ្នា កើតឡើងនាពេលនោះ ៕
ចែករំលែកព័តមាននេះ