រាជធានីភ្នំពេញ ៖ ខណៈការប្រឡងសញ្ញាប័ត្រមធ្យមសិក្សាទុតិយភូមិ នឹងចាប់ផ្តើមនៅថ្ងៃស្អែកថ្ងៃទី២៧ ខែធ្នូ នេះ គេសង្កេតឃើញថា សិស្សានុសិស្សថ្នាក់ទី១២ នៅឆ្នាំនេះជាច្រើនកុះករបានទៅបន់ស្រន់នៅព្រះអង្គដង្កើ នៅមុខព្រះបរមរាជវាំង ដើម្បីបន់ស្រន់ឱ្យពួកគេប្រឡងជាប់។
សិស្សានុសិស្សមួយចំនួនដែលបានទិញទៀនធូប ផ្កាភ្ញី អមនឹងចេកទាំងស្និតៗនិងខ្លះបានទិញ ផ្លែដូង ផងនោះ បានលើកឡើងថា ការមកបន់ស្រន់នេះ គឺដើម្បីសេចក្តីស្ងប់ផ្លូវចិត្ត និងបន់ឱ្យបារនីព្រះអង្គដង្កើ ជួយពួកគាត់ឱ្យប្រឡងជាប់ ។
នេះមិនមែនជាលើកទី១ ទេ ដែលមានសិស្សានុសិស្សជាច្រើនទៅធ្វើការបន់ស្រន់នៅមុខព្រះអង្គដងលើ ជាពិសេសអ្នកនៅខេត្តបាត់ដំបង ក៏តែងតែនាំគ្នាជឿជាក់លើបារមីតាដំបូងគ្រញូង និងទៅបន់ស្រន់ឱ្យបានជាប់ដូចគ្នា ។
តាមការលើកឡើងរបស់សិស្សានុសិស្ស ដែលបានមកបន់ស្រន់នៅព្រះអង្គដង្កើ មុខព្រះបរមរាជវាំង បានលើកឡើងថា រៀនសូត្រចេះប្រាកជាប្រឡងជាប់ តែយ៉ាងណាមិញ ការមកបន់ស្រន់នាពេលនេះ ក៏ជារឿងសំខាន់ផងដែរ ដើម្បីពង្រឹងផ្លូវចិត្តរបស់ពួកគេមួយបន្ថែមទៀតថា កុំឱ្យមានការភ័យតក់ស្លុតដោយប្រការណាមួយនោះ ។
សូមបញ្ជាក់ថា ក្រសួងអប់រំ យុវជន និងកីឡា បានសម្រេចកំណត់យកកាលបរិច្ឆេទនៃការប្រឡងសញ្ញាប័ត្រមធ្យមសិក្សាទុតិយភូមិ ឬហៅថាការប្រឡងបាក់ឌុប ធ្វើនៅថ្ងៃទី២៧ ខែធ្នូ ឆ្នាំ២០២១ ខណៈកន្លងមក ក៏មានសិស្សានុសិស្សមួយចំនួនបានស្នើសុំសម្តេចតេជោ ហ៊ុន សែន នាយករដ្ឋមន្ត្រីកម្ពុជា អនុញ្ញតឱ្យជាប់បាក់ឌុបដោយស្វ័យប្រវត្តិដូចដែលបានផ្តល់ជូនកាលពីឆ្នាំ២០២០ ពេលកូវីដ-១៩ កំពុងតែវាយលុយកម្ពុជាជាខ្លាំងនោះ ។
តែយ៉ាងណាមិញ ប្រមុខដឹកនាំប្រទេសបានបញ្ជាក់ថា ការប្រឡងបាក់ឌុបឆ្នាំនេះ គឺត្រូវតែរៀបចំធ្វើ មិនឱ្យជាប់ដោយស្វ័យប្រវត្តិឡើយ ដូច្នេះអ្នកចេះនឹងប្រឡងជាប់ ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២១ នេះ មានមណ្ឌលប្រឡងសរុប ២០៤មណ្ឌល ត្រូវជា ៤៦១៦បន្ទប់ បេក្ខជនចុះឈ្មោះប្រឡងសរុប ១១៤១៨៣ ស្រី៦០៣៩៧នាក់ គណៈមេប្រយោគ និងគណៈកម្មការនានាចូលរួមក្នុងដំណើរការប្រឡងមានចំនួន ៣១៤៣២នាក់ ។
បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៅថ្ងៃទី ២៦ ខែធ្នូនេះ ក៏បានផ្ញើសារជូនពរដល់បុគ្គលិកអប់រំ លោកគ្រូអ្នកគ្រូ និងសិស្សានុសិស្ស សូមមានសុខភាពល្អ ទទួលបានជោគជ័យ នៃការប្រឡងដែលនឹងចាប់ផ្តើមនៅថ្ងៃ ស្អែកនេះ ។
ហើយលោក ហង់ជួន ណារ៉ុន ក៏បានអំពាវនាវឲ្យដល់សិស្សានុសិស្ស សូមគោរពឲ្យបានម៉ឺងម៉ាត់នូវបទបញ្ញត្តិ ដែលបានដាក់ចេញដោយក្រសួងអប់រំ ជាពិសេសត្រូវទទួលអាហារ និងដំណេកឲ្យបានគ្រប់គ្រាន់ ដើម្បីត្រៀមខ្លួនឲ្យបានល្អសម្រាប់ការប្រឡង និងត្រូវគោរពនូវវិធានការសុខាភិបាល «៣ការពារ ៣កុំ» ឱ្យបានត្រឹមត្រូវបំផុត៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ