សិប្បកម្មផលិតទឹកកកវត្តពោធិវាល ដែលបែកបំពង់ឧស្ម័នស្អុយ
ខេត្តបាត់ដំបង ៖ នេះមិនមែនជាលើកទី១ទេ ដែលប្រជាពលរដ្ឋជាច្រើនគ្រួសារនៅក្រុមទី១ ភូមិរតនៈ សង្កាត់រតនៈ ក្រុងបាត់ដំបង បានទទូចស្នើសុំទៅអាជ្ញាធរ
ខេត្តបាត់ដំបង ៖ នេះមិនមែនជាលើកទី១ទេ ដែលប្រជាពលរដ្ឋជាច្រើនគ្រួសារនៅក្រុមទី១ ភូមិរតនៈ សង្កាត់រតនៈ ក្រុងបាត់ដំបង បានទទូចស្នើសុំទៅអាជ្ញាធរ និងមន្ត្រីជំនាញជួយអន្តរាគមន៍ចាត់វិធានការ ឬរកដំណោះស្រាយ ចំពោះរោងសិប្បកម្មផលិតទឹកកកអនាម័យ វត្តពោធិវាល ដែលចេះតែបែកធ្លាយឧស្ម័ន មានក្លិនស្អុយជះទៅលើផ្ទះប្រជាពលរដ្ឋរាប់សិបគ្រួសារនៅក្បែរនោះ ។
ប៉ុន្តែរហូតមកដល់ពេលនេះ នៅតែគ្មានការឆ្លើយតបពីអាជ្ញាធរ និងមន្ត្រីជំនាញដដែល ខណៈរោងសិប្បកម្មទឹកកកនេះ នៅតែបន្តសាយភាយក្លិនស្អុយមិនឈប់ឈរ។ ប្រជាពលរដ្ឋដែលរស់នៅក្បែរនោះបាននិយាយថា រោងសិប្បកម្មផលិតទឹកកកអនាម័យ វត្តពោធិវាល នេះ បង្កបញ្ហាមិនចេះចប់ទេ ដល់អ្នករស់នៅក្បែរខាង ។ ដោយសារការបែកធ្លាយឧស្ម័នដែលមានក្លិនស្អុយ ធ្វើឲ្យប្រជាពលរដ្ឋពិបាករស់នៅបំផុត។
ពេលឧស្ម័នបែកភាយចេញម្ដងៗ ក្លិនស្អុយជះចូលដល់ក្នុងផ្ទះ ស្ទើរដកដង្ហើមមិនរួចធ្វើឲ្យវិលមុខ ថប់ដង្ហើម និងហូរទឹកភ្នែកមិនឈប់ រហូតអ្នកខ្លះត្រូវបង្ខំចិត្តបិទទ្វាផ្ទះចោល នាំកូនចៅទៅជួលសណ្ឋាគារស្នាក់នៅទាំងយប់ក៏មាន ដោយសារមិនអាចស៊ូទ្រាំនឹងក្លិនស្អុយនេះបាន។ ជាក់ស្ដែងកាលពីវេលាម៉ោង៧យប់ ថ្ងៃទី០៧មិថុនានេះ រោងសិប្បកម្មផលិតទឹកកកអនាម័យ វត្តពោធិវាល នេះ បានបង្កបញ្ហាជាថ្មីទៀត ដោយសារការបែកធ្លាយបំពង់ឧស្ម័នដែលគេហៅថា ឧស្ម័នអាម៉ូញ៉ាក់។ ឧស្ម័ននេះបានបែកសាយភាយក្លិនយ៉ាងអាសោចជះទៅលើលំនៅស្ថានប្រជាពលរដ្ឋរាប់សិបគ្រួសារនៅក្បែរនោះ បង្កឲ្យមានការភ្ញាក់ផ្អើលយ៉ាងខ្លាំង រហូតធ្វើឲ្យពលរដ្ឋមួយចំនួន វិលមុខ ក្អួត ចង្អោរ កោសខ្យល់ ឈានដល់ការជន្លៀសចេញពីលំនៅស្ថានភ្លាមៗតែម្ដង។
សូម្បីតែព្រះសង្ឃដែលគង់នៅក្នុងវត្តពោធិវាល នៅក្បែរនោះក៏រងនូវឧស្ម័នបំពុលនេះដែរ។ ស្ត្រីឈ្មោះ ភី ម៉ា អាយុ២៣ឆ្នាំ ដែលរស់នៅក្បែរសិប្បកម្មទឹកកកនេះបានប្រាប់ថា ពេលក្លិនឧស្ម័ននេះបែកសាយភាយចូលក្នុងផ្ទះគាត់ភ្លាម ធ្វើឲ្យគាត់ថប់ដង្ហើមមួយរំពេច និងវិលមុខក្អូតចង្អោរតែម្ដង។ គាត់និយាយទៀតថា អ្នកភូមិខ្លះហាក់មានអារម្មណ៍ដូចខ្យល់ចាប់ ខ្លះវិលមុខ និងខ្លះទៀតហូរទឹកភ្នែក ដែលពិបាកទ្រាំបំផុត។ ស្ត្រីរូបនេះបញ្ជាក់ថា ដោយសារតែមិនអាចស៊ូទ្រាំនឹងក្លិន ស្អុយនេះមិនបាន និងម្យ៉ាងខ្លាចជួបគ្រោះថ្នាក់ដល់អាយុជីវិត គាត់ និងក្រុមគ្រួសារបានសម្រេចបិទទ្វាផ្ទះទុកចោល រួចនាំគ្នាទៅជួលបន្ទប់សណ្ឋាគារស្នាក់នៅមួយយប់ លុះព្រឹកឡើងទើបត្រឡប់មកចូលផ្ទះវិញ។ ជុំវិញការបែកធ្លាយបំពង់ឧស្ម័ន អាម៉ូញ៉ាក់ ក្នុងរោងសិប្បកម្មផលិតទឹកកកខាងលើនេះ អ្នកទទូលខុសត្រូវបានបំភ្លឺ កាលពីថ្ងៃទី០៨ មិថុនា ដោយទទូលស្គាល់ថា រោងសិប្បកម្មរបស់ខ្លួនពិតជាមានការបែកធ្លាយបំពង់ឧស្ម័ននេះមែន តែកម្មករបានផ្សារបិទជិតវិញហើយ។
អ្នកគ្រប់គ្រងរូបនេះ មិនបានពន្យល់លម្អិតទេ ដោយគ្រាន់តែបញ្ជាក់យ៉ាងខ្លីថា ពេលនេះបិទជិត លែងមានបញ្ហាទៀតហើយ។ ទាក់ទិននឹងបញ្ហានេះដែរ កោះសន្តិភាពបានព្យាយាមសុំការបំភ្លឺពីលោក សំបូរ ផូ ប្រធានមន្ទីរឧស្សាហកម្ម និងសិប្បកម្មខេត្ត តែមិនអាចទំនាក់ទំនងបានឡើយ នៅព្រឹកថ្ងៃទី០៩ ខែមិថុនា ឆ្នាំ២០១៦នេះ។ ដោយឡែកលោក ជួប សារុណ ប្រធានមន្ទីរបរិស្ថានខេត្តវិញ បានបញ្ជាក់ប្រាប់ក្រុមអ្នកសារព័ត៌មានដោយផ្ទាល់ នៅព្រឹកថ្ងៃដដែលនេះថា លោកមិនទាន់ទទូលបានព័ត៌មាននេះនៅឡើយទេ។ លោកបានបន្ថែមថា មន្ត្រីរបស់លោកមានចំនួនតិច ប៉ុន្តែលោកនឹងបញ្ជូនមន្ត្រីជំនាញឲ្យចុះធ្វើការងារនេះនាពេលខាងមុខ។ បើតាមប្រជាពលរដ្ឋបាននិយាយថា ការបែកធ្លាយបំពង់ឧស្ម័នដែលមានក្លិនស្អុយចេញពីរោងសិប្បកម្មទឹកកកខាងលើនេះ បានកើតឡើងច្រើនលើកហើយ ហើយពលរដ្ឋក៏បានស្នើសុំទៅអាជ្ញាធរឲ្យជួយអន្តរាគមន៍ជាបន្តបន្ទាប់ដែរ តែហាក់គ្មានការឆ្លើយតប ឬជួយរកដំណោះស្រាយឡើយរហូតដល់ពេលនេះ បើទោះជាកន្លងមកអាជ្ញាធរ និងមន្ត្រីជំនាញធ្លាប់បានចុះទៅពិនិត្យដល់កន្លែងកើតហេតុក្ដី។
អ្នកភូមិបញ្ជាក់ថា ក្លិនស្អុយដែលសាយភាយចេញពីរោងសិប្បកម្មទឹកកកនេះ បានបង្កផលប៉ះពាល់ធ្ងន់ធ្ងរណាស់ដល់បរិស្ថាន ជាពិសេសប៉ះពាល់សុខភាពប្រជាពលរដ្ឋដែលនៅក្បែរនោះ។ ដូច្នេះតាមរយៈកោះសន្តិភាព ពលរដ្ឋបានទទូចស្នើសុំជាថ្មីទៀត ដល់លោកអភិបាលក្រុង លោកអភិបាលខេត្ត និងមន្ទីរពាក់ព័ន្ធទាំងអស់ មេត្តាចុះពិនិត្យ និងដោះស្រាយជួនពួកគាត់ផង។ ព្រោះប្រជាពលរដ្ឋពិបាកស៊ូទ្រាំនឹងក្លិនស្អុយដ៏អសោចនេះណាស់ ពេលបែកធ្លាយម្ដងៗ៕
ចែករំលែកព័តមាននេះ