ភ្ញៀវកិត្តិយសដែលបានអញ្ជើញទៅចូលរួមពិធីមង្គលការនៅតាមតំបន់ជនបទមួយចំនួន ឬក្មេងៗយុវវ័យសម័យបច្ចុប្បន្ន ជាពិសេសអ្នករស់នៅទីក្រុងធំៗ ប្រាកដជាមានការភ្ញាក់ផ្អើល នៅពេលដែលលោកអ្នកទទួលបានអីវ៉ាន់មួយកញ្ចប់ មានទាំង
ខេត្តសៀមរាប ៖ ភ្ញៀវកិត្តិយសដែលបានអញ្ជើញទៅចូលរួមពិធីមង្គលការនៅតាមតំបន់ជនបទមួយចំនួន ឬក្មេងៗយុវវ័យសម័យបច្ចុប្បន្ន ជាពិសេសអ្នករស់នៅទីក្រុងធំៗ ប្រាកដជាមានការភ្ញាក់ផ្អើល នៅពេលដែលលោកអ្នកទទួលបានអីវ៉ាន់មួយកញ្ចប់ មានទាំងទឹកក្រូច ស្រាបៀរ និងផ្លែឈើ ក៏ដូចជាមាន់រស់ ឬមាន់ឆ្អិនមួយក្បាលពីម្ចាស់ដើមការ នៅពេលលោកអ្នកបានប្រាប់ម្ចាស់ដើមការថា «រវល់មិនអាចនៅទទួលទានអាហារក្នុងពិធីអាពាហ៍ពិពាហ៍បាន» គឺបានត្រឹមចងចំណងដៃ ជាស្រោមសំបុត្រ ។
យ៉ាងណាមិញ ការរៀបចំអីវ៉ាន់ មានដូចជា មាន់ឆៅ១ក្បាល ឬមាន់ឆ្អិនមួយក្បាល អមជាមួយនឹងស្រាបៀរ ឬទឹកផ្លែឈើផ្សេងៗ គឺជាទំនៀមទម្លាប់តាំងពីបុរម្យបុរាណយូរលង់ណាស់មកហើយ និងមានបងប្អូននៅតាមតំបន់ជនបទមួយចំនួន នៅតែបន្តអនុវត្តនូវប្រពៃណីដ៏ផូរផង់មួយនេះ។
ជាក់ស្តែងក្នុងពិធីរៀបអាពាហ៍ពិពាហ៍មួយនៅខេត្តសៀមរាប កាលពីថ្ងៃទី២៥ ខែធ្នូ ម្សិលមិញនេះ ទទួលបានការចាប់អារម្មណ៍ជាថ្មីម្តងទៀត ជាមួយនឹងការរៀបចំអីវ៉ាន់ជូនភ្ញៀវកិត្តិយសដែលមិនបានចូលរួមពិសារភោជនីយអាហារ ។
អាពិពាហ៍ពិពាហ៍ដែលមានឪពុកម្តាយខាងប្រុស ឈ្មោះ គិម សារិទ្ធ និងអ្នកស្រី ម៉ក់ស្រី និង ឪពុកម្តាយខាងស្រីឈ្មោះ លឹម សេង និងអ្នកស្រី អឿ ចាន់ណា បានរៀបចំឱ្យកូនប្រុសឈ្មោះ ស៊ុយ រ៉ាម៉ា ជាគូរនឹងកូនស្រីឈ្មោះ សុខ ពិសី ។ អាពាហ៍ពិពាហ៍នេះធ្វើឡើងនៅល្ងាចថ្ងៃទី២៤ ខែធ្នូ ឆ្នាំ២០២១ ស្ថិតនៅក្នុងភូមិព្រៃក្មេង ឃុំខ្នាត ស្រុកពួក ខេត្តសៀមរាប ។
អ្នកស្រី លឿង គឹមហូយ អាយុ៥៧ឆ្នាំ រស់នៅភូមិព្រៃក្មេង ឃុំខ្នាត ស្រុកពួក ខេត្តសៀមរាប បានរៀបរាប់ប្រាប់ភ្នាក់ងារកោះសន្តិភាពនៅរសៀលថ្ងៃទី២៥ ខែធ្នូ ឆ្នាំ២០២១ នេះថា ការរៀបចំអាពាហ៍ពិពាហ៍នៅក្នុងស្រុកពួក តាមភូមិនីមួយៗ គឺគេរៀបចំដូចៗគ្នា អ្នកដែលយកលុយមកចងដៃ អត់បានចូលហូប ម្ចាស់កម្មវិធីការបានរៀបចំត្រឡប់មកវិញមានដូចជា៖ មាន់ឆៅ ឬ ឆ្អិន១ និងបៀរ៤កំប៉ុង និងទឹកក្រូច២ និងផ្លែឈើ២កំប៉ុង ដោយអ្នកស្រីអះអាងថា នេះជាទំនៀមទម្លាប់តាំងពីដូនតាមករហូតដល់បច្ចុប្បន្ន។
អ្នកស្រី ស៊ី ណាន រៀបរាប់ដែរថា ពិធីរៀបអាពាហ៍ពិពាហ៍នេះ ធ្វើដូចគ្នានៅក្នុងក្រុងសៀមរាប ខុសប្លែកនៅតាមភូមិ ចំពោះអ្នកដែលអត់បានចូលមកហូប យកលុយទៅចងដៃ ត្រូវបានម្ចាស់កម្មវិធីរៀបចំជាកញ្ចប់ឱ្យត្រឡប់មកផ្ទះវិញមាន ៖ មាន់ដុត ឬមាន់ឆៅចំនួន១ ថែមស្រាបៀរ៤កំប៉ុង ឬទឹកក្រូច២កំប៉ុង បើអ្នកចេះផឹកស្រាបៀរទេ ពួកគាត់អាចប្តូរយកទឹកក្រូច ឬទឹកផ្លែឈើវិញបាន។
បើតាមពីម្ចាស់កម្មវិធី ឪពុកខាងស្រី ឈ្មោះលឹម សេង និង អ្នកស្រី អឿ ចាន់ណា ដែលបានរៀបចំអាពាហ៍ពិពាហ៍ឱ្យប្រុសស្រីកាលពីថ្ងៃទី២៤ ខែធ្នូ ឆ្នាំ ២០២១ នេះថា តាមប្រពៃណីទំនៀមទម្លាប់របស់ខ្មែរពីបុរាណកាលដ៏យូរលង់ណាស់មកហើយ នៅតាមជនបទឱ្យតែដល់ពិធីរៀបចំអាពាហ៍ពិពាហ៍ តែងតែមានរៀបអាពាហ៍ពិពាហ៍ ហើយភ្ញៀវដែលចូលមកហូបអាហារក្នុងកម្មវិធីដូចធម្មតា ។
ម្ចាស់កម្មវិធីបន្តថា «ប៉ុន្តែខុសប្លែកតែមានភ្ញៀវខ្លះគាត់ចូលមកចងដៃ តែអត់ចូលញាំក្នុងតុ លោកក៏បានរៀបចំត្រឡប់ទៅវិញមានដូចជា ៖ មាន់ឆ្អិន ឬមាន់ឆៅមួយក្បាល មានស្រា៤បៀរកំប៉ុង ឬទឹកក្រូច២ និងទឹកឈើ២កំប៉ុង បើសម្រាប់អ្នកអត់ចេះពិសារស្រាបៀរ ឬអ្នកសុំសីល អាចសុំប្តូរយកទឹកក្រូច ឬទឹកផ្លែឈើបាន» ៕
ចែករំលែកព័តមាននេះ