រាជធានីភ្នំពេញ ៖ ទូរទស្សនិកជនមានឱកាសបោះឆ្នោតជ្រើសរើសជនជាតិខ្មែរ ដែលមានរូបរាងនិងមុខមាត់ដូចបេះបិទនឹងតារាភាពយន្តហុងកុង TVB ។ អ្នកដែលចូលរួមបោះឆ្នោត ក៏នឹងមានឱកាសជួបជាមួយកំពូលតារាភាពយន្តហុងកុង នៅក្នុងពិធីជួបជុំពិសេសមួយនៅស្ទូឌីយោទូរទស្សន៍ PNN វេលាម៉ោង ៥ល្ងាច ថ្ងៃទី១៩ ខែមិថុនា ២០១៦។
ការប្រឡងជ្រើសរើសអ្នកដែលមានរូបរាងនិងមុខមាត់ដូចតារាភាពយន្ត TBV បាននិងកំពុងប្រព្រឹត្តទៅជាង២ខែហើយ ដោយមានប្រជាជនខ្មែរជាច្រើនរយនាក់បានចូលរួមក្នុងការប្រឡងនេះ ដោយផ្ញើរូបថតរបស់ពួកគេមកកម្មវិធីប្រឡងនេះ ។ រូបថតទាំងឡាយត្រូវបានបង្ហោះនៅលើទំព័រហ្វេសប៊ុករបស់ PNN នៅអាសយដ្ឋាន ៖ https://www.facebook.com/PNNDramaFanClub/ ។
ទូរទស្សន៍ PNN បានចម្រាញ់យកបេក្ខជន ១០រូបពីក្នុងចំណោមអ្នកដែលបានចូលរួមនៅក្នុងដំណាក់កាលរូបភាពនៃការប្រឡង។ ឥឡូវនេះ ទូរទស្សនិកជនត្រូវបោះឆ្នោតជ្រើសរើសយក៦រូប បន្ទាប់មក បេក្ខជនទាំង៦រូប នឹងបង្ហាញខ្លួននៅលើឆាកក្នុងកម្មវិធីពិព័រណ៍ TVB-PNN ឆ្នាំ២០១៦ ដែលនឹងប្រព្រឹត្តទៅនៅថ្ងៃទី១៩ មិថុនា ខាងមុខនេះ ។
តារាភាពយន្តទូរទស្សន៍ TVB ពីររូប គឺ Nancy Wu និង Vincent Wong រួមនឹងតំណាងទូរទស្សន៍ PNN នឹងជ្រើសរើសបេក្ខជន និងបេក្ខនារីជ័យលាភីដែលដូចតារា ភាព យន្ត TVB ព្រមទាំងតារាភាពយន្តដែលសម្ដែងល្អបំផុត ។ ជ័យលាភីនឹងទទួលបានពានរង្វាន់ និងកិច្ចសន្យាការងារជាមួយស្ថានីយទូរទស្សន៍ PNN ។ កំពូលតារាភាពយន្តហុងកុង Nancy Wu និង Vincent Wong នឹងធ្វើដំណើរមកកាន់រាជធានីភ្នំពេញ ដើម្បីជួបជាមួយប្រិយមិត្តអ្នកគាំទ្រ នៅថ្ងៃទី១៩ មិថុនា ខាងមុខនេះ។
ប្រិយមិត្តទាំងឡាយដែលមានបំណងចង់ជួបជាមួយ Nancy Wu និង Vincent Wong ដោយផ្ទាល់ អាចចូលមើលព័ត៌មានលម្អិតនៅលើទំព័រហ្វេសប៊ុក https://www.facebook.com/PNNDramaFanClub/ ដើម្បីដឹងពីរបៀបទទួលបានសំបុត្រចូល ។ នៅក្នុងខ្សែភាពយន្តមួយដែលនឹងចាក់បញ្ចាំងឆាប់ៗនេះ លើកញ្ចក់ទូរទស្សន៍ PNN តារាភាពយន្ត Nancy Wu សម្ដែងជាតួឈ្មោះ Tiu Lan ក្នុងរឿង A Fist Within Four Walls។
លោក Vincent Wong ក៏ជាតារាភាពយន្តដ៏ល្បីល្បាញមិនចាញ់ នាង Nancy Wu នោះដែរ ថែមទាំងទទួលបានការគាំទ្រខ្លាំងពីប្រិយមិត្តនៅកម្ពុជាដូចគ្នា ។
Wong ល្បីល្បាញដោយមានសមត្ថភាពសម្តែងជាច្រើនក្នុងខ្សែភាពយន្តភាគបែបវាយប្រហាររបស់ TVB ។ លើសពីនេះ Wong ក៏នឹងបង្ហាញខ្លួនក្នុងខ្សែភាពយន្តភាគថ្មីរបស់ TVB រឿង Over Run Over សម្តែងជាតួអង្គ Kwan Ting Ming ដែលគ្រោងចាក់ផ្សាយលើកញ្ចក់ទូរទស្សន៍រៀងរាល់ថ្ងៃ វេលាម៉ោង៦ដល់ម៉ោង៧យប់ ចាប់ពីថ្ងៃទី ២១ មិថុនា តទៅ ។
គួររម្លឹកថា កាលពីដើមឆ្នាំ២០១៦ ស្ថានីយទូរទស្សន៍ PNN បានចុះកិច្ចព្រមព្រៀងចាក់ផ្សាយគ្រប់ខ្សែភាពយន្តភាគថ្មីរបស់ TVB កំពុងដាក់បញ្ចាំងក្នុងទីក្រុងហុងកុង ។ កម្មវិធីពិព័រណ៍ TVB-PNN ជាមួយតារាភាពយន្ត Nancy Wu និង Vincent Wong នឹងប្រព្រឹត្តទៅនៅថ្ងៃទី១៩ ខែមិថុនា វេលាម៉ោង៥ល្ងាច នៅស្ទូឌីយោPNN ព្រែកព្នៅ ។ លោកអ្នកអាចមើល https://www.facebook.com/PNNDramaFanClub/ ដើម្បីដឹងពីរបៀបបានសំបុត្រចូលទស្សនា ៕
ចែករំលែកព័តមាននេះ