ប្រទេសចិន ៖ ចិនបានសន្យាកាលពីថ្ងៃទី៧ មិថុនាថា នឹងទប់ស្កាត់លើទិន្នផលដែកដែលមានចំនួនលើសលប់ និងធ្វើការជាមួយសហ-រដ្ឋអាមេរិក ដើម្បីបង្កើតកិច្ចសហប្រតិបត្តិការក្នុងការដាក់ទណ្ឌកម្មប្រឆាំងនឹងកូរ៉េខាងជើង ប៉ុន្តែមិនទាន់មានតម្រុយពីដំណើរការលើភាពតានតឹងក្នុងសមុទ្រចិនខាងត្បូងនៅឡើយ ។
ការសន្យានេះ ត្រូវបានធ្វើឡើងខណៈដែលចិន និងអាមេរិកបានចូលរួមកិច្ចប្រជុំសន្ទនាស្តីពីសេដ្ឋកិច្ច និងយុទ្ធសាស្ត្រប្រចាំឆ្នាំ ក្នុងរយៈពេល២ថ្ងៃ ។
ជាមួយគ្នានេះ ទីក្រុងប៉េកាំងបានយល់ព្រមលើការគ្រប់គ្រងផលិតកម្មដែកដែលផ្គត់ផ្គង់លើសកម្រិត ដើម្បីចៀសវាងការធ្លាក់ថ្លៃប្រកួតប្រជែងប្រាក់យន់ និងទប់ស្កាត់សហគ្រាសដែលមិនបានទទួលប្រាក់ចំណេញសោះ ។ ក្នុងនោះភាគីទាំងសងខាងបានស្វាគមន៍ការវិនិយោគពីប្រទេសផ្សេងផងដែរ ។
« ចិនក៏បានទទូចលើការកែប្រែរចនាសម្ព័ន្ធសេដ្ឋកិច្ចរបស់ខ្លួន ក្នុងការបើកវិស័យហិរញ្ញវត្ថុ នៅក្រុមហ៊ុនសហរដ្ឋអាមេរិកផងដែរ » ។ នេះបើតាមប្រសាសន៍របស់អគ្គលេខាធិការរតនាគារអាមេរិក លោក Jack Lew ។
អនុរដ្ឋមន្ត្រីការបរទេស លោក Zheng Zeguang បានថ្លែងថា ៖ « ភាគីទាំងសងខាង នឹងបោះជំហានលើកិច្ចសហប្រតិបត្តិការប្រឆាំងនឹងអំពើពុករលួយ ព្រមទាំងធ្វើសមយុទ្ធយោធាបន្ថែម ហើយពួកគេក៏បានពិចារណាលើការពង្រឹងការដាក់ទណ្ឌកម្មប្រឆាំងនឹងកូរ៉េខាងជើងផងដែរ » ។
ប៉ុន្តែពួកគេបានជំទាស់លើការលុបបំបាត់អាវុធនុយក្លេអ៊ែរនៃឧបទ្វីបកូរ៉េ ។ អាមេរិកចង់ដាក់សម្ពាធលើក្រុងព្យុងយ៉ាង ខណៈដែលចិននៅតែទទូចលើការពិភាក្សាឡើងវិញ និងជំទាស់ជាដាច់ខាតលើការដាក់ច្បាប់ប្រឆាំងនឹងប្រព័ន្ធប្រឆាំងមីស៊ីលនៅកូរ៉េខាងត្បូង ។
ប្រទេសទាំងពីរ ក៏បានពិភាក្សាលើជម្លោះនៅក្នុងសមុទ្រចិនខាងត្បូងផងដែរ បើទោះបីជាមានការប្តេជ្ញាចិត្តក្នុងការកែប្រែច្បាប់ ខ្យល់អាកាស និងផ្ទៃទឹកឲ្យកាន់តែប្រសើរក្តី ។
ក្រុមប្រឹក្សារដ្ឋ លោក Yang Jiechi បានប្រាប់អគ្គលេខាធិការអាមេរិក លោក John Kerry ថា ៖ « ចិនមានសិទ្ធិការពារបូរណភាពទឹកដីរបស់ខ្លួន ហើយនៅតែប្រកាន់ជំហរមិនចូលរួមដោះស្រាយជាអន្តរជាតិលើជម្លោះនេះឡើយ។ ចិនសង្ឃឹមថា អាមេរិកនឹងគោរពតាមកិច្ចសន្យារបស់ខ្លួន ក្នុងការមិនចូលរួមលើជម្លោះពាក់ព័ន្ធ ហើយដើរតួជាអ្នករក្សាសុវត្ថិភាព និងស្ថិរភាពនៅក្នុងសមុទ្រចិនខាងត្បូង » ។
លោក John Kerry បានអំពាវនាវឱ្យអ្នកទាមទារទាំងអស់ ធ្វើយ៉ាងណាចៀសវាង «សកម្មភាពជាឯកតោភាគី ដែលអាចត្រូវបានចាត់ទុកដោយនរណាម្នាក់ផ្សេងទៀតដើម្បីឱ្យមានការបង្កហេតុ» ។
លោក Ashley Townshend អ្នកស្រាវជ្រាវនៅមជ្ឈមណ្ឌលសិក្សាអាមេរិកនៃសាកលវិទ្យាល័យស៊ីដនី បានថ្លែងថា៖« កិច្ចសន្ទនានៅឆ្នាំនេះមានសភាពខ្សោយ ដោយសារតែរដ្ឋាភិបាល លោក បារ៉ាក់ អូបាម៉ា ជិតដល់អាណត្តិ ហើយការខ្វែងគំនិតគ្នាកាន់តែកើនឡើង » ។
ប៉ុន្តែលោក John Kerry បានឱ្យដឹងថា ៖ « កិច្ចសន្ទនា គឺជាការបង្ហាញពីលទ្ធផលល្អបំផុត ដែលលោកបានចូលរួមកន្លងមក ។ លោកគិតថា វាជាការងារដែលល្អក្នុងការជួយដល់ការផលិតរបស់ប្រទេស G20 និងជាការងារមួយដែលល្អប្រសើរ ខណៈដែលប្រធានាធិបតីទាំងពីររបស់យើងបានជួបពិភាក្សាគ្នាក្នុងរយៈពេលពីរបីខែ » ។
លោក Zhu Guangyao អនុរដ្ឋមន្ត្រីក្រសួងហិរញ្ញវត្ថុ បានឲ្យដឹងថា ៖ « ចំនួននៃកិច្ចព្រមព្រៀងសេដ្ឋកិច្ចដែលបានធ្វើលើកនេះ គឺជាចំនួនដ៏ខ្ពស់បំផុតក្នុងរយៈពេល១០ឆ្នាំនេះ» ៕
ចែករំលែកព័តមាននេះ