ប្រទេសវៀតណាម ៖ ការទូទាត់ប្រាក់តាមប្រព័ន្ធអេឡិចត្រូនិករបស់វៀតណាមកើនឡើងកាន់តែខ្លាំង ដែលបានបន្ថែមតម្លៃ៨៨០លានដុល្លារទៅលើផលិតផលក្នុងស្រុកសរុប(GDP) របស់វៀតណាម ចាប់តាំងពីឆ្នាំ២០១១
ប្រទេសវៀតណាម ៖ ការទូទាត់ប្រាក់តាមប្រព័ន្ធអេឡិចត្រូនិករបស់វៀតណាមកើនឡើងកាន់តែខ្លាំង ដែលបានបន្ថែមតម្លៃ៨៨០លានដុល្លារទៅលើផលិតផលក្នុងស្រុកសរុប(GDP) របស់វៀតណាម ចាប់តាំងពីឆ្នាំ២០១១ ដល់ឆ្នាំ២០១៥ ។ នេះបើយោងតាមរបាយការណ៍បានចុះផ្សាយដោយក្រុមហ៊ុនMoody’s ។
របាយការណ៍មានចំណងជើងថា ៖ «ឥទ្ធិពលនៃការបង់ប្រាក់តាមប្រព័ន្ធអេឡិចត្រូនិកទៅលើកំណើនសេដ្ឋកិច្ច» បានឲ្យដឹងថា Credit Card, Debit Card និង Prepaid Cards ត្រូវបានគេប្រើប្រាស់កាន់តែខ្លាំងឡើងគួរឲ្យកត់សម្គាល់ ដែលបានបង្កើតការងារជាមធ្យមចំនួន៧៥.០០០ការងារប្រចាំឆ្នាំ នៅក្នុងរយៈពេល៥ឆ្នាំ ។
របាយការណ៍របស់ក្រុមហ៊ុន Moody’s បង្ហាញថា ក្នុងចំណោមបណ្តាប្រទេសអាស៊ាន វៀតណាម គឺជាប្រទេសដែលមានកំណើនផលិតផលក្នុងស្រុកសរុបខ្ពស់ជាងគេទី២ ដោយសារតែការទូទាត់ប្រាក់តាមប្រព័ន្ធអេឡិចត្រូនិកបានកើនឡើង ។ ចំណែកប្រទេសសិង្ហបុរីជាប់លេខ៣ ខណៈប្រទេសថៃជាប់លេខ១ ។ ម្យ៉ាងទៀត ការបង់ប្រាក់តាមប្រព័ន្ធអេឡិចត្រូនិកបានផ្តល់អត្ថប្រយោជន៍ដល់រដ្ឋាភិបាល និងចូលរួមចំណែកដល់ស្ថិរភាព និងបង្កបរិយាកាសបើកអាជីវកម្ម ។
របាយការណ៍បានបង្ហាញទៀតថា ការបង់ប្រាក់តាមប្រព័ន្ធអេឡិចត្រូនិកបានជួយកាត់បន្ថយសេដ្ឋកិច្ចដែលកំពុងពឹងផ្អែកលើសាច់ប្រាក់សុទ្ធ ។ សរុបមក ការបង់ប្រាក់តាមប្រព័ន្ធអេឡិចត្រូនិកបានផ្តល់នូវប្រាក់ចំណូលពន្ធដ៏មានសក្តានុពលខ្ពស់សម្រាប់រដ្ឋាភិបាល ខណៈវាធ្វើឲ្យការចំណាយលើការគ្រប់គ្រងសាច់ប្រាក់ទាប ធានាការបង់ប្រាក់ដល់ឈ្មួញ និងផ្តល់ហិរញ្ញវត្ថុកាន់តែប្រសើរឡើងដល់អ្នកប្រើប្រាស់ទាំងឡាយ ។
ការបង់ប្រាក់តាមរយៈប្រព័ន្ធអេឡិចត្រូនិក កំពុងតែអភិវឌ្ឍន៍យ៉ាងខ្លាំងក្លានៅក្នុងប្រទេសវៀតណាម រួមមាន Master Card និង Visa Card ។ រីឯការប្រើប្រាស់ Visa Card សម្រាប់ប្រតិបត្តិការសរុបបានកើនឡើង៣៤%កាលពីឆ្នាំមុន ខណៈការប្រើប្រាស់ម៉ាស៊ីនឆូតកាតរបស់ក្រុមហ៊ុនបានកើនឡើង៣៨% ។
ការលក់តាមអនឡាញដោយប្រើប្រាស់ VISA Cards ក៏បានកើនឡើងគួរឲ្យកត់សម្គាល់ផងដែរក្នុងកំណើន៤៧% ។ ទន្ទឹមនឹងនេះ ប្រជាជនវៀតណាមជាង៤៥លាននាក់បានភ្ជាប់សេវាអីុនធើរណេតកាលពីពេលថ្មីៗនេះ ៕
ចែករំលែកព័តមាននេះ