សក់ជាផ្នែកមួយដែលជួយលើកសម្រស់លើផ្ទៃមុខរបស់មនុស្សគ្រប់រូបជាពិសេសគឺស្ត្រី។ សរសៃសក់រលោងភ្លឺថ្លានិងស្រស់ស្អាតគឺជានិមិត្តរូបនៃសុខុមាលភាពរាងកាយ ។ ទន្ទឹមនឹងការថែរក្សាយ៉ាងយកចិត្តទុកដាក់តាមរយៈនៃការប្រើប្រាស់ផលិតផលផ្សេងៗ(សាប៊ូកក់…) គេក៏អាចទទួលបានសក់រលោងភ្លឺថ្លាផងដែរតាមរយៈអាហារប្រចាំថ្ងៃ ។ អាហារទាំងនោះមានដូចជា ៖
១- ត្រីសូម៉ុង ៖ ត្រីជាអាហារដែលផ្តល់ឱ្យនូវសុខភាពដ៏ច្រើនមហិមាក្នុងនោះសូម៉ុងគឺជាត្រីផ្តល់អត្ថប្រយោជន៍ដល់សក់ ។ ខ្លាញ់ត្រីប្រភេទនេះសម្បូរទៅដោយអាស៊ីដខ្លាញ់អូមេហ្គា-៣ វីតាមីន B12 និងសារធាតុដែក ។ សរុបបញ្ចូលគ្នា សមាសធាតុទាំងនេះអាចធ្វើឱ្យសរសៃសក់របស់អ្នករស់រវើកនិងភ្លឺរលោង ។ អាស៊ីដខ្លាញ់អូមេហ្គា-៣សំខាន់ខ្លាំងណាស់ក្នុងការថែរក្សាស្បែកក្បាលឱ្យមានសុខភាពល្អ ។ ដូច្នេះ បើយើងខ្វះសារធាតុនេះនឹងនាំឱ្យស្បែកក្បាលស្ងួត សរសៃសក់មិនរស់ និងមិនរលោងភ្លឺថ្លា ។
២-ស៊ុតនិងសាច់មាន់ ៖ ជារឿយៗ បណ្តាអ្នកឯកទេសខាងចំណីអាហារតែងតែចង់ឱ្យគ្រប់ៗគ្នាទទួលទានស៊ុតនិងសាច់មាន់ដើម្បីបង្កើនប្រូតេអុីនក្នុងរាងកាយ។ សក់និងក្រចកត្រូវបានបង្កើតពីប្រូតេអុីន ។ និយាយជារួម ការទទួលទានសាច់មាន់និងស៊ុតជំរុញឱ្យសក់ដុះក្រាស់ក៏ដូចជាទប់ស្កាត់ការជ្រុះសក់និងការដាច់សក់ ។ ស៊ុតត្រូវគេដឹងថា សម្បូរដោយវីតាមីនក្រុម B(B12 &B7) ។ ឯសាច់មាន់ដែលសម្បូរដោយប្រូតេអុីនជួយធ្វើឱ្យសរសៃសក់ស្វិតនិងមិនងាយដាច់ ។
៣-សាច់គោនិងងាវ ៖ អាហារទាំង២មុខនេះសម្បូរទៅដោយសារធាតុស័ង្កសីដែលមានអត្ថប្រយោជន៍ជួយឱ្យសក់ដុះបានក្រាស់ ។ ខ្វះសារធាតុនេះនឹងនាំឱ្យសក់ជ្រុះ ។ បន្ថែមពីនេះទៀត សារធាតុស័ង្កសីក៏អាចជួយការពារមិនឱ្យសក់ឆាប់ប្រែពណ៌ផងដែរ ។
៤-ផ្លែ Walnut និង Almonds៖ ជាពពួកផ្លែឈើដែលសម្បូរក្រាស់ក្រៃដោយអាស៊ីដអូមេហ្គា-៣និងស័ង្កសី ។
៥-ប្រភេទសណ្តែកម្យ៉ាង Lentils៖ សណ្តែកប្រភេទនេះសម្បូរទៅដោយអាស៊ីដហ្វូលិច ។ វាជាអាស៊ីដចាំបាច់បំផុតក្នុងការជួសជុលឡើងវិញនូវសុខភាពរបស់បណ្តាកោសិកាឈាមក្រហមដែលមាននាទីផ្គត់ផ្គង់អុកស៊ីសែនយ៉ាងច្រើនដល់ស្បែកនិងស្បែកក្បាល ។ លើសពីនេះទៀត វាក៏សំខាន់ណាស់ដែរសម្រាប់ការដុះលូតលាស់របស់សក់ ។
៦-ការ៉ុត ៖ មនុស្សគ្រប់គ្នាដឹងយ៉ាងច្បាស់ថា ការ៉ុតជាប្រភពវីតាមីន A ។ វាមាននាទីសំខាន់ក្នុងការបង្កើតជាតិប្រេង (Sebum) ក្នុងស្បែកក្បាល ។ Sebum សំខាន់ណាស់ក្នុងការរក្សាស្បែកក្បាលនិងសក់ឱ្យមានសំណើម ។ ការផលិតជាតិប្រេង Sebum មានតិចនឹងនាំឱ្យស្បែកក្បាលកើតអង្គែ សក់ស្រួយ ។
ក្រៅពីអាហារខាងលើ គេគួរតែដាក់បញ្ចូលវីតាមីន C ក្នុងរបបអាហារប្រចាំថ្ងៃផងដែរដ្បិតវាចាំបាច់ខ្លាំងណាស់ក្នុងការស្រូបយកសារធាតុស័ង្កសី ។ ទឹកក៏អាចជួយឱ្យស្បែកក្បាលមានសំណើមនិងរក្សាសក់ឱ្យមានសុខភាពល្អ ភ្លឺរលោងផងដែរ ៕
ចែករំលែកព័តមាននេះ