ខេត្តកំពង់ស្ពឺ ៖ ស្របពេលដែលប្រមុខរាជរដ្ឋាភិបាលបានបញ្ជាឱ្យមានការស៊ើបអង្កេតលើករណីរំលោភដីព្រៃរបស់រដ្ឋពីសំណាក់អ្នកមានលុយ និងមានអំណាចនៅខេត្តជាប់បឹងទន្លេសាប រហូតមានការឃាត់ខ្លួនបុគ្គលដែលរំលោភទាំងនោះចាត់វិធានការតាមផ្លូវច្បាប់ និងដកហូតដីព្រៃយកមកទុកជាសម្បត្តិរដ្ឋវិញ ។
ដោយឡែក នៅខេត្តកំពង់ស្ពឺឯណេះវិញ ករណីរំលោភដីព្រៃរបស់រដ្ឋតាមរយៈរូបភាពទិញលក់ពីពលរដ្ឋក៏កំពុងកើតមានស្ទើរគ្រប់កន្លែងក្នុងស្រុកឱរ៉ាល់ តែមិនទាន់ឃើញអាជ្ញាធរ និងជំនាញពាក់ព័ន្ធចាត់វិធានការលើបុគ្គលទាំងនោះនៅឡើយទេ ។ជាក់ស្តែង ដីព្រៃរបស់រដ្ឋររាប់រយហិកតាដែលស្ថិតនៅចំណុច (សុរិយា) ស្ថិតក្នុងភូមិថ្មី ឃុំយាសាល ស្រុកឱរ៉ាល់ ខេត្តកំពង់ស្ពឺ បច្ចុប្បន្នត្រូវគេដឹងថា មេឈ្មួញឈើ និងបក្សពួកមានទាហាននិងប៉ូលិសឈូសឆាយកា.ប់ទន្ទ្រានយកដីព្រៃនៅចំណុចខាងលើនិងបោះបង្គោលព្រំចែកគ្នាលក់ជាបន្ដបន្ទាប់ រហូតកើតមានជម្លោះប្តឹងប្តល់គ្នាទៀតផង ។
ទាក់ទិនទៅនឹងការទន្ទ្រានចូលកាន់កា.ប់ដីរបស់រដ្ឋខាងលើនេះ ប្រជាពលរដ្ឋអ្នករស់នៅភូមិថ្មីឃុំតាសាល ស្រុកឱរ៉ាល់ បានអះអាងឲ្យដឹងថា ដីនៅតំបន់នោះ គឺជាដីស្ថិតក្រោមការគ្រប់របស់ដែនជំរកសត្វព្រៃភ្នំឱរ៉ាល់ ដែលមានលោកហ៊ុល ម៉ារា ជា ប្រធាន។ ក្នុងនោះ ពលរដ្ឋមិនដែលហ៊ានចូលកាប់គាស់ ដើម្បីធ្វើស្រែចំការនោះ ព្រោះមានការហាមឃាត់ពីសំណាក់មន្ត្រីបរិស្ថាននៅតំបន់នោះ បើអ្នកណាហ៊ានចូលច្បាស់ជាត្រូវចាប់បង្ក្រាបជាមិនខាន ។
ស្រាប់តែមកដល់ពេលនេះ លេចឮថា ដីនៅតំបន់នោះមានតំម្លៃក៏ឃើញមានឈ្មោះ ណុបឌី មេឈ្មួញឈើ ប្រចាំស្រុកឱរ៉ាល់និងឈ្មោះពៅ ជាយោធាខាងអធិការកិច្ចពាក់ផ្កាយ១និងឈ្មោះ ផេងម៉ានីត នាយផ្នែករដ្ឋបាលសរុបការិយាល័យទី៨ ព្រមទាំងលោកស្នងការរងខេត្តកំពង់ឹស្ពឺជាច្រើនរូប និងកូនចៅ ក្រោមឱវាទផងបាន យកគ្រឿងចក្រមកឈូសឆាយ ទន្ទ្រានដីព្រៃរបស់រដ្ឋ និងបោះបង្គោលព្រំររបងចែកគ្នាលើដីដីព្រៃរបស់រដ្ឋដែលពួកគេឈូសចែកគ្នាដោយគ្មានញញើតច្បាប់សូម្បីបន្តិច។
ប្រជាពលរដ្ឋនិយាយបន្តថា ក្រុមពួកខាងលើនេះ តែងតែដើរទន្ទ្រានកាប់ដីព្រៃម្ដុំចំណុច (សុរិយា) លក់ជាបន្ដបន្ទាប់ ពុំមានអាជ្ញាធរ និងមន្ត្រីជំនាញពាក់ព័ន្ធណាមួយទៅហាមឃាត់ឡើយគឺគេលក់ដូរតែគ្មាគេប៉ុណ្ណោះ ។ បញ្ហានេះប្រជាពលរដ្ឋសំណូមពរទៅក្រុមប្រឹក្សាខេត្ត ជាពិសេសគណ:កម្មការគ្រប់គ្រងដីរដ្ឋ និងទទួលបន្ទុកដីព្រៃរបស់រដ្ឋ លោកអភិបាល នៃគណៈអភិបាលខេត្ត និងមន្ត្រីជំនាញពាក់ព័ន្ធ សូមមេត្តាចុះស្រាវជ្រាវស៊ើបអង្កេតលើក្រុមបក្សពួកជនខិលខូចនោះ កុំឲ្យដើរកា.ប់ទន្ទ្រានយកដីបែបអនាធិបតេយ្យតាមតែទំនើងចិត្តដូច្នេះទៀត ។
ពាក់ព័ន្ធការទន្ទ្រានដីរដ្ឋខាងលើនេះដែរ លោកណុប ឌី ដែលជាមេខ្លោងក្នុងការឈូសរំលោភដីព្របស់រដ្ឋនេះបានអះអាងដែរថា ដីនៅតំបន់ខាងលើនោះ គឺជាដីរបស់ខ្លួនដែលទិញពីពលរដ្ឋមានការទទួលស្គាល់ពីអាជ្ញាធរផងដែរ ។ ទាក់ទិននឹងបញ្ហានេះដែរ មន្ត្រីរដ្ឋបាលស្រុកមួយរូបបានអះអាងដោយសុំលាក់ឈ្មោះថា ពេលនេះ ដីនៅចំណុចខាងលើកំពុងមានជម្លោះគ្នារវាងឈ្មោះពៅ ជាទាហាននៅអធិការកិច្ច និងឈ្មោះចែ ឌីណា ជាមេឈ្មួញឈើប្រចាំស្រុកឱរ៉ាល់ ដោយសារតែឈ្មោះពៅអះអាងថា ចែឌីណា បានយកដីរបស់គាត់ចំនួន១០ហិកតាទៅលក់អោយមន្ត្រីនគរបាលខេត្តកំពង់ស្ពឺក្នុង១ហិកតា២៥០០ដុល្លារ។
មន្ត្រីដដែលបន្តថា មកដល់ពេលនេះនៅមិនទាន់ឃើញមានពាក្យបណ្តឹងមកដល់សាលាស្រុកនៅឡើយទេ ព្រោះសុទ្ឋតែជាជម្លោះក្រៅច្បាប់ព្រោះជាដីព្រៃរបស់រដ្ឋ ។ កន្លងមក ជំនាន់លោកអភិបាលចាស់ ខាងអាជ្ញាធរស្រុកធ្លាប់បានចុះទៅធ្វើការហាមឃាត់ជាច្រើនលើកកន្លងមកហើយ ប៉ុន្តែក្រុមមនុស្សទាំងនោះមានទាំងនគរបាលនិងយោធាដែលជាអ្នករួមគំនិតជាមួយឈ្មោះណុបឌី រស់នៅភិមិដំបងវេញឃុំសង្កែសាទបស្រុកឱរ៉ាល់ នៅតែចូលទៅកា.ប់ទន្ទ្រានបោះបង្គោលរបង ហ៊ុមព័ទ្ធ ដីនៅតំបន់នោះដដែល រហូត ដល់មានជម្លោះប្រកែកគ្នាកើតឡើង។
ក្នុងអំឡុងពេលឈូសឆាយនោះទៀតសោត តាមព័ត៌មានដែលអាជ្ញាធរទទួលបាន គឺពេលឈូសគេឃើញលោកប្រធានអង្គការមួយដែលមានតួនាទីការពារដីព្រៃរបស់រដ្ឋចុះទៅតំបន់នោះបំរុងចាប់ឃាត់គ្រឿងចក្រដែរ តែឈ្មូញបានបញ្ជាអោយកូនចៅបើកគ្រឿងចក្រទៅលាក់ទុកនៅក្នុងព្រៃមាត់ស្ទឹងរហូតបណ្តាលអោយទឹកហូរចូលម៉ាសុីនខូចគ្រឿងចក្រនោះទៀតផង។ក្រោយមក មិនដឹងថាយ៉ាងមិចទៀតទេស្រាប់តែគេយកគ្រឿងចក្រថ្មីទៅឈូសហើយក៏មិនឃើញវត្តមានលោកប្រធានអង្គការនោះចូលទៅឃាត់គ្រឿងចក្រដូចមុនទៀតដែរ។
ពលរដ្ឋរស់នៅតំបន់ខាងលើបានសំណូមពរដល់អាជ្ញាគ្រប់ជាន់ថ្នាក់ ជា ពិសេស ជំនាញបរិស្ថាន សូមមេត្តាចាត់វិធានការលើបុគ្គលដែលហ៊ានរំលោភដីព្រៃរបស់រដ្ឋយកទៅលក់និងដកហូតដីដែលគេឈូសរំលោភយកទុកជាសម្បត្តិរដ្ឋវិញផងម្យ៉ាងដើម្បីទុកជាជំរកសត្វព្រៃ។ពលរដ្ឋសង្ឃឹមយ៉ាងមុតមាំថាគណ:កម្មការគ្រប់គ្រងដីរដ្ឋព្រមទាំងអាជ្ញាធរនឹងមិនព្រងើយកន្តើយចំពោះរឿងនេះទេ ព្រមទាំងមានវិធានការឃាត់ខ្លួនក្រុមមនុស្សទាំងនោះចាតើវិធានការតាមផ្លូវច្បាប់ជាក់ជាមិនខាន។ អ្វីដែលពលរដ្ឋដឹងនៅពេលនេះគឺក្រុមមនុស្សទាំងនោះកំពុងសហការគ្នាជាមួយអាជ្ញាធរនិងជំនាញដើម្បីរៀបចំឯកសារសុំកាត់ឆ្វៀលចេញទៀតផងហើយពួកគេបានយកដើមឈើធំៗទៅដាំដើម្បីអោយមើលឃើញថាពួកគេកាន់កាប់យូរមកហើយ ។
ទាក់ទិនករណីនេះដែរ លោក ឌុល សុខុម មេឃុំតាសាល បានប្រាប់និងទទួលស្គាល់តាមទូរស័ព្ទថា«លោកទទួលដឹងរឿងការទិញលក់ពិតជាអាជ្ញាធរភូមិឃុំដឹងលឺប្រាកដមែន ចំណែករឿងឈូសឆាយអាជ្ញាធរភូមិឃុំមិនបានដឹងថានោះទេ គឺគេត្រូវរ៉ូវគ្នាជាមួយបរិស្ថានដែលឈរជើងនៅតំបន់នោះ ហើយភាគច្រើនគេលួចឈូសនៅពេលយប់ ករណីនេះលោកនឹងចាត់ក្រុមការងារចិះទៅពិនិត្យ» ។ ចំណែកលោកងួនវាសនា អភិបាលស្រុកឱរ៉ាល់និងលោកហ៊ុលម៉ារា នាយកដែនជំរកសត្វព្រៃភ្នំឱរ៉ាល់មិនអាចសុំការពន្យល់បានទេ ។
ព័ត៌មានបន្ថែមនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ