រាជធានីភ្នំពេញ ៖ ក្រុមហ៊ុន LION CORPORATION (THAILAND) LTD ដែលជាក្រុមហ៊ុនមួយផលិតហ្វូមដុសខ្លួន «ស៊ូគូប៊ូស៊ុ» និងផលិតផលកុមារ «កូដូម៉ុ» បានបង្កើតយុទ្ធនាការសប្បុរសធម៌មួយដែលមានឈ្មោះថា 3L ដោយបាននាំយកថវិកាចំនួន៣៦លានរៀលមកជូនមន្ទីរពេទ្យគន្ធបុប្ផា រាជធានីភ្នំពេញ ដើម្បីឱ្យមន្ទីរពេទ្យនេះមានលទ្ធភាពបន្តជួយសង្គ្រោះជីវិតកុមារកម្ពុជា ។ ការប្រគល់ និងទទួលថវិកានេះធ្វើឡើងកាលពីថ្ងៃទី០២ មិថុនា ២០១៦ នៅក្នុងមន្ទីរពេទ្យផ្ទាល់ ដោយមានអ្នកសារព័ត៌មានជាច្រើនស្ថាប័នចូលរួមផ្តិតយកព្រឹត្តិការណ៍នេះផងដែរ ។
ការបរិច្ចាគនេះ ត្រូវបានរួមសហការគ្នារតាមរយ: អ្នកគាំទ្រទំព័រហ្វេសប៊ុករបស់ «ស៊ូគូប៊ូស៊ុ» និង «កូដូម៉ុ» ដែលបានបង្កើតហ្គេមឱ្យអ្នកគាំទ្ររបស់ខ្លួនចូលរួមលេងនៅលើហ្វេសប៊ុក និងបន្ត tag មិត្តភក្តិ ដើម្បីបង្កើនថវិកាជួយដល់មន្ទីរពេទ្យ ពោលគឺនៅពេលដែលអ្នកលេងហ្គេម tag មិត្តភក្តិរបស់ខ្លួនកាន់តែច្រើន ក្រុមហ៊ុនក៏បន្ថែមថវិកាសម្រាប់បរិច្ចាគកាន់តែច្រើនដូចគ្នា។ ជាការកត់សម្គាល់សង្កេតឃើញថា «ស៊ូគូប៊ូស៊ុ»និង«កូដូម៉ុ»រីករាយក្រៃលែងដែលបានរួមចំណែកមួយផ្នែកជួយលើកកម្ពស់ និងជំរុញការរស់នៅរបស់កុមារកម្ពុជាឱ្យមានភាពល្អប្រសើរជាងមុន។
តំណាងក្រុមហ៊ុនបានឱ្យដឹងថា ដោយសារមើលឃើញពីស្ថានភាពកុមារកម្ពុជា រងគ្រោះដោយសារជំងឺផ្សេងៗចូលមកសម្រាកនៅក្នុងមន្ទីរពេទ្យគន្ធបុប្ផា នៅតែមានចំនួនច្រើន ទើបក្រុមហ៊ុនសម្រេចនាំយកថវិកានេះ មកប្រគល់ជូនមន្ទីរពេទ្យ ដើម្បីឱ្យមន្ទីរពេទ្យអាចបន្តសកម្មភាពរបស់ខ្លួនក្នុងការជួយកុមារកម្ពុជាឱ្យរួចផុតពីជំងឺផ្សេងៗ ។
ជាការឆ្លើយតបតំណាងមន្ទីរពេទ្យគន្ធបុប្ផា ក៏បានថ្លែងអំណរគុណដល់ក្រុមហ៊ុន LION CORPORATION (THAILAND) LTD ដែលបានចូលរួមសកម្មភាពមនុស្សធម៌ ជាពិសេសចូលរួមចំណែកជួយសង្គ្រោះកុមារកម្ពុជាជាច្រើនដែលមកសម្រាក និងព្យាបាលជំងឺនៅក្នុងមន្ទីរពេទ្យគន្ធបុប្ផា ៕
ចែករំលែកព័តមាននេះ