រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឱ្យដឹងថា ទោះក្នុងបរិបទកូវីដ-១៩ រាលត្បាតក្តី តែកម្ពុជាទទួលបានគម្រោងវិនិយោគថ្មីចំនួន ១៩៥ គម្រោង និងគម្រោងពង្រីកផលិតកម្មចំនួន ៤៣ គម្រោង ដែលអាចបង្កើតការងារបានរហូតដល់ជាង ១៥ ម៉ឺននាក់ ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវ: ក្នុងកិច្ចប្រជុំលើកទី ៦ របស់គណៈកម្មការអន្តរក្រសួង បានឱ្យដឹងថា រាជរដ្ឋាភិបាល ក៏ដូចជាក្រសួង ស្ថាប័នពាក់ព័ន្ធ បានសម្រេចនូវសមិទ្ធផលជាច្រើន ជាពិសេសក្នុងការបង្ការទប់ស្កាត់ការរីករាលដាលជំងឺកូវីដ-១៩ ។
ជាមួយគ្នានេះលោករដ្ឋមន្ត្រីបានស្នើសុំភាគីពាក់ព័ន្ធ បង្កើនការយកចិត្តទុកដាក់បន្ថែមទៀត ដើម្បីធ្វើការផ្លាស់ប្តូរ និងលើកស្ទួយរចនាសម្ព័នឧស្សាហកម្ម ពីឧស្សាហកម្មអតិពលកម្ម ទៅជាឧស្សាហកម្មពលកម្មផ្អែកលើជំនាញនៅឆ្នាំ ២០២៥ ក៏ដូចជាការលើកកម្ពស់ការប្រកួតប្រជែង និងផលិតភាព សំដៅប្រែក្លាយពីឧស្សាហកម្មមានតម្លៃបន្ថែមទាប ទៅជាឧស្សាហកម្មដែលមានតម្លៃបន្ថែមខ្ពស់ ស្របតាមគោលនយោបាយជាតិអភិវឌ្ឍន៍វិស័យឧស្សាហកម្ម ឆ្នាំ ២០១៥-២០២៥ ។
«ប្រទេសយើងបានរងការគំរាមកំហែងយ៉ាងធ្ងន់ធ្ងរពីវិបត្តិនៃជំងឺកូវីដ-១៩ ដែលប៉ះពាល់ដល់សេដ្ឋកិច្ច និងសង្គម និងជាឧបសគ្គរារាំងក្នុងការអនុវត្តសកម្មភាពលើគ្រប់វិស័យក៏ដោយ ក្រសួង ស្ថាប័នពាក់ព័ន្ធនៅតែខិតខំបំពេញតួនាទីរបស់ខ្លួនប្រកប ដោយស្មារតីទទួលខុសត្រូវដើម្បីសម្រេចបាននូវគោលបំណងជាសសរស្តម្ភទាំងបីនៃគោលនយោបាយ ដូចជាការបង្កើនឱកាសការងារសមរម្យ និងមានផលិតភាពការងារខ្ពស់ ការលើកកម្ពស់ការអភិវឌ្ឍជំនាញ និងធនធានមនុស្ស និងការពង្រឹងអភិបាលកិច្ចទីផ្សារការងារផងដែរ» នេះជាការបញ្ជាក់របស់លោករដ្ឋមន្ត្រី អ៊ិត សំហេង ។
ក្រៅពីការលើកឡើងរបស់លោករដ្ឋមន្ត្រីក្រសួងការងារនេះ កន្លងមកគេសង្កេតឃើញថា ក្រុមប្រឹក្សាអភិវឌ្ឍន៍កម្ពុជា បានផ្សព្វ ផ្សាយពីការអនុម័តគម្រោងវិនិយោគថ្មីៗជាបន្តបន្ទាប់ លើវិស័យនានា ដែលអាចបង្កើតឱកាសការងារ ប្រាក់ចំណូលដល់ប្រជាពលរដ្ឋកម្ពុជា ។ មិនតែប៉ុណ្ណោះ ក្នុងវិបត្តិកូវីដ-១៩ នេះការនាំចេញផលិតផលរបស់កម្ពុជាទៅកាន់ទីផ្សារអន្តរជាតិក៏នៅតែមានកំណើនខ្ពស់ពិសេសផលិតផលកសិកម្ម ៕
ចែករំលែកព័តមាននេះ