ខេត្តសៀមរាប ៖ ម៉ាន់នីហ្គ្រាម (MoneyGram) ដែលជាក្រុមហ៊ុនអន្តរជាតិផ្តល់សេវាផ្ទេរប្រាក់ប្រកបដោយការច្នៃប្រឌិតថ្មី និងអង្គការខែរីងហ្វ័រខេមបូឌា (CFC) ជាអង្គការមិនរកប្រាក់ចំណេញដែលមានមូលដ្ឋាននៅសហរដ្ឋអាមេរិក
ខេត្តសៀមរាប ៖ ម៉ាន់នីហ្គ្រាម (MoneyGram) ដែលជាក្រុមហ៊ុនអន្តរជាតិផ្តល់សេវាផ្ទេរប្រាក់ប្រកបដោយការច្នៃប្រឌិតថ្មី និងអង្គការខែរីងហ្វ័រខេមបូឌា (CFC) ជាអង្គការមិនរកប្រាក់ចំណេញដែលមានមូលដ្ឋាននៅសហរដ្ឋអាមេរិក នាថ្ងៃទី២៦ និងទី២៧ ឧសភា ២០១៦ បានរៀបចំសិក្ខាសាលារយៈពេលពីរថ្ងៃនៅខេត្តសៀមរាប ដើម្បីបង្ហាញពីសមិទ្ធផលនៃគម្រោងផ្តួចផ្តើមស្តីពីការអប់រំដែលស្ថាប័នទាំងពីរនេះបានចូលរួមជាមួយគ្នា។
កម្មវិធីថ្មីបង្រៀនភាសាអង់គ្លេសជាភាសាទីពីរ (ESL) និងកម្មវីធីវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) មានការរៀបចំកម្មវិធីប្រកបដោយការច្នៃប្រឌិតថ្មី និងបង្ហាញនូវការផ្លាស់ប្តូរទាំងស្រុងពីកម្មវិធី ESL ពីមុន។ ក្រោមការអនុវត្តដោយអង្គការ CFC និងការឧបត្ថម្ភទាំងស្រុង ដោយអង្គការមូលនិធិ MoneyGram គម្រោងផ្តួចផ្តើមនេះ ទទួលបានការគាំទ្រពីរាជរដ្ឋាភិបាលកម្ពុជា។ ក្នុងឆ្នាំសាកល្បងដំបូង កម្មវិធីនេះ មានគោលបំណងជួយឧបត្ថម្ភកុមារចំនួនជាង៦០០នាក់នៅក្នុងសាលាប្រាំ ក្នុងចំណោមសាលាទាំង២១របស់អង្គការ CFC នៅទូទាំងខេត្តសៀមរាប។
ក្នុងអំឡុងពេលសិក្ខាសាលានៅបឋមសិក្សា និងវិទ្យាល័យអារញ្ញសាគរ ក្នុងភូមិអារញ្ញ សង្កាត់សៀមរាប ខេត្តសៀមរាប នេះ មន្ត្រីរដ្ឋាភិបាល គ្រូបង្រៀនក្នុងមូលដ្ឋាន អង្គការមិនមែនរដ្ឋាភិបាល និងអ្នកតំណាងរបស់ក្រុមហ៊ុនសេវាផ្ទេរប្រាក់ MoneyGram មានឱកាសទទួលបានបទពិសោធន៍ផ្ទាល់ពីអត្ថប្រយោជន៍នៃការប្រើប្រាស់គំរូនៃការបណ្តុះបណ្តាលគ្រូលក្ខណៈអន្ដរជាតិ ដែលឈ្នះពានរង្វាន់របស់អង្គការ CFC ។
លោក ចាកេលីន ឡូវ (Jacqueline Lowe) ប្រធានអង្គការមូលនិធិ MoneyGram បានមានប្រសាសន៍ថា គោលបំណងរបស់សិក្ខាសាលានេះ គឺដើម្បីបំប៉នសិស្សកម្ពុជារាប់ពាន់នាក់នូវចំណេះដឹងបានមកពីការអនុវត្តន៍ជាសកលដ៏ល្អបំផុតនៅក្នុងវិស័យបច្ចេកវិទ្យាព័ត៌មាន កម្មវិធី STEM និងESL។ ជំនាញដែលទទួលបាននៅក្នុងវិស័យទាំងនេះត្រូវបានគេចាត់ទុកថា ជាជំនាញដ៏មានសារសំខាន់ខ្លាំងក្នុងការប្រយុទ្ធប្រឆាំងនឹងភាពក្រីក្រ និងការផ្តល់លទ្ធភាពដល់ប្រជាពលរដ្ឋកម្ពុជា ដែលតស៊ូដើម្បីធានាភាពមានការងារធ្វើនៅក្នុងប្រទេសជិតខាងដូចជា ថៃ វៀតណាម និងហ្វីលីពីន។
លោកបានបញ្ជាក់ថា «ឱកាសការងារដែលមានសម្រាប់ប្រជាពលរដ្ឋកម្ពុជា បានកើនឡើងយ៉ាងខ្លាំងគួរឲ្យកត់សម្គាល់ បន្ទាប់ពីការដាក់បញ្ចូលប្រទេសកម្ពុជាទៅក្នុងសហគមន៍សេដ្ឋកិច្ចនៃសមាគមប្រជាជាតិអាស៊ីអាគ្នេយ៍ (អាស៊ាន) កាលពីចុងឆ្នាំ២០១៥ ។ គំរូផ្អែកលើការពិសោធន៍ជាមូលដ្ឋានរបស់អង្គការ CFC សម្រាប់ការបង្រៀនជួយធានាថា យុវជនកម្ពុជារាប់ពាន់នាក់នឹងត្រូវបានបំពាក់បំប៉ននូវជំនាញភាសា បច្ចេកទេស និងជំនាញ STEM ដើម្បីប្រកួតប្រជែងនៅក្នុងបរិបទសេដ្ឋកិច្ចដែលបានធ្វើសមាហរ័ណកម្មថ្មីៗនេះ។ ទាំងអង្គការ CFC និងអង្គការមូលនិធិ MoneyGram មានការប្តេជ្ញាចិត្តក្នុងការផ្តល់លទ្ធភាពដល់កុមារទាំងនេះតាមរយៈការអប់រំ»។
កម្មវិធីបណ្តុះបណ្តាលគ្រូបង្រៀនរបស់អង្គការ CFC បានចាប់ផ្តើមក្នុងឆ្នាំ២០០៤ ក្រោមកិច្ចសហការជាដៃគូប្រកបដោយការច្នៃប្រឌិតថ្មីរវាងគ្រូបង្រៀនកម្ពុជា និងគ្រូបង្រៀនបរទេស ដែលមានមូលដ្ឋាននៅប្រទេសសិង្ហបុរី។ អ្នកជំនាញដែលមានបទពិសោធន៍បានត្រួសត្រាយបង្កើតកម្មវិធីនេះ ដោយធ្វើការជាក្រុមដើម្បីអភិវឌ្ឍ និងផ្តល់ការបណ្តុះបណ្តាលផ្ទាល់នៅតាមបណ្តាសាលារបស់អង្គការ CFC។ នៅឆ្នាំ២០០៧ កម្មវិធីនេះ បានបន្ថែមនូវទស្សនកិច្ចសិក្សាប្រចាំឆ្នាំក្នុងប្រទេសសិង្ហបុរី។ នៅឆ្នាំ២០០៨ អង្គការ CFC បានតែងតាំងនាយកផ្នែកបណ្តុះបណ្តាលគ្រូបង្គោល ដើម្បីត្រួតពិនិត្យកម្មវិធីនេះ និងបណ្តុះបណ្តាលគ្រូបង្រៀនដែលគេហៅថាគ្រូបង្គោល។
គ្រូបង្គោលត្រូវបានជ្រើសរើសទៅតាមលក្ខណសម្បត្តិជាអ្នកដឹកនាំ និងជំនាញបង្រៀនក្នុងថ្នាក់ជាក់ស្តែង។ គម្រោងផ្តួចផ្តើមនេះ ជំរុញឲ្យមានការអភិវឌ្ឍវិជ្ជាជីវៈ និងអាជីពដែលធ្វើឲ្យសាលារៀនរបស់អង្គការ CFC ខុសដាច់ពីគេ និងជ្រើសតាំងគ្រូរបស់ខ្លួនចាប់ពីសាលាមត្តេយ្យរហូតដល់វិទ្យាល័យជាអ្នកតំណាងពីការផ្លាស់ប្តូរក្នុងវិស័យអប់រំនៅកម្ពុជា។ ក្នុងឆ្នាំ២០១០ អង្គការខែរីងហ្វ័រខេមបូឌា ត្រូវបានទទួលស្គាល់ដោយអាជ្ញាធរមូលដ្ឋាន និងបានផ្តល់ពានរង្វាន់កម្រិតខ្ពស់បំផុតដល់បុគ្គលដែលមិនមែនជាជនជាតិកម្ពុជា ពោលគឺពានរង្វាន់ដៃមាស។
អង្គការមូលនិធិ MoneyGram បានបង្កើតមូលនិធិ MoneyGram នៅឆ្នាំ២០១២ ដើម្បីជួយដល់កុមារនៅជុំវិញពិភពលោក ទទួលបានលទ្ធភាពចូលរៀននៅតាមបណ្តាគ្រឹះស្ថានអប់រំនានា និងចូលមើលឯកសារសិក្សាជាច្រើន។ បេសកកម្មរបស់អង្គការនេះ មានជំនឿយ៉ាងមុតមាំថា ការអប់រំ គឺជាគន្លឹះទទួលបានឱកាសសេដ្ឋកិច្ចល្អប្រសើរ គ្រួសារមានសុខភាពល្អ និងសេរីភាពបុគ្គល និងការពង្រឹងលទ្ធភាពបុគ្គល។ អង្គការមូលនិធិ MoneyGram បានផ្តោតទៅលើការលើកទឹកចិត្តគំនិត និងលើកកម្ពស់ជីវភាពរស់នៅ និងផ្តល់មូលនិធិដល់បណ្តាអង្គការដែលសមនឹងទទួលបានការឧបត្ថម្ភដែលមានបេសកកម្មនេះដូចគ្នា។
លោក អ៊ុង សាវី ប្រធានប្រចាំប្រទេសនៃអង្គការខែរីងហ្វ័រខេមបូឌា (Caring for Cambodia) បានមានប្រសាសន៍ថា អង្គការខែរីងហ្វ័រខេមបូឌា គឺជាអង្គការសប្បុរសធម៌ក្រៅរដ្ឋាភិបាលមិនស្វែងរកប្រាក់ចំណេញដែលមានការិយាល័យកណ្តាលនៅសហរដ្ឋអាមេរិក និងកំពុងបំពេញការងារនៅក្នុងខេត្តសៀមរាប ប្រទេសកម្ពុជា។ អង្គការ CFC សហការជាមួយរាជរដ្ឋាភិបាលកម្ពុជា ដើម្បីផ្តល់ការអប់រំដល់កុមារចំនួនជាង៦.៦០០នាក់ជារៀងរាល់ឆ្នាំ តាមរយៈការអនុវត្តដ៏ល្អបំផុតតាមស្តង់ដាអន្តរជាតិក្នុងវិស័យអប់រំ។ អង្គការ CFC ក៏ផ្តល់នូវការឧបត្ថម្ភដល់ការសិក្សា រួមបញ្ចូលទាំងអាហារដែលមានជីវជាតិ ការអប់រំសុខភាព ឯកសណ្ឋាន សៀវភៅសិក្សា កង់ និងការបណ្តុះបណ្តាលបំណិនជីវិត។ រយៈពេលជាង១៤ឆ្នាំមកហើយ អង្គការ CFC បានជួយប្រជាពលខ្មែរមួយជំនាន់ជំនះលើឧបសគ្គនៃកេរ្តិ៍ដំណែលនៃការប្រល័យពូជសាសន៍ដែលបំផ្លិចបំផ្លាញខ្ទេចខ្ទី និងផលវិបាករបស់វា។ ជាមួយនឹងការអប់រំត្រឹមត្រូវ និងជំនាញប្រចាំសតវត្សរ៍ទី២១ ពួកគេកំពុងអភិវឌ្ឍខ្លួនទៅជាភ្នាក់ងារនៃការផ្លាស់ប្តូរដែលមានសមត្ថភាពដឹកនាំប្រទេស និងតំបន់របស់ពួកគេឆ្ពោះទៅរកអនាគតកាន់តែត្រចះត្រចង់ថែមទៀត។
លោក អ៊ុង សាវី បានបន្តឱ្យដឹងទៀតថា អង្គការ Caring For Cambodia បានប្រារព្ធកម្មវិធីសិក្ខាសាលាស្តីអំពីការបង្រៀនភាសាអង់គ្លេស ក៏ដូចជាការបង្រៀនបច្ចេកវិទ្យាព័ត៌មាន និងសារគមនាគមន៍ (ICT) និង STEM ក្នុងគោលបំណងឲ្យសិស្សមានសមត្ថភាពរៀនភាសាបរទេសគ្រប់គ្រាន់សម្រាប់ប្រាស្រ័យទាក់ទងស្រាវជ្រាវ និងបន្តការសិក្សារបស់ពួកគេ ក៏ដូចជាឲ្យសិស្សមានសមត្ថភាពខាងបច្ចេកវិទ្យាព័ត៌មាន និងសារគមនាគមន៍។ បច្ចេកវិទ្យាព័ត៌មាន និងសារគមនាគមន៍ផ្តល់នូវសមត្ថភាពមូលដ្ឋានដល់ពួកគេសម្រាប់ប្រើប្រាស់កុំព្យូទ័រ និងបច្ចេកវិទ្យាព័ត៌មានក្នុងការសិក្សា និងការរស់នៅប្រចាំថ្ងៃ ដើម្បីឆ្លើយតបនឹងក្របខណ្ឌកម្មវិធីសិក្សាអប់រំចំណេះទូទៅ និងអប់រំបច្ចេកទេស របស់ក្រសួងអប់រំ យុវជន និងកីឡា។
សិក្ខាសាលានាពេលនេះផ្តោតទៅលើ ១-ប្រសិទ្ធភាពនៃការបង្កើតកិច្ចតែងការបង្រៀនភាសាអង់គ្លេស។ ២-ការបង្រៀនភាសាអង់គ្លេសតាមបែបវិធីសាស្ត្រសិស្សមជ្ឈមណ្ឌល។ ៣-ការបង្រៀនបច្ចេកវិទ្យាព័ត៌មាន និងសារគមនាគមន៍ ICT ក្នុងថ្នាក់ភាសាអង់គ្លេស។ ៤-ការបង្រៀនអង់គ្លេសឆ្លងភូមិសិក្សា ពីបឋមទៅកាន់មធ្យមសិក្សា។ ៥-ការបង្រៀនភាសាអង់គ្លេសសម្រាប់កុមារតូច។ ៦-លទ្ធផលដំបូងនៃកម្មវិធីសិក្សាភាសាអង់គ្លេស។ ៧-សកម្មភាពស្រាវជ្រាវលើការបង្រៀនភាសាអង់គ្លេស។ ៨-ការស្រាវជ្រាវធនធាន សម្ភារសម្រាប់ការរៀបចំថ្នាក់ ក៏ដូចជាការបង្រៀនភាសាអង់គ្លេស។ ៩-ស្វែករកតុល្យភាពក្នុងការប្រើប្រាស់ភាសាខ្មែរ និងអង់គ្លេស ក្នុងការបង្រៀនភាសាអង់គ្លេស និង១០-ការផលិតសម្ភារឧបទេសសម្រាប់ថ្នាក់ភាសាអង់គ្លេស។
លោក កុល ស៊ីណាត អ្នកសម្របសម្រួលកម្មវិធីភាសាអង់គ្លេសនៃអង្គការ Caring For Cambodia បានមានប្រសាសន៍ថា គម្រោងប្រមាណជាង៤ម៉ឺនដុល្លារអាមេរិក ក្នុងដំណាក់កាលដំបូងដែលឧបត្ថម្ភដោយម៉ាន់នីហ្គ្រាម នឹងជួយបណ្តុះបណ្តាលគ្រូបង្គោលភាសាអង់គ្លេស និងពង្រឹងសមត្ថភាពភាសាអង់គ្លេសដល់សិស្សានុសិស្សជាង៦០០នាក់ នៅសាលាបឋមសិក្សាចំនួន៥ នៅខេត្តសៀមរាប ដែលក្នុងនោះនៅសាលាបឋមសិក្សាអារញ្ញសាគរមានប្រមាណ១០០នាក់។
ចំណែកលោកស្រី អ៊ុក ច័ន្ទដា នាយិការងវិទ្យាល័យអារញ្ញសាគរ បានចាត់ទុកថា គម្រោងជួយឧបត្ថម្ភរបស់ម៉ាន់នីហ្គ្រាម មានសារសំខាន់ណាស់ ដែលកុមារនឹងទទួលបានមូលដ្ឋានភាសាអង់គ្លេស ងាយស្រួលក្នុងការសិក្សាបន្តទៅវិទ្យាល័យ និងជាគ្រឹះសម្រាប់ពង្រឹងសមត្ថភាពការសិក្សា។
ក្រុមហ៊ុនសេវាផ្ទេរប្រាក់ MoneyGram International, Inc. គឺជាក្រុមហ៊ុនអន្តរជាតិដែលផ្តល់សេវាផ្ទេរប្រាក់ និងទូទាត់ប្រាក់ប្រកបដោយការច្នៃប្រឌិតថ្មី និងត្រូវបានទទួលស្គាល់ទូទាំងពិភពលោកថា ជាបណ្តាញភ្ជាប់ទំនាក់ទំនងផ្នែកហិរញ្ញវត្ថុទៅកាន់មិត្តភក្តិ និងក្រុមគ្រួសារ។ ទោះជាតាមបណ្តាញអនឡាញ ឬតាមរយៈឧបករណ៍ចល័តនៅតាមតូប ឬនៅក្នុងហាងក្នុងមូលដ្ឋាន យើងភ្ជាប់ទំនាក់ទំនងជាមួយអតិថិជនតាមវិធីណាមួយដែលងាយស្រួលសម្រាប់ពួកគេ។ យើងក៏ផ្តល់ជូននូវសេវាទូទាត់វិក្កយបត្រ ចេញអាណត្តិប្រាក់ និងរៀបចំទូទាត់មូលប្បទានប័ត្រផ្លូវការនៅទីផ្សារមួយចំនួន៕
ចែករំលែកព័តមាននេះ