រាជធានីភ្នំពេញ ៖ ក្រោយដណ្ដើមបានជើងឯកក្នុងការប្រកួតកីឡាម៉ូតូទឹក ពានរង្វាន់អន្ដរជាតិកម្រិតអាស៊ី Jet Ski Pro Tour
រាជធានីភ្នំពេញ ៖ ក្រោយដណ្ដើមបានជើងឯកក្នុងការប្រកួតកីឡាម៉ូតូទឹក ពានរង្វាន់អន្ដរជាតិកម្រិតអាស៊ី Jet Ski Pro Tour 2021 នៅប្រទេសថៃ លើវិញ្ញាសា Pro Am Ski Modified កីឡាករម៉ូតូទឹកជម្រើសជាតិកម្ពុជា សាលី អ៊ូមើត បានបង្ហាញអារម្មណ៍រំភើបជាមួយនឹងមោទនភាពយ៉ាងខ្លាំងសម្រាប់ការទទួលជោគជ័យនាពេលនេះ ។
ក្រោយទទួលបានពានរង្វាន់ជើងឯក សាលី អ៊ូមើត បានបញ្ជាក់ថា ព្រឹត្តិការណ៍នេះ បែងចែកការប្រកួតជា៤ជុំ ដោយចាប់ផ្ដើមប្រកួតតាំងពីចុងខែតុលា ហើយបញ្ចប់ការប្រកួតជុំទី៤ កាលពីថ្ងៃទី១៨-១៩ ខែធ្នូនេះ។ ក្នុងការប្រកួតជុំនីមួយៗ លោកធ្វើបានយ៉ាងល្អ ដោយគ្រងចំណាត់ថ្នាក់លេខ១ចំនួន៣ជុំ លើកលែងតែជុំទី២ ដោយសារម៉ូតូទឹកខូច ធ្វើឲ្យលោកទទួលបានត្រឹមលេខ៤។
ទោះជាយ៉ាងណាក្រោយបញ្ចប់ការប្រកួតទាំង៤ជុំ សរុបពិន្ទុ លោករកបានពិន្ទុច្រើនជាងគេ និងទទួលបានចំណាត់ថ្នាក់លេខ១ ។
លោកពិតជាមានមោទនភាព និងសប្បាយរីករាយយ៉ាងខ្លាំង ដែលរូបលោកបានក្លាយជាម្ចាស់ជើងឯកពានរង្វាន់កម្រិតអាស៊ីមួយនេះ ពិសេសបានកសាងកេរ្ដិ៍ឈ្មោះ និងកិត្តិយសជូនជាតិ ។ លោកនឹងបន្ដការខិតខំបន្ថែមទៀត ដើម្បីត្រៀមការប្រកួតអន្ដរជាតិផ្សេងៗនាពេលខាងមុខ។
គួរឱ្យដឹងផងដែរថា ព្រឹត្តិការណ៍Jet Ski Pro Tour 2021មួយនេះ មានកីឡាករជម្រើសជាតិម៉ូតូទឹកកម្ពុជា៥រូបចូលរួម និងប្រកួត៣វិញ្ញាសាផ្សេងគ្នា ក្នុងនោះកីឡាករ ម៉ីន មូស្ដាន ដែលប្រកួតវិញ្ញាសា Pro Am Ski Modified ជាមួយរាមច្បង សាលី អ៊ូមើត ទទួលបានចំណាត់ថ្នាក់លេខ៣ ។ រីឯ៣នាក់ទៀត រួមមានកីឡាករ កៃ វ៉ាន់ស៊ីដែន និងសាលី ហ្វីលីន ទទួលបានចំណាត់ថ្នាក់លេខ៥ ដូចគ្នា លើវិញ្ញាសាស្គីឈរ និងស្គីអង្គុយ ខណៈកីឡាករ មីន អូស្មាន ទទួលបានលេខ៦។
សាលី អ៊ូមើត បានបន្ថែមថា ក្រោយបញ្ចប់ព្រឹត្តិការណ៍នេះ កីឡាករកម្ពុជាទាំង៥រូប នឹងមានបេសកកម្មដ៏សំខាន់មួយទៀត គឺការប្រកួតកម្រិតពិភពលោក Jet Ski World Series 2021-2022 ជុំទី៣ នៅប្រទេសថៃ នាពាក់កណ្ដាលខែមករាឆ្នាំ២០២២ ខាងមុខ ដែលមានកីឡាករប្រមាណ ៦០ប្រទេសចូលរួម ។ សម្រាប់ការប្រកួត២ជុំដំបូង នៅប្រទេសប៉ូឡូញ និងអាមេរិក កីឡាករកម្ពុជា ពុំបានចូលរួមនោះទេ ដោយសារបញ្ហាស្នើសុំទិដ្ឋាការយឺតយ៉ាវ។ តែយ៉ាងណា ពួកគេនឹងចូលរួមការប្រកួតជុំទី៣នេះ ដើម្បីពង្រឹងសមត្ថភាពត្រៀមឆ្ពោះទៅស៊ីហ្គេម ឆ្នាំ២០២៣ នៅកម្ពុជា៕
ចែករំលែកព័តមាននេះ