សេដ្ឋកិច្ចពិភពលោកកំពុងតែប្រឈមនឹងហានិភ័យ ដោយសារតែវាមានកំណើនខ្សោយ ប្រសិនបើរដ្ឋាភិបាលនៃប្រទេសនានាមិនចំណាយលើការវិនិយោគដើម្បីបង្កើតពាណិជ្ជកម្មបន្ថែម និងធ្វើកំណែទម្រង់ទេនោះ ។ នេះបើតាមការដាស់តឿននៅក្នុងវេទិកាសេដ្ឋកិច្ចកំពូល ។
អង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) បានឲ្យដឹងនៅក្នុងរបាយការណ៍ថា ទស្សនវិស័យសេដ្ឋកិច្ចសកលមានភាពទុទ្ទិដ្ឋិនិយម ហើយត្រូវបានគេកាត់បន្ថយការព្យាកររបស់ខ្លួនពីកំណើនសេដ្ឋកិច្ចនេះ។ ទស្សនវិស័យនៃសេដ្ឋកិច្ចពិភពលោកមានកំណើនខ្សោយនេះ វាបានក្លាយជាស្ថានភាពដ៏រ៉ាំរ៉ៃទៅហើយ ។
« ភាពជាប់គាំងនូវកំណើនសេដ្ឋកិច្ចខ្សោយនេះ បានធ្វើឲ្យលុបបំបាត់នូវការរំពឹងទុក »។ នេះបើតាមប្រសាសន៍របស់លោក Angel Gurria អគ្គលេខាធិការទូទៅនៃ OECD ។
OECD បានលើកឡើងថា បណ្តាក្រុមហ៊ុនជាច្រើនមានការប្រុងប្រយ័ត្នលើការវិនិយោគ ដោយពួកគេងាកទៅរកវិនិយោគលើផ្នែកច្នៃប្រឌិត និងផលិតកម្ម ។ ជាលទ្ធផល ពលរដ្ឋមានទុទ្ទិដ្ឋិនិយមកាន់តែខ្លាំងលើការងារនាពេលអនាគត ។ ចំណែកការចំណាយអ្នកប្រើប្រាស់ កាន់តែខ្សោយទៅៗ ហើយក្រុមហ៊ុនជាច្រើនបានឆ្លើយតបថា វាមានសញ្ញាអវិជ្ជមាន ។
ទោះបីជាសេដ្ឋកិច្ចអាមេរិកបានរីកចម្រើនក្នុងរយៈពេលប៉ុន្មានឆ្នាំនេះក្តី ក៏មហាអំណាចសេដ្ឋកិច្ចទី២ គឺប្រទេសចិនហាក់មានកំណើនខ្សោយ ដោយសារតែជាប្រភពប្រើប្រាស់ដ៏ធំនៃថាមពល និងវត្ថុធាតុដើម ក៏ដូចជាអ្នកនាំចេញដ៏ធំ និងជាអ្នកប្រើប្រាស់ដ៏សំខាន់ផងដែរ ដែលបញ្ហានេះធ្វើឲ្យមានការព្រួយបារម្ភដល់ស្ថានភាពសេដ្ឋកិច្ចសកលលោកទាំងមូល ។
រីឯការរើបឡើងវិញនៃសេដ្ឋកិច្ចសហភាពអឺរ៉ុបបានធ្លាក់ចុះជាថ្មីម្តងទៀត ខណៈដែលប្រទេសជប៉ុនស្ថិតក្នុងសភាពត្រដាបត្រដួស។ ចំណែកទីផ្សារសកលភាវូបនីយកម្មវិញ គឺកំពុងតែដោះស្រាយជាមួយនឹងការប្រែប្រួលនៃរូបិយប័ណ្ណ បំណុលកាន់តែខ្ពស់ និងតម្លៃទំនិញនាំចេញធ្លាក់ចុះ ជាក់ស្តែង នៅប្រទេសប្រេស៊ីល និងរុស្ស៊ីតែម្តង ។
OECD បានបង្ហាញថា ប្រទេសទាំងនោះបានពឹងផ្អែកលើធនាគារកណ្តាលច្រើនពេកក្នុងការបង្កើនតម្រូវការ ។ ទោះជាយ៉ាងណា ពួកគេគួរតែក្រឡេកមើលការពង្រឹងផ្នែកវិនិយោគសាធារណៈ និងបង្កើតការប្រកួតប្រជែងសេដ្ឋកិច្ចបន្ថែមទៀតតាមរយៈការធ្វើកំណែទម្រង់រចនាសម្ព័ន្ធ ។
OECD បានព្យាករថា កំណើនសេដ្ឋកិច្ចសកលនឹងមានអត្រា៣%នៅក្នុងឆ្នាំនេះ និងមានអត្រា៣,៣%នៅឆ្នាំបន្ទាប់ ។ អត្រាទាំងពីរនេះបានធ្លាក់ចុះ០,៣% នៃការព្យាករកាលពីខែវិច្ឆិកា កន្លងមក ៕
ចែករំលែកព័តមាននេះ