រាជធានីភ្នំពេញ ៖ អតីតកញ្ញាឯកលេខ២ ប្រចាំទស្សនាវដ្តី នាឆ្នាំ២០០៩ គឺនាងប្រាថាត់ ច័ន្ទដាលីស បានបណ្តែតជីវិតចូលប្រឡូកនៅក្នុងវិស័យសិល្បៈសម្តែង។ នាងមានឪពុកឈ្មោះឃួន រតនា ម្តាយឈ្មោះសែម សុផលនារី ។ បងប្អូនរបស់នាងមាន៦នាក់ ក្នុងនោះប្រុស៣នាក់ ចំណែករូបនាងជាកូនទី៥ ។
ដាលីស ធ្លាប់ចូលរួមសម្តែងកាយវិការខារ៉ាអូខេឱ្យផលិតកម្មក្នុង និងក្រៅប្រទេសមួយចំនួនដូចជាផលិតកម្ម M រស្មីហង្សមាស និងមហាហង្សជាដើម ។ ក្រៅពីនេះនាងធ្លាប់សម្តែងក្នុងខ្សែភាពយន្តរឿង «ឆ្អែតចិត្ត» ជារឿងភាគដែលចាក់ផ្សាយតាមកញ្ចក់ទូរទស្សន៍អប្សរាកន្លងមក។
នាងប្រាថាត់ ច័ន្ទដាលីស មានគូស្នេហ៍ជាអ្នកជំនួញវ័យ៣០ឆ្នាំ និងមានងារជាឧកញ៉ា។ នាងជួបស្នេហានេះ កាលពីចុងឆ្នាំ ២០១០ ។ នាងនិយាយថា នាងស្រឡាញ់គ្នាជាមួយអ្នកជំនួញនោះ មិនទាន់បានរៀបការទេ ប៉ុន្តែបានរស់នៅជាមួយគ្នារហូតមានផ្ទៃពោះ៣ខែ ប៉ុន្តែកាលពី២ខែមុន កូនក្នុងផ្ទៃរបស់នាងបានរលូតបាត់។ មូលហេតុនៃការរលូតកូននេះនាងបង្ហើបឱ្យដឹងថា មកពីនាងពាក់ស្បែកជើងកែងចោតខ្ពស់ ហើយក្រឡាច់ដួល ។
ដាលីសនិយាយថា ទាំងរូបនាងនិងគូស្នេហ៍មានការសោកស្តាយបំផុត ពេលជួបគ្រោះថ្នាក់ដោយចៃដន្យបែបនេះ ។ នាងបញ្ជាក់ថា ពេលមានផ្ទៃពោះនាងមិនមានគម្រោងរៀបការទេ គឺគ្រាន់តែចង់ចុះសំបុត្រអាពាហ៍ពិពាហ៍ប៉ុណ្ណោះ ប៉ុន្តែក្រោយពីកូនក្នុងផ្ទៃនាងរលូនបាត់ នាងមានបំណងចង់រៀបការវិញ គឺប្រហែលជានៅឆ្នាំ២០១២ ។
ទំនាក់ទំនងស្នេហារួមរស់ជាមួយគ្នាមិនបានរៀបការនេះ នាងបញ្ជាក់ថា រូបនាងនិងសង្សាររបស់នាងស្រឡាញ់គ្នាណាស់ ហើយឪពុកម្តាយទាំងសងខាងក៏ពេញចិត្តគ្នាទៅវិញទៅមកផងដែរ ៕
ចែករំលែកព័តមាននេះ