រាជធានីភ្នំពេញ ៖ សមាគមសហគ្រិនស្ត្រីកម្ពុជា បានកំពុងចងក្រងសៀវភៅ ដែលនិយាយពីមុខជំនួញរបស់សហគ្រិនស្ត្រីនៅកម្ពុជា។ សៀវភៅ ស នេះនឹងមានបញ្ចូលនូវបញ្ហាប្រឈមនានា របស់ស្ត្រីនៅក្នុងការប្រកបមុខរបរ ដើម្បីរកដោះស្រាយ ពីក្រសួង-ស្ថាប័នពាក់ព័ន្ធផងដែរ ។ បើតាមប្រភពថា បញ្ហាស្ត្រីក្នុងជំនូញដែលនឹងបង្ហាញក្នុងសៀវភៅ ស នោះមានមានដូចជា ៖ បញ្ហាការបើកច្រកទីផ្សារ ឱកាសទទួលបានហិរញ្ញប្បទាន និងការបណ្តុះបណ្តាលជំនាញឌីជីថលជាដើម ។
លោកស្រី កែវ មុំ សមាគមសហគ្រិនស្ត្រីកម្ពុជា បានលើកឡើងពីគម្រោងបង្កើតសៀវភៅ ស នេះនៅក្នុងជំនួបពិភាក្សាការងារជាមួយមន្ត្រីជាន់ខ្ពស់ក្រសួងពាណិជ្ជកម្ម លោកស្រី តឹករ៉េត កំរង រដ្ឋលេខាធិការ និងបានស្នើសុំនូវទិន្នន័យអ្នកផលិត និងផលិត ផល ពីក្រសួងពាណិជ្ជកម្ម ដើម្បីដាក់បញ្ចូលក្នុងសៀវភៅសនោះ សម្រាប់ជាការជួយជំរុញការផ្សព្វផ្សាយពីផលិតផលខ្មែរ ផងដែរ ។
ស្ត្រីនៅកម្ពុជាត្រូវគេដឹងថា បានគ្រប់គ្រងអាជីវកម្ម សហគ្រាសខ្នាតតូចបំផុត ខ្នាតតូច និងមធ្យម ច្រើនជាងបុរស ប៉ុន្តែគេបានមើលឃើញថា ការគ្រប់គ្រងអាជីវកម្មកម្រិតតូចនេះ បានធ្វើឡើងតៗគ្នា គ្មានបញ្ជីស្នាមស្តីហិរញ្ញវត្ថុច្បាស់លាស់ ដែលធ្វើឱ្យអ្នករកស៊ីជាស្ត្រីពិបាកទទួលបានការគាំទ្រហិរញ្ញវត្ថុពីធនាគារ និងប្រភពទុននានា ។ កន្លងមកដើម្បីជំរុញកិច្ចការនេះ សមាគមសហគ្រិនស្ត្រីកម្ពុជា បានចុះហត្ថលេខាលើកិច្ចសហប្រតិបត្តិជាមួយវិស័យធនាគារផងដែរ ដើម្បីជំរុញការផ្តល់ប្រាក់កម្ចីដល់សហគ្រិនស្ត្រី ។
លោកស្រី កែវ មុំ ធ្លាប់បានជំរុញដល់វិស័យធនាគារ អនុគ្រោះនៅក្នុងការផ្តល់ឥនទានដល់សហគ្រិនស្ត្រីដើម្បីពង្រីកមុខរបរក្នុងនោះមានការផ្តល់កម្ចីឱ្យលើសទ្រព្យបញ្ចាំជាដើម ។
លោកស្រី តឹករ៉េត កំរង បានលើកឡើងថា រាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការ បានកំពុងខិតខំប្រឹងប្រែងគាំទ្រដល់សហគ្រាសខ្នាតមីក្រូ តូច និងមធ្យម (MSMEs) ដែលជាកម្លាំងចលករជំរុញកំណើនសេដ្ឋកិច្ចកម្ពុជា តាមរយៈការរៀបចំច្បាប់ និងបទបញ្ញត្តិថ្មីៗ និងការបើកច្រកទីផ្សារ តាមរយៈកិច្ចព្រមព្រៀងពាណិជ្ជកម្មសេរីក្រោមក្របខណ្ឌពហុភាគី តំបន់ និងទ្វេភាគី ដែលកម្ពុជាសម្រេចបាន ។ លោកស្រីបានបញ្ជាក់ថា ក្រសួងបាននឹងកំពុងពង្រឹងកិច្ចការបណ្តុះបណ្តាល និងកសាងសមត្ថភាពដល់អ្នកពាក់ព័ន្ធជាពិសេសស្ត្រីនៅក្នុងវិស័យធុរកិច្ច និងកំពុងខិតខំជំរុញសកម្មភាពពាណិជ្ជកម្មតាមប្រព័ន្ធអេឡិចត្រូនិក ផងដែរ ៕
ចែករំលែកព័តមាននេះ