មនុស្ស២នាក់ទៀតបានត្រូវស្លាប់ និងជាច្រើនសិបនាក់ទៀតត្រូវរបួសកាលពីថ្ងៃទី១៣ មីនា នៅយេម៉ែន ខណៈពេលប៉ូលិសយេម៉ែនបាញ់គ្រាប់ពិត និងប្រើឧស្ម័នបង្ហូរទឹកភ្នែកប្រឆាំង ពួកបាតុករដែលទាមទារឱ្យលោកប្រធានាធិបតីអាលី អាប់ដាល់ឡាហ៍ សាឡេហ៍ ចាកចេញពីតំណែង ។ សាក្សីទាំងឡាយរាយការណ៍ថា អ្នករបួសភាគច្រើននៅក្រុងសាណា គឺដោយសារឥទ្ធិពលឧស្ម័ន ក៏ប៉ុន្តែមនុស្សមួយចំនួនត្រូវគ្រាប់កាំភ្លើង។ ការប៉ះទង្គិចគ្នានានាកើតមាននៅច្រកចូលទាំងឡាយនៃសាកលវិទ្យាល័យក្នុងរដ្ឋធានីជាកន្លែងមានបាតុកម្មតវ៉ាចាប់តាំងពីច្រើនសប្តាហ៍មកហើយ ។
ក្នុងទីក្រុងកំពង់ផែអាដេន ភាគខាងត្បូងប្រទេសមនុស្សម្នាក់ត្រូវស្លាប់ដោយគ្រាប់កាំភ្លើងពេលមានការប៉ះទង្គិចគ្នារវាងពួកអ្នកតវ៉ា និងប៉ូលិស ។ ទូរទស្សន៍អាល់ហ្សាហ្ស៊ីរ៉ា បានបង្ហាញរូបភាពក្រុមគ្រូពេទ្យដែលជួយព្យាបាល ពួកបាតុករត្រូវរបួសដោយសារការបាញ់ឧស្ម័នក្នុងមន្ទីរពេទ្យបណ្តោះអាសន្នបង្កើតឡើងដោយពួកអ្នកតវ៉ាក្នុងបរិវេណសាកលវិទ្យាល័យ។
មនុស្សជាច្រើនពាន់នាក់បានប្រមូលផ្តុំគ្នានៅតាមច្រកចូលទាំងឡាយនៃសាកលវិទ្យាល័យកាលពីថ្ងៃទី១៣ មីនា ហើយដាក់បារ៉ាស់ដើម្បីការពារប្រឈមមុខនឹងកងកម្លាំងប៉ូលិសដែលប្រើប្រាស់កាណុងបាញ់ទឹក ។ ម្យ៉ាងទៀត បាតុករ៧នាក់ត្រូវរបួសនៅទីក្រុងអាល់ម៉ាអា ហ្វៀរ ខេត្តតាអេស ។ សមាជិកសភាជាច្រើននាក់នៃគណបក្សកាន់អំណាចបានសុំលាលែងចេញពីតំណែងរយៈពេលប៉ុន្មានសប្តាហ៍ចុងក្រោយនេះ ហើយចូលរួមជាមួយពួកប្រឆាំង ។
សរុបមនុស្ស៤នាក់ ក្នុងនោះមានកុមារម្នាក់អាយុ១២ឆ្នាំ បានត្រូវស្លាប់ក្នុងបាតុកម្មកាលពី ថ្ងៃទី១២ មីនា ដែលធ្វើឱ្យចំនួនអ្នកស្លាប់ឡើងដល់ជាង៣០នាក់ហើយក្នុងរយៈពេល២ខែនៃភាពចលាចល ៕
ចែករំលែកព័តមាននេះ