ខេត្តប៉ៃលិន ៖ ប្រជាពលរដ្ឋរស់នៅក្នុង ភូមិក្រចាប់លើ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន នាថ្ងៃទី២១ ខែធ្នូនេះ ពលរដ្ឋដែលគ្មានមុខរបរ…
ខេត្តប៉ៃលិន ៖ ប្រជាពលរដ្ឋរស់នៅក្នុង ភូមិក្រចាប់លើ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន នាថ្ងៃទី២១ ខែធ្នូនេះ ពលរដ្ឋដែលគ្មានមុខរបរ ឬដីស្រែចម្ការនឹងគេ បាននាំគ្នាធ្វើជាកម្មករទៅស៊ីឈ្នួលដើរកាច់ស្នៀតពោតក្នុងចម្ការ និងអង្គុយបកសំបកផ្លែពោតឱ្យថៅកែ ដើម្បីបានថវិកាយកទៅផ្គត់ផ្គង់ជីវភាពក្រុមគ្រួសារប្រចាំថ្ងៃ ។
បើតាមសម្តីរបស់ស្ត្រីម្នាក់ ឈ្មោះ ចាន់ វី អាយុ៣០ឆ្នាំ បុរសម្នាក់ ឈ្មោះ វី ឈាន អាយុ៦១ឆ្នាំ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ បានរៀបរាប់ឱ្យដឹងដូចៗគ្នាថា ៖ ពួកគាត់បានមកស៊ីឈ្នួលធ្វើជាកម្មករ កាច់ស្នៀតពោត និងបកសំបកផ្លែពោតក្រហមឱ្យថៅកែនៅតាមចម្ការក្នុងក្រុងប៉ៃលិនអស់រយ:ពេលជាយូរថ្ងៃមកហើយ ដោយការដើរកាច់ស្នៀតពោតនេះក្នុង១ធុងស្ពេត្រូ ថៅកែឱ្យថ្លៃឈ្នួល៧០០ ទៅ៨០០រៀល ។
ជាក់ស្តែងក្នុង១ថ្ងៃ ពួកគាត់អាចរកប្រាក់ចំណូលបានប្រហែលជា២៥០០០រៀល ទៅ៣០០០០រៀល ដើម្បីយកទៅទិញម្ហូបអាហារសម្រាប់ផ្គត់ផ្គង់ជីវភាព ។ រីឯការអង្គុយបកសំបកផ្លែពោតវិញ គឺ១ធុងស្ពេត្រូ ថៅកែឱ្យថ្លៃឈ្នួល៥០០រៀល ក្នុង១ថ្ងៃ ពួកគាត់អាចរកប្រាក់ចំណូលបានប្រហែល១៥០០០រៀល ទៅ២០០០០រៀល តាមអ្នកដែលបកលឿន ឬយឺត ។
ប្រភពបន្តទៀតថា ចាប់តាំងពីកសិករ រស់នៅក្នុងខេត្តប៉ៃលិននាំគ្នាប្រមូលផលផ្លែពោតក្រហម នាចុងរដូវនេះ ពួកគាត់ក៏មិននៅទំនេរដែរ គឺនាំគ្នាចុះទៅតាមចម្ការរាល់ថ្ងៃ ដោយអ្នកខ្លះវេចបាយម្ហូបអាហារ អ្នកខ្លះទៀត ដាក់ចានឆ្នាំ និងសម្ភារ:ផ្ទះបាយផ្សេងៗយកទៅដេកតាមរោងចាំចម្ការ ដើម្បីស៊ីឈ្នួលកាច់ស្នៀតពោតឱ្យថៅកែ ។
ចំណែកលោក គីម បូរីន ជាម្ចាស់ចម្ការមួយកន្លែង ស្ថិតនៅក្នុងភូមិក្រចាប់លើ សង្កាត់អូរតាវ៉ៅ បានឱ្យដឹងដែរថា ៖ លោកបានដាំដំណាំពោតក្រហមចំនួន៤.៥ហិកតា ដោយកសិផលពោត នៅចុងឆ្នាំ២០២១នេះមានការធ្លាក់ចុះខ្លាំងក្នុង១ហិកតា ប្រមូលផលបានត្រឹមតែ១តោនប៉ុណ្ណោះ ដោយសារតែ ភ្លៀងធ្លាក់ជោកជាំរាល់ថ្ងៃខ្លាំងពេក បណ្តាលឱ្យរលួយដើមខូចខាតស្ទើរទាំងស្រុង ។
លោកបន្តទៀតថា ដោយជួលឈ្នួលកម្មករឱ្យចូលទៅប្រមូលផល និងជួលរថយន្តដឹកចេញពីចម្ការ គិតគូរកាច់កិនទៅ គឺមិនសល់ថវិកាសម្រាប់ផ្គត់ផ្គង់ជីវភាពនោះឡើយ ។ តែទោះបីជាយ៉ាងណា ខាងលោកក៏នៅតែបន្តខិតខំប្រឹងប្រែងដាំដំណាំផ្សេងៗបន្ថែមទៀត ដើម្បីលក់យកប្រាក់សម្រាប់ផ្គត់ផ្គង់ជីវភាពផងដែរ ៕
ចែករំលែកព័តមាននេះ