រាជធានីភ្នំពេញ ៖ រដ្ឋសភាបានទទួលយកសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរី រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋកូរ៉េ ដើម្បីពិនិត្យសិក្សានៅថ្ងៃទី ២១ ខែធ្នូនេះ មិនយូរទេស្ថាប័ននីតិប្បញ្ញតិ្តនឹងអនុម័តច្បាប់នេះ ។ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េនេះ គឺជាកិច្ចព្រមព្រៀងពាណិជ្ជកម្មសេរីទីពីររបស់កម្ពុជា បន្ទាប់ពីកិច្ចព្រមព្រៀងពាណិជ្ជកម្មសេរីជាមួយប្រទេសចិន ដែលនឹងអាចូលជាធរមាននៅដើមឆ្នាំ ២០២២ ខាងមុខនេះ សម្រាប់ការនាំចេញផលិត ពិសេសផលកសិកម្ម ចូលទីផ្សារចិនដ៍ធំនោះ ។
លោក ប៉ែន សុវិជាតិ អនុរដ្ឋលេខាធិការនិងជាអ្នកនាំពាក្យក្រសួងពាណិជ្ជកម្មកម្ពុជា ធ្លាប់សារព័ត៌មានថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េនឹងផ្តល់ឱកាសឲ្យកម្ពុជាអាចនាំទំនិញចេញដោយរួចពន្ធ លើទំនិញឧស្សាហកម្មស្រាល ទំនិញកសិកម្ម និងឧស្សាហកម្ម គ្រឿងបន្លាស់ និងគ្រឿងបង្គំ ដែលបច្ចុប្បន្នកូរ៉េមានរោងចក្រខ្សែភ្លើង រថយន្ត និងបានរៀបចំរោងចក្រដំឡើងរថយន្ត ២ កន្លែងរួចហើយនៅក្រុងបាវិត ខេត្តស្វាយរៀង និងខេត្តកោះកុង ។ លោកបន្ថែមថា កម្ពុជានឹងទទួលអត្ថប្រយោជន៍សម្រាប់ការនាំចូលទៅកាន់ទីផ្សារកូរ៉េ ដោយរួចពន្ធ ដែលហៅថា ពន្ធសូន្យភ្លាមនោះ គឺមានទំនិញឧស្សាហកម្មស្រាល រួមទាំងទំនិញសម្លៀកបំពាក់ ស្បែកជើង កាបូបធ្វើដំណើរ ។
ទំហំពាណិជ្ជកម្មទ្វេភាគីរវាងកម្ពុជា និងកូរ៉េខាងត្បូង សម្រេចបានជាង ៨៨៥ លានដុល្លារអាមេរិកក្នុងឆ្នាំ ២០២០ ។ ក្នុងនោះ កម្ពុជា បាននាំចេញទំនិញសរុបគិតជាទឹកប្រាក់មាន ៣១៨ លានដុល្លារខណៈកម្ពុជា បាននាំចូលពីកូរ៉េខាងត្បូងគិតជាទឹក ៥៦៧លានដុល្លារអាមេរិក ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងថា សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីរវាង កម្ពុជា និងសាធារណរដ្ឋកូរ៉េ នឹងក្លាយជាកម្លាំងចលករដ៏សំខាន់ក្នុងការជំរុញលំហូរពាណិជ្ជកម្ម និងការវិនិយោគរវាងភាគីទាំងពីរ ដែលនឹងផ្តល់ប្រយោជន៍ឱ្យគ្នាទៅវិញទៅមកផ្នែកសេដ្ឋកិច្ច ការអភិវឌ្ឍ សុខមាលភាពប្រជាជន និងការផ្សារភ្ជាប់ធុរកិច្ចនៃប្រទេសទាំងពីរឱ្យកាន់តែប្រសើរឡើងបន្ថែមទៀត ។ កម្ពុជាក៏នឹងទទួលបានអត្ថប្រយោជន៍បន្ថែមពីកិច្ចព្រមព្រៀងនេះមានជាអាទិ៍ ការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗពីការវិនិយោគផ្ទាល់របស់បរទេស ព្រមទាំងបង្កើតការងារថ្មីៗជូនប្រជាជនកម្ពុជា ផងដែរ ។
ក្រៅពីប្រទេសចិន និងសាធារណកូរ៉េ កម្ពុជាបានកំពុងសិក្សាពីលទ្ធភាពចុះកិច្ចព្រមព្រៀងពាណិជ្ជកម្មសេរីទ្វេភាគី ជាមួយប្រទេសមួយចំនួនទៀត មានឥណ្ឌា អង់គ្លេស និងប្រទេសមួយចំនួននៅតំបន់អឺរ៉ុបខាងកើត ជាដើម ៕
ចែករំលែកព័តមាននេះ