ខេត្តកណ្ដាល ៖ ណាហ្គាវើលបេះដូងសប្បុរសដែលជាក្រុមការងារសង្គមរបស់ក្រុមហ៊ុនណាហ្គាវើល បានសហការជាមួយក្លិបបាល់ទាត់ NagaWorld FC ផ្តល់ការ បណ្តុះបណ្តាលបាល់ទាត់ដល់សិស្សានុសិស្សចំនួន១២០នាក់ ព្រមទាំងបានឧបត្ថម្ភសម្ភារសិក្សា និងសម្ភារកីឡាដល់សាលារៀនចំនួន១០នៅអនុវិទ្យាល័យជ័យធំ ស្រុកខ្សាច់កណ្តាល ខេត្តកណ្តាល កាលថ្មីៗនេះ ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា៖«ក្រុមហ៊ុនណាហ្គាវើលមានមោទនភាពក្នុងការជួយអភិវឌ្ឍវិស័យកីឡា និងវិស័យអប់រំជាបន្តទៀត ។ យើងបានឧបត្ថម្ភសៀវភៅ៦.៦០០ក្បាល បាល់ទាត់២០០ និងអាវកីឡាបាល់ទាត់១២០សម្រាប់ដល់សាលារៀនចំនួន១០មកពីខេត្តកណ្តាល កំពង់ចាម និងព្រៃវែង នៅអនុវិទ្យាល័យជ័យធំ ស្រុកខ្សាច់កណ្តាល ខេត្តកណ្តាល ។ សង្ឃឹមថា សម្ភារដែលយើងបានឧបត្ថម្ភនឹងជួយឱ្យសិស្សានុសិស្សមានចំណេះដឹងជាងមុន ពីព្រោះការអប់រំដែលមានភាពរឹងមាំ គឺជាមូលដ្ឋានគ្រឹះដ៏សំខាន់សម្រាប់អនាគតរបស់ពួកគេក៏ដូចជាអនាគតរបស់ប្រទេសកម្ពុជាទាំងមូល ។ យុវជន-យុវនារីទាំងអស់ គឺជាសសរទ្រូងដ៏រឹងមាំរបស់ប្រទេសកម្ពុជា» ។
សៀវភៅសិក្សាដែលបណ្ណាល័យរបស់សាលារៀននីមួយៗបានទទួលរួមមាន សៀវភៅអក្សរសាស្ត្រខ្មែរ វចនានុក្រម សៀវភៅប្រលោមលោក និងសម្ភារសិក្សាជាច្រើនទៀត។ បាល់ទាត់ និងអាវបាល់ទាត់ ក៏ត្រូវបានចែកជូនដោយណាហ្គាវើលបេះដូងសប្បុរសផងដែរប្រយោជន៍ដើម្បីជួយលើកទឹកចិត្តឱ្យយុវជន-យុវនារីយើងបន្តលេងកីឡាដើម្បីសុខភាព និងអភិវឌ្ឍខ្លួន ។
លោក James Ma បន្តថា ៖«កីឡាបាល់ទាត់ គឺជាកីឡាដែលយើងលេងជាក្រុម ហើយវាបង្ហាត់ឱ្យយើងចេះធ្វើការជាក្រុម និងចេះសាមគ្គីគ្នា ។ គុណសម្បត្តិទាំងអស់នេះហើយដែលជួយកសាងអនាគតរបស់ប្រទេសកម្ពុជាឱ្យកាន់តែប្រសើរឡើង» ។ រៀនពីគ្រូបង្ហាត់បាល់ទាត់ និងកីឡាករបាល់ទាត់អាជីព សាលារៀនទាំង១០ ដែលបានចូលរួមទទួលផលប្រយោជន៍ពីកម្មវិធីបណ្តុះបណ្តាលបាល់ទាត់ ពិសេសបង្ហាត់ដោយគ្រូបង្វឹក និងកីឡាករអាជីពមកពីក្លិបបាល់ទាត់ NagaWorld FC ។ ការបណ្តុះបណ្តាលនេះរួមមាន ការកម្តៅសាច់ដុំ ជំនាញលេងបាល់ មូលដ្ឋានបច្ចេកទេស ការទប់បាល់ ការទាត់បាល់ ជំនាញប្រយុទ្ធ និងជំនាញការពារជាដើម។ បន្ទាប់មក យើងមានការប្រកួតបាល់ទាត់មិត្តភាពរវាងក្លិបបាល់ទាត់ NagaWorld FC និងសិស្សានុសិស្សនៅអនុវិទ្យាល័យហ៊ុន សែន ជ័យធំ ។
មានប្រជាជនកម្ពុជាប្រមាណ៨០.០០០ នាក់ បានទទួលផលប្រយោជន៍ពីកម្មវិធីការងារសង្គមរបស់ណាហ្គាវើលបេះដូងសប្បុរស ។ ចាប់តាំងពីចាប់កំណើតអស់រយៈពេលជាង២១ឆ្នាំកន្លងមកនេះ ណាហ្គាវើល បានចូលរួមចំណែកអភិវឌ្ឍសេដ្ឋកិច្ច និងសង្គមតាមរយៈការងារសង្គម និងការឧបត្ថម្ភជាច្រើន ។ ក្នុងខែមីនា ឆ្នាំ២០១៤ ណាហ្គាវើលបេះដូងសប្បុរសត្រូវបានបង្កើតឡើងដើម្បីជួយឧបត្ថម្ភ និងតបស្នងទៅកាន់ប្រទេសកម្ពុជាវិញដល់ប្រជាជនដែលមានជីវភាពខ្វះខាត ៕
ចែករំលែកព័តមាននេះ