រាជធានីភ្នំពេញ ៖ នៅក្នុងទិវាកុមារអន្តរជាតិ ១មិថុនា ២០១៦ ក្រុមហ៊ុន Huawei ប្រចាំនៅកម្ពុជា រួមសហការជាមួយតារាមួយចំនួនប្រចាំព្រះរាជាណាចក្រកម្ពុជា រួមមានតារាចម្រៀងប្រចាំហង្សមាស លោក នៅ ស៊ីនឿន តារាបង្ហាញម៉ូត ហង្ស សុរិយ៉ាន់, កញ្ញា សុផា លីនដា តារាសម្តែង និងតារាបង្ហាញម៉ូតដ៏មានប្រជាប្រិយភាព, កញ្ញា ប៊ូដាលីស តារាបង្ហាញម៉ូតកម្ពុជា, លោក គង់ ប៊ុនថន ពិធីករដែលសំបូរវោហាស័ព្ទ, លោក វី យ៉ារ៉ូ ពិធីករមុខប្រជាប្រិយ និងពូកែវោហា ព្រមទាំងតារាជាច្រើនរូបទៀត ដើម្បីរៀបចំជាកម្មវិធីសប្បុរសធម៌មួយក្នុងគោលបំណងជួយដល់កុមារក្រីក្រដែលកំពុងតែលំបាក មានភាពខ្វះខាត ឱ្យមានលទ្ធភាពបន្តការសិក្សាតទៅមុខបន្តទៀត ។
ក្នុងសកម្មភាពនៃការចែករំលែក ក៏ដូចជាការបង្ហាញនូវសេចក្តីស្រឡាញ់ទៅកាន់កុមារកម្ពុជា គណៈគ្រប់គ្រង គ្រប់ជាន់ថ្នាក់របស់ក្រុមហ៊ុន Huawei កម្ពុជា ព្រមទាំងសប្បុរសជនសិល្បៈករ សិល្បៈការីនីទាំងអស់ បានរៀបចំជាសម្ភារសិក្សា និងអំណោយមួយចំនួន ដើម្បីផ្តល់ជូនទៅដល់ប្អូនៗ កុមារសិស្សានុសិស្សក្រីក្រ ដែលកំពុងតែជួបការខ្វះខាត ហើយបច្ចុប្បន្នកំពុងតែសិក្សានៅឯសាលាបឋមសិក្សា អង្គជុំ ភូមិតាអោក ឃុំឈ្វាំង ស្រុកពញាឮ ខេត្តកណ្តាល ។
គួររំលឹកថាថ្មីៗនេះ Huawei ក៏បានបញ្ចេញកំពូលស្មាតហ្វូនថ្មីមួយប្រភេទទៀតនោះ គឺ Huawei P9 និងបានដាក់លក់នៅលើទីផ្សារប្រទេសកម្ពុជាហើយផងដែរ ។
លោក អែម យុទ្ធូ ប្រធានទីផ្សារជាន់ខ្ពស់ប្រចាំនៅកម្ពុជា បាន ឱ្យដឹងថា «P9 មិនត្រឹមតែជាកំពូលស្មាតហ្វូនដែលមានរូបរាងស្អាតប្រណីត ស្តើង ស្រាល រឹងមាំ និងទាក់ទាញប៉ុណ្ណោះទេ តែវាបានបង្កប់នូវអត្ថន័យនៃពាក្យជូនពរទៅកាន់មនុស្សជាទីស្រឡាញ់ ពិសេសពរជ័យទាំងអស់នោះ គឺមានជំនឿថា នឹងកើតមានឡើងទៅដល់អ្នកដែលប្រើប្រាស់ P9 នេះផងដែរ។ ហើយថ្ងៃនេះ ក្រុមការងាររបស់ Huawei ទាំងអស់ សូមធ្វើការចែករំលែកនូវពរជ័យទាំងអស់នេះ ជាពិសេសគឺសេចក្តីស្រឡាញ់ទាំងអស់ដែលពួកយើងមានទៅកាន់កុមារគ្រប់គ្នាតាមរយៈការផ្តល់ជូនសម្ភារ ទោះបីជាតិចតួចក្តី តែវាកម្លាំងចលករមួយដែលជម្រុញឱ្យមានការចែករំលែកសម្រាប់សង្គមជាតិរបស់យើង ហើយគ្រប់ៗគ្នាគឺអាចធ្វើបាន ជាពិសេសកុមារគឺជាអនាគតរបស់ប្រទេសជាតិរបស់យើង ហើយយើងចង់ឃើញកុមារទាំងអស់មានជីវិតរស់នៅយ៉ាងប្រសើរ ។
អ្នកគ្រូ ពេជ សាវន នាយិកាសាលាបឋមសិក្សា អង្គជុំ បានឲ្យដឹងថា សាលារបស់អ្នកគ្រូមានកូនសិស្សសរុបចំនួនជាង៦០០នាក់ ដែលក្នុងនោះសុទ្ធតែរស់នៅក្រោមបន្ទាត់ក្រីក្រ និងគ្រួសារជំពាក់បំណុលគេ ។ កូនសិស្សពេលខ្លះមួយឆ្នាំទល់មួយឆ្នាំមានសម្លៀកបំពាក់ត្រឹមតែមួយឈុត ខ្វះសៀវភៅសរសេរ និងសម្ភារជាច្រើនទៀត ។
អ្នកគ្រូបន្តថា ក្នុងនាមអ្នកគ្រូ ជានាយិកាប្រចាំសាលាបឋមសិក្សា អង្គជុំ សូមថ្លែងអំណរគុណយ៉ាងជ្រាលជ្រៅចំពោះជំនួយរបស់ក្រុមហ៊ុន Huawei និងក្រុមអ្នកសិល្បករទាំងអស់ ចំពោះសម្ភារសិក្សា និងអំណោយផ្សេងៗទៀតសម្រាប់កុមារក្រីក្រនៅទីនេះ ៕
ចែករំលែកព័តមាននេះ