រាជធានីភ្នំពេញ ៖ ចាប់តាំងពីផ្ទុះជំងឺរាតត្បាតកូវីដ-១៩ មក រហូតដល់ចុងឆ្នាំ ២០២១ មានពលករខ្មែរត្រឡប់មកពីក្រៅប្រទេស ជាង ២៦ ម៉ឺននាក់ ក្នុងនោះ ភាពច្រើនត្រឡប់មកពីប្រទេសថៃ ។ ការវិលមកកាន់ប្រទេសវិញដោយសារបារម្ភពីជំងឺកូវីដ ១៩ បានធ្វើឲ្យពលករចំណាយស្រុកទាំងនោះបាត់បង់ការងារ គ្មានចំណូលផ្គត់ផ្គង់គ្រួសារ ។
លោកស្រី ជូ ប៊ុនអេង អនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស នៅក្នុងពិធីសម្ពោធអគារមណ្ឌលទទួលពលករកំរៀង ស្ថិតនៅភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង នាព្រឹថ្ងៃទី ២០ ខែធ្នូ ឆ្នាំ ២០២១ បានលើកឡើងថា ក្នុងពេលជំងឺកាចសាហាវ កូវីដ-១៩ បានចាប់ផ្ដើមរាតត្បាតដល់បណ្ដាប្រទេស ក្នុងតំបន់ដែលធ្វើឱ្យប៉ះពាល់យ៉ាងខ្លាំងដល់ប្រព័ន្ធសេដ្ឋកិច្ច ការងាររបស់ពលករ ដែលតាមបណ្ដារោងចក្រ សហគ្រាស កសិដ្ឋាន និងការដ្ឋានការងារជាច្រើន ត្រូវបានបិទស្ទើរទាំងស្រុង ធ្វើឱ្យពលករបាត់បងការងារធ្វើ និងប្រាក់ចំណូល ជាពិសេស ពលករគ្មានជំនាញ និងមានចំណូលទាប ។
«ការបិទព្រំដែនរបស់ព្រះរាជាណាចក្រថៃ ក្នុងអំឡុងខែមីនា ឆ្នាំ ២០២០ បានជំរុញពលករកម្ពុជាវិលត្រឡប់មកពីប្រទេសថៃយ៉ាងគគ្រឹកគគ្រេង តាមបណ្ដោយបន្ទាត់ព្រំដែន រួមទាំងច្រកព្រំដែនកំរៀង នេះផងដែរ ។ យើងត្រួតពិនិត្យយ៉ាងត្រឹមត្រូវបំផុតទាំងបញ្ហាសុខភាព ពាក់ព័ន្ធនឹងការឆ្លងជំងឺកូវីដ-១៩ និងការគ្រប់គ្រងភាពរាយប៉ាយតាមច្រកមិនផ្លូវការ ទាំងយប់ ទាំងថ្ងៃ ។ គិតមកដល់ចុងឆ្នាំ ២០២១ នេះ មានចំនួនពលករ ដែលត្រឡប់មកពីក្រៅប្រទេសរហូតដល់ជាង ២៦ ម៉ឺននាក់ ដែលក្នុងនោះ មានការវិលត្រឡប់ពីប្រទេសថៃច្រើនជាងគេ» នេះជាការបញ្ជាក់របស់លោកស្រី ជូ ប៊ុនអេង ។
មានពលករខ្មែរប្រមាណ ២ លាននាក់ត្រូវគេដឹងថា កំពុងធ្វើការនៅប្រទេសថៃ នៅក្នុងនោះមានពលរដ្ឋភាគច្រើនរស់នៅ និងស្វែងរកការងារធ្វើនៅក្នុងប្រទេសគេ ដើម្បីចិញ្ចឹមជីវិតដោយខុសច្បាប់ ។ អគារមណ្ឌលទទួលពលករកំរៀងត្រូវគេមើលឃើញថាមានតម្លៃខាងសង្គមកិច្ចក្នុងការសម្រួលការលំបាករបស់ពលរដ្ឋឆ្លងដែន ។ កន្លងមករដ្ឋាភិបាលបានសាងសង់អគារបែបនេះមួយនៅច្រកទ្វារអន្តរជាតប៉ោយប៉ែត ។
នៅក្នុងពេលអញ្ជើញជាអធិបតីភាពសម្ពោធអគារសម្តេចក្រឡាហោម ស ខេង អគារមណ្ឌលទទួលពលករនេះ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានគូសបញ្ជាក់ថា ថាថ្វីត្បិតតែអគារមណ្ឌលទទួលពលករកំរៀងនេះមិនសូវធំ តែអគារនេះមានតម្លៃធំធេងណាស់ ក្នុងការជួយសង្គ្រោះដល់ប្រជាពលរដ្ឋដែលរងគ្រោះគ្រប់ប្រភេទ និងពលរដ្ឋដែលគ្រោះថ្នាក់ដោយសារការជួញដូរ ។ សម្តេច បានបញ្ជាក់ថា នៅពេលបច្ចុប្បន្ន អគារមណ្ឌលទទួលពលករមាននៅខេត្តបាត់ដំបងមួយកន្លែង និងនៅខេត្តបន្ទាយមានជ័យមួយកន្លែងទៀត ក្នុងករណីចាំបាច់ ស្របតាមឆន្ទៈនយោបាយក្នុងការជួយសង្គ្រោះពលកររងគ្រោះ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សអាចពិនិត្យលទ្ធភាពកសាងនៅអគារមណ្ឌលបន្ថែមទៀត ដូចជាក្នុងខេត្តឧត្តរមានជ័យជាដើម៕
ចែករំលែកព័តមាននេះ