ឧត្តមសេនីយ៍ទោ ជួន ណារិន្ទ ចែកមួកការពារសុវត្ថិភាពចំនួន២៩២មួកដល់សិស្សនិងគ្រូ
ខេត្តព្រះសីហនុ ៖ នាព្រឹកថ្ងៃទី០២ ខែមិថុនា ឆ្នាំ២០១៦នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បាននាំយកមួកការពារសុវត្ថិភាព
ខេត្តព្រះសីហនុ ៖ នាព្រឹកថ្ងៃទី០២ ខែមិថុនា ឆ្នាំ២០១៦នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បាននាំយកមួកការពារសុវត្ថិភាពចំនួន២៩២មួក មកចែកជូនសិស្សានុសិស្ស នៃសាលាវិទ្យាល័យក្រុងព្រះសីហនុ ចំនួន២០០នាក់ និងសាស្ត្រាចារ្យចំនួន៩២ផងដែរ។ មានមតិសំណេះសំណាលទៅកាន់សិស្សានុសិស្សនាពេលនោះ លោកឧត្តមសេនីយ៍ បានផ្តាំផ្ញើឲ្យក្មួយៗទាំងអស់ ខិតខំប្រឹងប្រែងរៀនសូត្រ ស្តាប់បង្គាប់ឪពុកម្តាយ និង លោកគ្រូ អ្នកគ្រូ ធ្វើខ្លួនជាមនុស្សល្អ ដើម្បីជាទំពាំងស្នងឬស្សី ជាសសរទ្រូងប្រទេសជាតិទៅថ្ងៃអនាគត ចៀសឲ្យផុតពីបញ្ហាគ្រឿងញៀន គ្រឿងអបាយមុខទាំងឡាយ និងខិតខំគោរពច្បាប់ចរាចរ ពេលធ្វើដំណើរទោះជិតឬឆ្ងាយត្រូវពាក់មួកការពារគ្រប់ពេល ។
ជាមួយគ្នានេះដែរលោកស្នងការ ក៏បានទទួលយកសំណើរបស់លោកនាយកសាលាសុំឲ្យលោកជួយឧបត្ថម្ភដល់សិស្សក្រីក្រ២នាក់ និងលោកគ្រូម្នាក់ កំពុងស្នាក់នៅក្នុងសាលាជួបការខ្វះខាតខ្លាំង។ លោកស្នងការ បានយល់ព្រមជួយឧបត្ថម្ភអ្នកទាំង៣ជាអង្ករ ក្នុង១ខែ២បាវ និងថវិកាចំនួនម្ភៃម៉ឺនរៀលផងដែរ៕
ចែករំលែកព័តមាននេះ