បទល្មើសឈូសឆាយដីព្រៃលិចទឹកនៅតំបន់២និងតំបន់៣
ខេត្តកំពង់ឆ្នាំង ៖ ជុំវិញករណីមានត្រាក់ទ័រលួចឈូសឆាយព្រៃលិចទឹក នៅតំបន់២ និងតំបន់៣ ក្នុងឃុំពាមឆ្កោក ស្រុកជលគីរី អស់ជាច្រើនហិកតា
ខេត្តកំពង់ឆ្នាំង ៖ ជុំវិញករណីមានត្រាក់ទ័រលួចឈូសឆាយព្រៃលិចទឹក នៅតំបន់២ និងតំបន់៣ ក្នុងឃុំពាមឆ្កោក ស្រុកជលគីរី អស់ជាច្រើនហិកតា រយៈកាលកន្លងមក ត្រូវបានមន្ត្រីសង្កាត់ជលផល ជលគីរីបានអះអាងថា ពិតជាមានការដាក់ត្រាក់ទ័រលួច ឈូសឆាយដីព្រៃលិចទឹក នៅតំបន់នោះមែន រហូតមានបង្កើតគណៈកម្មការវាយតំម្លៃ ពីការខូចខាត និងវិធានការបង្ក្រាប ឃាត់ខ្លួនបាន ត្រាក់ទ័រ២គ្រឿង និងមនុស្ស២នាក់ ក្នុងនោះមានម្នាក់ជាមេក្លោង បញ្ជូនទៅតុលាការ ចាត់ការតាមផ្លូវច្បាប់ហើយ ដែលពេលនេះមនុស្ស២នាក់ កំពុងជាប់ឃុំក្នុងពន្ធនាគារ និងមនុស្សម្នាក់ទៀត កំពុងរត់គេចខ្លួន ដែលគេស្គាល់ថាជាម្ចាស់ត្រាក់ទ័រខាងលើ ។
ជួបជាមួយ អ្នកយកព័ត៌មាន កោះសន្តិភាព នៅព្រឹក ថ្ងៃទី០១ ខែមិថុនា ឆ្នាំ២០១៦ លោក សុង សារឿន នាយសង្កាត់រដ្ឋបាល ជលផល ជលគីរី បានឲ្យដឹងថា កន្លងមកបទល្មើសឈូសឆាយ ដីព្រៃលិចទឹក ក្នុងឃុំពាមឆ្កោក ស្រុកជលគីរី ពិតជាមានមែន ដោយកើតនៅ ក្នុងភូមិពាមឆ្កោក មាន៣ចំណុច ទី១កប់ចេស ទី២ខ្វែងឆ្លុះ ទី៣ វាលស្រងែ ។ ចំណែកភូមិក្បាលកន្លង ២ចំណុច ទី១ ស្រូងស្រទ័យ ទី២ បាត់កាំភ្លើង ។
លោកបានបញ្ចាក់ថា បទល្មើសទាំងនេះបានកើតឡើង នៅមុនចូលឆ្នាំខ្មែរគឺក្នុងខែមេសា តែក្រោយការបង្ក្រាប បានស្ងប់ស្ងាត់មួយរយៈ ក្រោយមកក៏កើតមានទៀត ទើបសមត្ថកិច្ចចម្រុះ បានឯកភាព បង្កើតគណៈកម្មការមួយវាយតម្លៃ ការខូចខាត និងស្វែងរកចាប់ជនដៃដល់ យកមកផ្តន្ទាទោសតាមច្បាប់ ។ ជាលទ្ធផលជំហានទី១ នៅថ្ងៃទី០៩ ខែឧសភា ឆ្នាំ២០១៦ គណៈកម្មការចម្រុះ មានប្រធាន អនុប្រធាន និងសមាជិក ១៣នាក់ បានចុះបង្ក្រាប និងឃាត់បានត្រាក់ទ័រ ២គ្រឿង ដែលអ្នក បើកបររត់គេចខ្លួនបាត់ ក្នុងនោះត្រាក់ ទ័១គ្រឿង យើងមិនស្គាល់ម្ចាស់ និងមួយគ្រឿងទៀត ជារបស់ ឈ្មោះ ទិត្យ អឿន ដោយបានយកមករក្សាទុក នៅរដ្ឋបាលជលផល និងបានកសាងសំណុំរឿង បញ្ជូន ឈ្មោះនេះ ទៅតុលាការ ដើម្បីចាត់ការតាមផ្លូវច្បាប់ ។
ក្រោយមកទៀត ជំហានទី២ នៅថ្ងៃទី២៧ ខែឧសភា ឆ្នាំ២០១៦ កម្លាំងសមត្ថកិច្ចចម្រុះដដែល បានឃាត់ខ្លួនមនុស្ស២នាក់ ដែលកំពុងធ្វើសកម្មភាព វាស់វែង បោះបង្គោលចែកព្រំដីគ្នា ក្នុងនោះមានម្នាក់ជាមេក្លោង ដុតព្រៃហើយវាស់លក់ឲ្យគេ មានឈ្មោះ សូត្រ សេត អាយុ៥៥ឆ្នាំ មានទីលំនៅ ភូមិព្រៃគ្រីជើង ឃុំព្រៃគ្រី ស្រុកជលគីរី និងម្នាក់ទៀត ជាអ្នកទិញ ឈ្មោះ ជឿន ធី អាយុ៣៤ ឆ្នាំ ជាអ្នកចាំទិញ ទាំងពីរនាក់ នៅភូមិ ឃុំជាមួយគ្នា និងត្រូវបានតុលាការឃុំខ្លួនហើយ។ ពាក់ព័ន្ធនឹងទំហំផ្ទៃដី ព្រៃលិចទឹក ក្នុងតំបន់ពី និងតំបន់៣ ក្នុងភូមិសាស្ត្រ ឃុំពាមឆ្កោក និងវិធានការចំពោះមុខ របស់មន្ត្រីជលផលវិញ ត្រូវបានលោកនាយសង្កាត់រដ្ឋបាល ជលគីរី បញ្ចាក់ប្រាប់ថា សរុបភ្លើងឆេះព្រៃ ក្នុងតំបន់២ និង៣ ខាងលើមានចំនួន ១៤៧ហិកតា ២៨អា ។ ចំណែកដីព្រៃលិចទឹកដែលរងការខូចខាតដោយការឆូសឆាយ ដោយត្រាក់ទ័រ វិញមានចំនួន ៦៣ហិកតា ៦៥អា ។
លោកសុង សារឿន បានបញ្ជាក់ទៀត ថា បន្ទាប់ពីមានការបង្ក្រាប យ៉ាងក្តៅគគុករួចមក បទល្មើសឈូស ឆាយដីព្រៃលិចទឹក នៅតំបន់នោះបច្ចុប្បន្ន មានសភាពស្ងប់ស្ងាត់វិញហើយ ។ រីឯវិធានការចំពោះមុខ យើងបានប្រជុំ ជាមួយគណៈបញ្ជារការឯកភាពស្រុក ពិសេសមេឃុំដែលពាក់ព័ន្ធដោយប្រើប្រាស់កម្លាំងប្រជាការពារ និងសហគមន៍នេសាទ ដើម្បីរួមគ្នាការពារព្រៃលិចទឹកដែលនៅសេសសល់ និងក្រៅពីនោះ បានធ្វើការបោះស្លាកការពារ ហាមកាប់ និងឈូសឆាយដីព្រៃលិចទឹកផងដែរ។ គួររំឮកថា បទល្មើសលួចដុតព្រៃលិចទឹក បន្ទាប់លួចឈូសឆាយ យកធើ្វជាកម្មសិទ្ធិ បានកើតឡើងជាហូរហែរ នៅស្រុកមួយចំនួនក្នុងខេត្តកំពង់ឆ្នាំង មានស្រុក បរិបូរណ៌ ស្រុកកំពង់លែង និងចុងក្រោយកើតឡើងនៅស្រុកជលគីរី ប៉ុន្តែការបង្ក្រាប របស់មន្ត្រីជំនាញ ហាក់បានដើរយឺតមួយជំហ៊ាន ពីក្រោយបទល្មើស មានន័យថា បទល្មើសកើតហើយ ទើបទៅបង្ក្រាប បើសិនបានបង្ក្រាបពេលចាប់ផ្តើមពីដំបូងគឺពិតជាល្អ មានតម្លាភាពទុបស្កាត់បានទាន់ពេល ។
ទោះបីបែបនេះក្តី ប្រជាពលរដ្ឋ ក៏បានចូលរួមសាទរដែរ តែពួកគាត់បានលើកឡើងថា បើសមត្ថកិច្ច និងមន្ត្រីជំនាញ ការពារ ព្រៃលិចទឹកដែលត្រូវភ្លើងឆេះ និងការពារ ដីព្រៃលិចទឹក ដែលរងការខូចខាតដោយការឈូសឆាយ ទាំងនោះអោយបានគង់វង្សមកវិញ គឺត្រឹមតែ២-៣ឆ្នាំព្រៃលិចទឹកទាំងនោះនឹងដុះមកវិជាពុំខាន ។ ម្យ៉ាងវិញទៀតដីព្រៃលិចទឹកទាំងនោះសុទ្ធ តែស្ថិតនៅក្នុងដែនការពារ ជាតំបន់២និងតំបន់៣ ដែលមិនត្រូវកាប់បំផ្លាញឡើយ៕
ចែករំលែកព័តមាននេះ