ការឆ្លងរាលដាលនៃជំងឺគ្រុនផ្តាសាយបក្សី ដែលបច្ចុប្បន្នកំពុងរាតត្បាតនៅប្រេស៊ីលសម្លាប់មនុស្ស៦៧៩នាក់រួចហើយ ដោយបើយោងតាមអាជ្ញាធរថា នេះជាតុល្យការខ្ពស់ជាងកាលពីឆ្នាំ២០១៥ ដែលនាំឱ្យមានការព្រួយបារម្ភ ខណៈសល់តែ២ខែទៀតប៉ុណ្ណោះ ដល់ការប្រកួតកីឡាអូឡាំពិក ទីក្រុងរីយ៉ូដឺហ្សាណេរ៉ូ ។
នាថ្ងៃទី២៣ ឧសភា ក្រសួងសុខាភិបាលប្រេស៊ីលកំណត់ឃើញមនុស្សឆ្លងវីរុសគ្រុន ផ្តាសាយបក្សីប្រភេទ AH1N1 ចំនួន៣.៥១៨នាក់ ។ កាលពីឆ្នាំទៅមិញ មានអ្នកស្លាប់ដោយវិរុសនេះ ត្រឹម៣៦នាក់ប៉ុណ្ណោះ ។
នៅភាគអាគ្នេយ៍ប្រទេសពិសេសបំផុតនៅរដ្ឋសាវប៉ូឡូ មានអ្នកឆ្លងវីរុសនេះច្រើនជាងគេ និងមានអ្នកស្លាប់ដល់៣១០នាក់ ។ រដ្ឋរីយ៉ូដឺហ្សារ៉ូ ជាទីក្រុងមានការប្រកួតកីឡាអូឡាំពិកពីថ្ងៃទី៥ ទៅ២១ សីហា ខាងមុខនេះ មានមនុស្សស្លាប់សរុប៣៤នាក់ ។
វីរុស H1N1 បានលេចទៅប្រទេសប្រេស៊ីលរយៈពេលប៉ុន្មានឆ្នាំចុងក្រោយនេះ រវាងពីខែឧសភា ទៅខែកក្កដា ពេលសីតុណ្ហភាពចុះត្រជាក់ខ្លាំង ។ ឆ្នាំនេះការឆ្លងចាប់ផ្តើមតាំងពីខែកុម្ភៈមុនដាច់រដូវក្តៅ ដែលធ្វើឱ្យអាជ្ញាធរមានការភ្ញាក់ផ្អើល ។
វីរុស AH1N1 លេចកាលពីឆ្នាំ២០០៩ នៅសហរដ្ឋអាមេរិក និងនៅម៉ិចស៊ិក ។ នាសម័យកាលនោះអង្គការសុខភាពពិភពលោក WHO បានចេញការប្រកាសអាសន្ន ។ វីរុសនេះសម្លាប់មនុស្ស១៨.៥០០នាក់ ក្នុងប្រទេស២១៤រហូតដល់ឆ្នាំ២០១០ ពេលដែល WHO លុបចោលការប្រកាសអាសន្ន ។
ប្រេស៊ីលចាប់តាំងពីដំណាច់ឆ្នាំ២០១៥មក ជួបការឆ្លងរាលដាលនៃវីរុស ZIKA ជាជំងឺឆ្លងពីមូសខាំដូចជំងឺគ្រុនឈាមដែរ ។ ពលរដ្ឋប្រេស៊ីលជាង១,៥លាននាក់ឆ្លងវីរុសនេះ ហើយវីរុសឆ្លងដល់ប្រទេសជាច្រើនទៀត នៅអាមេរិកឡាទីន ៕
ចែករំលែកព័តមាននេះ