រាជធានីភ្នំពេញ ៖ អគ្គនាយកដ្ឋានគយ និងរដ្ឋាករកម្ពុជា នឹងធ្វើការផ្អាកជាបណ្ដោះអាសន្ន ចំពោះការនាំចេញ-នាំចូលរបស់សហគ្រាសណាដែលពុំទាន់មានវិញ្ញាបនបត្រចុះបញ្ជីអាករលើតម្លៃបន្ថែម (លេខ អតប)ថ្មី ឬឯកសារនានាដែលបញ្ជាក់ពីការបានធ្វើបច្ចុប្បន្នភាពព័ត៌មានសហគ្រាសនៅអគ្គនាយកដ្ឋានពន្ធដារ នាពេលបំពេញបែបបទគយ ។ នេះបើយោងតាមសេចក្ដីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា ។
ការផ្អាកជាបណ្ដោះអាសន្ននេះ នឹងចាប់ផ្ដើមអនុវត្តពីថ្ងៃទី១ មិថុនា ឆ្នាំ២០១៦ នេះតទៅ ។ នេះបើតាមសេចក្ដីជូនដំណឹងបានបញ្ជាក់ ។
ដោយយោងតាមលិខិតលេខ៧៥០៩ អពដ ចុះថ្ងៃទី១៩ ឧសភា ឆ្នាំ២០១៦របស់អគ្គនាយកដ្ឋានពន្ធដា អគ្គនាយកដ្ឋានគយ និងរដ្ឋាករកម្ពុជា បានជូនដំណឹងថា ចំពោះអ្នកជាប់ពន្ធដែលបានចុះបញ្ជីពន្ធដារមុនថ្ងៃទី១ វិច្ឆិកា ឆ្នាំ២០១៥ ត្រូវទៅធ្វើបច្ចុប្បន្នភាពព័ត៌មានសហគ្រាសនៅអគ្គនាយកដ្ឋានពន្ធដារ ឲ្យបានចប់សព្វគ្រប់នៅត្រឹមថ្ងៃទី៣១ ឧសភា ឆ្នាំ២០១៦ ។
ការខកខានក្នុងការធ្វើបច្ចុប្បន្នភាពនៃការចុះបញ្ជិការឡើងវិញ អាចបង្កឲ្យមានផលប៉ះពាល់ជាយថាហេតុដល់ដំណើរការអាជីវកម្មនាំចេញ-នាំចូលរបស់សហគ្រាស ។
ទន្ទឹមនឹងនេះ ក្នុងន័យដើម្បីជំរុញប្រសិទ្ធភាពនៃដំណើរការបំពេញបែបបទគយឲ្យបានរលូន អគ្គនាយកដ្ឋានគយ និងរដ្ឋាករកម្ពុជា បានធ្វើការក្រើនរំលឹកដល់ម្ចាស់សហគ្រាសទាំងឡាយណាដែលមិនទាន់បានធ្វើបច្ចុប្បន្នភាពនៃការចុះបញ្ជិការពន្ធដារឡើងវិញតាមការណែនាំដូចខាងលើ ត្រូវរួសរាន់ទៅបំពេញបែបបទនេះនៅអគ្គនាយកដ្ឋានពន្ធដារ ដើម្បីទទួលបានប័ណ្ណពន្ធបា៉តង់ និងវិញ្ញាបនបត្រអាករលើតម្លៃបន្ថែមថ្មី ៕
ចែករំលែកព័តមាននេះ