ខេត្តព្រះសីហនុ ៖ នៅឆ្នាំ២០១៥ ខេត្តព្រះសីហនុបានទទួលភ្ញៀវទេសចរជាតិ និងអន្តរជាតិប្រមាណជាង១,៥លាននាក់ កើនឡើង១៤,៩% ដែលក្នុងនោះ ភ្ញៀវទេសចរអន្តរជាតិមានប្រមាណ៣៦ម៉ឺននាក់ ។
ក្រសួងទេសចរណ៍បានរំពឹងថា នៅឆ្នាំ២០២០ ខេត្តព្រះសីហនុនឹងក្លាយជាគោលដៅទេសចរណ៍សមុទ្រដ៏ទាក់ទាញក្នុងតំបន់ និងពិភពលោក ដែលអាចនឹងទទួលភ្ញៀវទេសចរអន្តរជាតិប្រមាណ១លាននាក់ ។
ថ្លែងនៅក្នុងកិច្ចប្រជុំរួមមួយដែលប្រារព្ធធ្វើនៅសាលាខេត្ត លោក ប៉ែន សុផល ក្នុងនាមជាអគ្គលេខាធិការគណៈកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា មានប្រសាសន៍ថា ដើម្បីពិនិត្យលើការគ្រប់គ្រងនិងអភិវឌ្ឍន៍ឆ្នេរសមុទ្រនៅខេត្តព្រះសីហនុ គណៈកម្មាធិការជាតិបានសម្រេចធ្វើការគ្រប់គ្រងនិងអភិវឌ្ឍន៍តំបន់ឆេ្នរសមុទ្រខេត្តព្រះសីហនុ គឺ ៖
ទី១-បើករបងបាំងខឿនខណ្ឌព្រំដី តូបដែលលយចូលឆេ្នរសមុទ្រ ខុសពីការកំណត់ ។
ទី២ -បើកច្រក និងធើ្វខ្លោងទ្វារគ្រប់ច្រកចូល ដោយដាក់ឈ្មោះតាមបណ្តាឆ្នេរនានាដូចជា ឆេ្នរឯករាជ្យ ឆេ្នរអូរឈើទាល ឆេ្នរអូរត្រេះ ។ល។ ដើម្បីឲ្យកូនខែ្មរនិងអ្នកទេសចរណ៍សា្គល់ ដែលកន្លងមកចេះតែហៅឈ្មោះក្រុមហ៊ុនបរទេស ហើយដើរកម្សាន្តមិនបាន ព្រោះទើសតូប កន្លែងលក់ដូរ ហើយមើលមិនឃើញសម្រស់ និងលំហសមុទ្រ។
ទី៣ -សម្រាប់ខ្លោងទ្វារច្រកចូលទៅឆ្នេរនីមួយៗ ក៏សូមអំពាវនាវឲ្យសប្បុរសជនចូលរួម ដោយអនុញ្ញាតឲ្យដាក់ឈ្មោះ តែមិនទទួលក្រុមហ៊ុនផ្សាយបារី ឬគ្រឿងស្រវឹង ។
ទី៤ -អភិវឌ្ឍន៍តំបន់បៃតង សមនឹងបម្រែបម្រួលអាកាសធាតុ ។
ទី៥ -លើកកម្ពស់ជីវភាពប្រជាជន និងបង្កើតការងារជូនយុវជន ។
លោក យន្ត មីន អភិបាលខេត្ត និង លោករដ្ឋលេខាធិការ ប៉ែន សុផល ក៏បានលើកទិសដៅនិងជំរុញឲ្យមន្ត្រីជំនាញពាក់-ព័ន្ធទូទាំងខេត្ត បន្តការធ្វើអត្តសញ្ញាណប្រជាពលរដ្ឋ និងអត្តសញ្ញាណដីធ្លីនៅសង្កាត់កោះរ៉ុង ក្រុងព្រះសីហនុ រៀបចំផែនការសាងសង់ និងការដាក់ជួលតូបនៅឆ្នេរអូរឈើទាល ក្រុងព្រះសីហនុ ព្រមទាំងរៀបចំគម្រោងប្លង់គោល ក្រុង-ខេត្តព្រះសីហនុ និងបង្កើនការគ្រប់គ្រងសំណល់រឹង-រាវ ផងដែរ ៕
ចែករំលែកព័តមាននេះ