កន្លែងតែមួយ ២ដងផ្ទួនៗគ្នា សម្លា.ប់ម្នាក់ របួសធ្ងន់ម្នាក់
រាជធានីភ្នំពេញ ៖ ខណៈពេលដែលសមត្ថកិច្ចកំពុងធ្វើការវាស់វែងគ្រោះថ្នាក់ចរាចរណ៍ម៉ូតូមួជិះបុករថយន្តដឹកឥដ្ឋចតនៅតាមផ្លូវរងរបួសធ្ងន់ម្នាក់ ស្រាប់តែលោកគ្រូបង្រៀន
រាជធានីភ្នំពេញ ៖ ខណៈពេលដែលសមត្ថកិច្ចកំពុងធ្វើការវាស់វែងគ្រោះថ្នាក់ចរាចរណ៍ម៉ូតូមួជិះបុករថយន្តដឹកឥដ្ឋចតនៅតាមផ្លូវរងរបួសធ្ងន់ម្នាក់ ស្រាប់តែលោកគ្រូបង្រៀននៅសាលាបឋមសិក្សាសុភមង្គលម្នាក់បានជិះម៉ូតូទៅបុករថយន្តនោះពីក្រោយទៀតបណ្តាលអោយផុងលលាដ៍ក្បាលស្លាប់ភ្លាមមួយរំពេចតែម្ដង ដែលហេតុការណ៍នេះកើតឡើងកាលពីវេលាម៉ោង១០ និង៣៥នាទីយប់ ថ្ងៃទី៣១ ខែឧសភា ឆ្នាំ២០១៦ នៅចន្លោះគីឡូម៉ែត្រលេខ១៩និង២០ តាមបណ្ដោយផ្លូវជាតិលេខ៣ ស្ថិតក្នុងភូមិវត្តស្លែង សង្កាត់ពងទឹក ខណ្ឌដង្កោ ។
សមត្ថកិច្ចបានជនរងគ្រោះមានឈ្មោះ សាន រស្មី ភេទប្រុស អាយុ៣៤ឆ្នាំ មុខរបរធ្វើគ្រូបង្រៀននៅសាលាបឋមសិក្សាសុភមង្គល មានស្រុកកំណើត និងស្នាក់នៅភូមិតាំងរនាម សង្កាត់ប្រទះឡាង ខណ្ឌដង្កោ ។
សមត្ថកិច្ចដែលកំពុងសំរួលចរាចរណ៍នៅកន្លែងកើតហេតុបានឲ្យដឹងថា មុនពេលកើតហេតុមានគ្រោះថ្នាក់ចរាចរណ៍មួយរវាងម៉ូតូហុងដាឌ្រីម ពណ៌ខ្មៅ ស៊េរីឆ្នាំ២០១២ពាក់ស្លាកលេខ ភ្នំពេញ 1BE-6622 បើកដោយបុរសម្នាក់បានជិះទៅបុករថយន្តដឹកឥដ្ឋ ម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ បាត់ដំបង 3A-2012 ដែលខូចទុកចោលតាមបណ្ដោយផ្លូវជាតិលេខ៣ ក្នុងទិសដៅពីជើងទៅត្បូង ចំពីក្រោយ បណ្ដាលឲ្យ អ្នកជិះម៉ូតូរងរបួសធ្ងន់ ត្រូវបានរថយន្តសង្គ្រោះដឹកយកទៅព្យាបាលនៅមន្ទីរពេទ្យកាល់ម៉ែត ហើយសមត្ថកិច្ចជំនាញបានកំពុងធ្វើការវាស់វែងដើម្បីយករថយន្តនិងម៉ូតូទៅរក្សារទុកនៅអធិការដ្ឋាននគរបាលខណ្ឌដង្កោ ខណៈនោះស្រាប់តែមានបុរសដែលគេស្គាល់ថាជាគ្រូបង្រៀនម្នាក់ទៀតបានជិះម៉ូតូម៉ាកហុងដាឌ្រីម ស៊េរីឆ្នាំ២០១៣ ធ្វើដំណើរតាមផ្លូវជាតិលេខ៣ ក្នុងទិសដៅពីជើងទៅត្បូង ក្នុងល្បឿនលឿន ដោយមិនបានមើលថាមានសមត្ថកិច្ចកំពុងវាស់វែងនៅខាងមុខ ធ្វើអោយសមត្ថកិច្ចរត់គេចចេញទាំងភ្នែកសព្រាត ចំណែកអ្នកបើកម៉ូតូនោះបានជ្រុលទៅបុកចំពីក្រោយរថយន្តចំហៀងខាងឆ្វេងពេញទំហឹង បណ្តាលអោយផុងលលាដ៍ក្បាលស្លាប់ភ្លាមៗនៅកន្លែងកើតហេតុតែម្តង ចំនែកម៉ូតូខូចខាតផ្នែកខាងមុខ រីឯរថយន្តវៀចកាងខាងក្រោយចំហៀងខាងឆ្វេង ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចធ្វើកំណត់ហេតុរួចបានប្រគល់អោយទៅក្រុមគ្រួសារយកទៅធ្វើបុណ្យតាមប្រពៃណី ។ ចំណែកម៉ូតូនិងរថយន្ត ត្រូវបានសមត្ថកិច្ចធ្វើការវាស់វែងរួចយកទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញដើម្បីធ្វើការដោះស្រាយនៅពេលក្រោយ ៕
ចែករំលែកព័តមាននេះ