រាជធានីភ្នំពេញ ៖ ក្រុមហ៊ុនអាកាសចរណ៍សិង្ហបុរី Singapore Airline បានហោះហើរត្រង់មកកាន់ខេត្តសៀមរាប ឡើងវិញ ។ ជើង ហោះហើរដំបូងដែលបានចុះចំណតបង្អស់ដែលបានចុះចតលើអាកាសយានដ្ឋានអន្តរជាតិសៀមរាប បន្ទាប់ពីមានវិបត្តិជំងឺកូវីដ១៩ រយៈពេល ២០ ខែកន្លងមកនេះកាលព្រឹកថ្ងៃទី ១៧ ខែធ្នូ ឆ្នាំ ២០២១ ។ ថ្នាក់ដឹកនាំខេត្ត អាជ្ញាធរជាតិអប្សរាបានមានវត្តទទួលភ្ញៀវអន្តរជាតិដោយក្តីរីករាយ ។
លោក សុផល អ្នករត់ម៉ូតូកង់បីម្នាក់នៅខេត្តសៀមរាប បាននិយាយថា លោកមានក្តីរីករាយចំពោះវត្តមានអ្នកទេសចរបរទេស ដែលមកកាន់ទឹកដីសៀមរាបឡើងវិញ ។ លោកថា អ្នកទេសចរជាប្រភពចំណូលរបស់ពួកគាត់ ដែលក្នុងរយៈពេលប្រមាណ ២ ឆ្នាំមកនេះ អ្នករស់អាស្រ័យ និងវិស័យទេសចរណ៍ជាច្រើនផ្នែកជួបបញ្ហាលំបាកជីវភាពដោយសារអវត្តមានអ្នកទេសចរ ។ «អ្នករត់ម៉ូតូកង់បី អ្នកធ្វើការនៅសណ្ឋាគារ អ្នកនាំភ្ញៀវ សឹងដាច់បាយនៅក្នុងរយៈនៃការរាតត្បាតជំងឺកូបវីដ ១៩ ប្រមាណ ២ ឆ្នាំមកនេះ ។ ពួកយើងបានទៅប្រកបការងារផ្សេងៗ ខ្លះទៅស្រុកកំណើត ដើម្បីរង់ចាំវិស័យទេសចរណ៍រស់ឡើងវិញ» ។
ក្រុមហ៊ុនអាកាសចរណ៍សិង្ហបុរី Singapore Airline បានដឹកអ្នកដំណើរសរុប ៦៧ នាក់ មកកាន់ខេត្តសៀមរាប និងអាចចាត់ទុកថា ជាទេសចរណ៍ដំបូងហើយមកកាន់ខេត្តសៀមរាប ចាប់ពីខែមីនា ឆ្នាំ ២០២០ មក ដែលផ្ទុះវិបត្តិជំងឺកូវីដ ១៩ ជាសកល ។ តាមការបញ្ជាក់របស់លោក Alain Brun នាយកប្រតិបត្តិនៃក្រុមហ៊ុន Cambodia Airports ដែលជាក្រុមហ៊ុនប្រតិបត្តិការព្រលានយន្ត ហោះអន្តរជាតិទាំងបីរបស់ប្រទេសកម្ពុជា បានមានប្រសាសន៍ថា ដំណាក់កាលថ្មីនេះ ក្នុងកិច្ចបើកដំណើរការតភ្ជាប់អន្តរជាតិឡើងវិញ គឺជាជំហានវិជ្ជមានសម្រាប់ប្រទេសកម្ពុជា ។
ឱកាសនេះនឹងមិនអាចទៅរួចនោះទេ ប្រសិនបើអាជ្ញាធរកម្ពុជាមិនជ្រើសរើសសម្រាប់ការបើកដំណើរការឡើងវិញ មិនត្រឹមតែខេត្តសៀមរាប មានភ្ញៀវទេសចរណ៍កាន់តែច្រើន និងអះអាងជំហររបស់ខ្លួនថា ជាគោលដៅកម្សាន្ត និងវប្បធម៌កំពូលរបស់កម្ពុជាប៉ុណ្ណោះទេ ប៉ុន្តែអ្នកដំណើរក៏អាចធ្វើដំណើរបានយ៉ាងងាយស្រួលរវាងប្រទេសកម្ពុជា និងទីក្រុងអន្តរជាតិផ្សេងទៀត តាមរយៈបណ្តាញហោះហើរទូទាំងពិភពលោកដ៏ធំទូលាយរបស់ក្រុមហ៊ុនអាកាសចរណ៍សិង្ហបុរី នេះជាជើងហោះហើរអន្តរជាតិលើកដំបូងមកកាន់ខេត្តសៀមរាប ចាប់តាំងពីខែមីនា ឆ្នាំ ២០២០ មកត្រូវបានអាក់ខានដោយជំងឺកូវីដ-១៩ ការបើកដំណើរការឡើងវិញនៃសេវាកម្មនេះ នឹងជួយកសាងឡើងវិញនូវចរាចរណ៍ផ្លូវអាកាសរវាងប្រទេសទាំងពីរ បន្ទាប់ពីខែដ៏លំបាកដែលកើតចេញពីជំងឺរាតត្បាត ។
លោក ទៀ សីហា អភិបាលខេត្តសៀមរាប បានឲ្យដឹងថា អ្នកដំណើរទាំងអស់ដែលបានមកដល់ខេត្តសៀមរាបពេលនេះនឹងតម្រូវឲ្យធ្វើតេស្តរហ័ស បើមានករណីអវិជ្ជមាន ពួកគេអាចធ្វើដំណើរដោយសេរីនៅក្នុងខេត្ត ឬ តាមបណ្ដាខេត្តក្រុងនានា រីឯអ្នកវិជ្ជមានតាមឧបករណ៍តេស្ដរហ័ស គឺត្រូវយកសំណាក ដើម្បីតេស្ដម៉ាស៊ីន PCR ដែលនឹងបញ្ជាក់រយៈពេល ២ ទៅ ៤ ម៉ោងបន្ទាប់ ។
លោកអភិបាលខេត្តមានសុទិដ្ឋិនិយមថា ការមកដល់របស់ភ្ញៀវទេសចរនៅពេលនេះ ជាសញ្ញាដ៏ល្អសម្រាប់សេដ្ឋកិច្ចជាតិ ក៏ដូចជាសេដ្ឋកិច្ចសៀមរាបឲ្យងើបឡើងវិញ ។ លោកក៏បានបង្ហើប ឲ្យដឹងផងដែរថា នៅពេលឆ្លងឆ្នាំសកល ២០២១ ចូល ២០២២ រដ្ឋបាលក្រុងស្រុកបានសហការណ៍គ្នាធ្វើពិធីឆ្លងឆ្នាំ ដូចជា នៅរមណីយដ្ឋានសង្ក្រាន្តរយ ស្រុកវ៉ារិន ស្រុកប្រាសាទបាគង ក៏ដូចស្រុកមួយចំនួនទៀតផងដែរ ៕
ចែករំលែកព័តមាននេះ