ខេត្តស្ទឹងត្រែង ៖ ចាប់ពីថ្ងៃទី០១ ខែកក្កដា ឆ្នាំ២០១៦នេះទៅ អគ្គិសនីស្ទឹងត្រែងចុះថ្លៃក្នុងការប្រើប្រាស់ ចរន្តអគ្គិសនី៣០រៀលគត់ក្នុង១គីឡូវ៉ាត់ ខណៈបច្ចុប្បន្នតម្លៃ ៩៨០រៀល មកត្រឹម ៩៥០រៀល ក្នុង១គីឡូវ៉ាត់ ចំពោះអតិថិជនប្រើប្រាស់ធម្មតា និងអាជីវកម្ម។ ទោះបីមានការចុះតម្លៃពី៩៨០រៀល មកត្រឹម៩៥០រៀល ក៏ប្រជាពលរដ្ឋមួយចំនួនមានការអល់អែកជាមួយនឹងតម្លៃដែលអាជ្ញាធរអគ្គិសនីចុះថ្លៃតិចតួចពេក មិនសក្ដិសមទៅនឹងជីវភាពរបស់ ប្រជាពលរដ្ឋបច្ចុប្បន្ន ដោយអ្នកខ្លះរអូរទាំថា ក្នុង១ខែៗចំណាយទៅលើថ្លៃភ្លើងច្រើនជាងចំណាយផ្សេងៗ។
លោក ជា សំណាង ប្រធានផ្នែកអាជីវកម្ម នៃអង្គភាពអគ្គិសនីស្ទឹងត្រែងបានឱ្យដឹងថា ការចុះថ្លៃគឺធ្វើទៅតាមដំណាក់កាលរបស់វា ហើយតំលៃពី៩៨០រៀល មកនៅ៩៥០រៀល គឺជាការសម្រេចរបស់អាជ្ញាធរអគ្គិសនីកម្ពុជា។ ក្រោយពីទទួលដំណឹងនៃការចុះថ្លៃអគ្គិសនីស្ទឹងត្រែង បានជូនដំណឹង និងធ្វើការផ្សព្វផ្សាយ ហើយចូលរួមនៅសាលាខេត្តស្ទឹងត្រែង កាលពីព្រឹកថ្ងៃទី៣១ ខែឧសភា ឆ្នាំ២០១៦ ដែលមានការចូលរួមពីលោក ជា ថាវរិទ្ធ អភិបាលរងខេត្ត និងមន្ទីរពាក់ព័ន្ធដើម្បីជ្រាបជាព័ត៌មាន។ លោក ជា សំណាង បានបន្តឱ្យដឹងទៀតថា នៅក្នុងឆ្នាំ២០០៥ ដល់ឆ្នាំ២០០៨ ការប្រើប្រាស់សម្រាប់អតិថិជនធម្មតា និងអាជីវកម្មតម្លៃ ១២២០រៀល ក្នុង១គីឡូវ៉ាត់ ហើយចាប់ពីថ្ងៃទី៣១ ខែធ្នូ ឆ្នាំ២០០៩ ដល់ឆ្នាំ២០១៦នេះ តម្លៃត្រឹមតែ ៩៨០រៀល និងចាប់ពីថ្ងៃទី០១ ខែកក្កដា ឆ្នាំ២០១៦ទៅ តម្លៃ៩៥០រៀល ក្នុង១គីឡូវ៉ាត់។
លោកប្រធានផ្នែកបន្តថា ការចុះតម្លៃមិនមែនតែចំពោះអតិថិជនធម្មតា រឺអាជីវកម្មទេ ចំពោះអតិថិជនតំឡើងត្រង់ហ្វូ៥០កាវេអា អតិថិជនមធ្យមលើ LV ក្រោមត្រង់ហ្វូអគ្គសនីកម្ពុជា ក៏បានបញ្ចុះតម្លៃពី ៩២០រៀល មក៩០០រៀល និងអតិថិជន LV វិនិយោគត្រង់ហ្វូ ខ្លួនឯងបញ្ចុះតម្លៃពី ៨៧០រៀល មក៨៥០រៀល ដោយឡែកអតិថិជន MV ទៅតង់ស្យុង MV ខ្ពស់២២កាវេអា បញ្ចុះតម្លៃពី ៨៣០រៀល មកនៅ០.១៧២៥ ដុល្លា។
លោក ជា សំ ណាង បានបន្ថែមថា ចំពោះព័ត៌មានមិនទាន់ផ្លូវការ អាជ្ញាធរអគ្គិសនីកម្ពុជា នឹងមានការចុះថ្លៃនៃការប្រើប្រាស់អគ្គសនី ជាបន្តបន្ទាប់ទៀត គឺនៅឆ្នាំ២០១៨ នៅពេលក្រុមហ៊ុន វារីអគ្គិសនី សេសានក្រោម២ ដាក់ឱ្យប្រើប្រាស់ តែការទិញអគ្គិសនី ពីប្រទេសឡាវនៅតែបន្ត។ ប្រជាពលរដ្ឋ ដែលជាអតិថិជនរបស់អគ្គសនី ស្ទឹងត្រែងមួយចំនួន មានការថ្នាំងថ្នាក់ ដោយសារតម្លៃ ភ្លើងចុះតិចតួចពេកត្រឹមតែ៣០រៀល ធ្វើឱ្យការចំណាយលើថ្លៃភ្លើងនៅតែខ្ពស់ដដែល ដោយពួកគាត់ចង់ឱ្យតម្លៃភ្លើងចុះលើសពី៣០រៀលក្នុង១គីឡូវ៉ាត់៕
ចែករំលែកព័តមាននេះ