អតីតគ្រូបង្វឹកក្លិបមេឃខៀវ Man City លោក Manuel Pellegrini កំពុងពិចារណាពីអនាគតរបស់ខ្លួនថាអាចនឹងចូលនិវត្តន៍ ប្រសិនបើមិនមានក្លិបណាមួយផ្តល់ឱកាសសមប្រកបដល់រូបលោកទេនោះ ។
គ្រូបង្វឹកវ័យ៦២ឆ្នាំរូបនេះ បានដឹកនាំក្លិប Man City គ្រងជើងឯកប្រឺមីញេលីក២០១៣-២០១៤ មួយលើក និងជាម្ចាស់ពាន League Cup ពីរលើកក្នុងរដូវកាល២០១៣-២០១៤ និង២០១៥-២០១៦ ។ រីឯក្នុងក្របខ័ណ្ឌ Champion League រដូវកាលនេះ Pellegrini ក៏បានជួយឱ្យ Man City ឈានដល់វគ្គពាក់កណ្តាលផ្តាច់ព្រ័ត្រផងដែរ ។
Pellegrini បានប្រាប់សារព័ត៌មាន The Guardian ថា៖ «ប្រសិនបើមិនមានជម្រើស ណាមួយគួរឱ្យចាប់អារម្មណ៍ទេនោះ ខ្ញុំនឹងឈប់ធ្វើជាគ្រូបង្វឹកមួយរយៈ រហូតទាល់តែខ្ញុំរកបាន។ ម្យ៉ាងទៀត ប្រសិនបើខ្ញុំលាលែងពីអាជីពនេះ គឺខ្ញុំអាចនឹងឈប់ត្រឹមរយៈពេលមួយឆ្នាំ ឬមួយជីវិតក៏ថាបាន» ។
គួររំលឹកថា គ្រូបង្វឹកសញ្ជាតិស៊ីលីPellegrini បានប្រកាសចាកចេញពីក្លិប Man City អំឡុងពេលធ្វើសន្និសីទសារព័ត៌មានមួយនៅក្នុងខែកុម្ភៈ ២០១៦ ហើយភ្លាមៗនោះក្លិប Man City ក៏បានចុះកិច្ចសន្យាថ្មីជាមួយគ្រូបង្វឹកមកពីក្លិប Barcelona លោក Guardiola ។
គេសង្កេតឃើញថា បច្ចុប្បន្នមិនទាន់មានក្លិបណាមួយចាប់អារម្មណ៍គ្រូបង្វឹកវ័យ៦២ឆ្នាំនេះទេ ៕
ចែករំលែកព័តមាននេះ