រាជធានីភ្នំពេញ ៖ ការទប់ស្កាត់ការនាំចូលទំនិញក្លែងក្លាយជាការពង្រឹងផលិតកម្មនៅស្រុកឱ្យកើនឡើង ។ អ្នកវិនិយោគជាច្រើនបានទទួចឲ្យរដ្ឋាភិបាលកម្ពុជាទប់ស្កាត់បញ្ហានេះ ។ លោក ចាន់ដាណា ហ្វឺណាន់ដូ នាយកប្រចាំប្រទេសកម្ពុជានៃក្រុម Nestle បានស្នើសុំទៅលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជួយទប់ស្កាត់ទំនិញក្លែងក្លាយមកកម្ពុជាកាលពីពេលថ្មីៗនេះ ។ ក្រុមហ៊ុន របស់ថៃ ដែលបានមកបណ្តាក់ទុនជាង ២៥ ឆ្នាំ នៅកម្ពុជាមួយនេះ បានកំពុងពិនិត្យលទ្ធភាពបង្កើតរោងចក្រផលិតទំនិញរបស់ខ្លួននៅប្រទេសកម្ពុជា ជំនួសឱ្យការនាំចូលពីបរទេស ។
លោក ប៉ាន សូរស័ក្តិ បានស្វាគមន៍ចំពោះការមកបណ្តាក់ទុនរបស់ក្រុមហ៊ុននៅប្រទេសកម្ពុជា និងបានបញ្ជាក់ថា ប្រទេសកម្ពុជាមានស្ថិរភាពនយោបាយ និងសេដ្ឋកិច្ច រួមទាំងអត្រាប្ដូរប្រាក់ ទទួលបានកំណើនជាមធ្យមក្នុងរង្វង់ ៧.៥% ។ លោករដ្ឋមន្ត្រីថាកម្ពុជាបានកសាងហេដ្ឋារចនាសម្ព័ន្ធសង្គម និងច្បាប់នៅក្នុងការលើកទឹកចិត្តដល់ការវិនិយោគ ។ ផ្លូវល្បឿនលឿនភ្នំពេញ-ព្រះសីហនុ នឹងដាក់ឲ្យប្រើប្រាស់ នាចុងឆ្នាំ ២០២២ ស្របពេលដែលខេត្តព្រះសីហនុបានជ្រើសរើស ជាតំបន់សេដ្ឋកិច្ចគំរូពហុបំណង ដែលជាចំណុចមួយសម្រាប់កម្ពុជាសម្រេចបាននូវចក្ខុវិស័យរបស់កម្ពុជា ក្លាយទៅជាប្រទេសអភិវឌ្ឍន៍កម្រិតមធ្យម ក្នុងឆ្នាំ ២០៣០ និងប្រទេសចំណូលខ្ពស់ក្នុងឆ្នាំ ២០៥០ ។
ក្រៅពីមានច្បាប់ថ្មីៗបានដាក់ឲ្យប្រើប្រាស់ហើយនោះ សេចក្តីព្រាងច្បាប់ស្តីពីសុវត្ថិភាពម្ហូបអារហារ ស្នើសុំការអនុម័តពីសភាជាតិនាពាក់កណ្តាលឆ្នាំក្រោយ ។ ក្រៅពីនេះ កម្ពុជាបានចូលរួមចរចាពាណិជ្ជកម្មសេរីក្នុងតំបន់ និងទ្វេភាគី នាពេលថ្មីៗនេះ រួមមាន អាសិប ពាណិជ្ជកម្មសេរីកម្ពុជា-ចិន កម្ពុជា-កូរ៉េ ដើម្បីបើកទីផ្សារនាំចេញទំនិញរបស់កម្ពុជា ហើយទំនិញកម្ពុជាអាចប្រកួតប្រជែងទាំងតម្លៃ និងគុណភាព ផងដែរ ។
ការទប់ស្កាត់ទំនិញក្លែងក្លាយនាំចូលពីក្រៅប្រទេសនេះបានលើកឡើងនៅក្នុងជំនួបរវាងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងលោក គុណ ញឹម អគ្គនាយក ដ្ឋានគយ និងរដ្ឋាករកម្ពុជា កាលពីចុងខែធ្នូកន្លងមកនេះដែរ ។ នៅក្នុងជំនួបនេះមានបញ្ហាចំនួន ១២ ចំណុចដែលសភាពាណិជ្ជកម្មបានលើឡើងរួមទាំងសំណើទប់ស្កាត់ទំនិញក្លែងក្លាយនេះមួយដែរ ។
លោកឧកញ៉ា លឹម ហេង អនុប្រធានសភាពាណីជ្ជកម្មកម្ពុជា ត្រូវបានស្រង់សម្តីថា ការទប់ស្កាត់ទំនិញក្លែងក្លាយរួមទាំងវត្ថុធាតុដើមផងនោះនឹងធ្វើឲ្យចង្វាក់ផលិតកម្មស្រុកកើនឡើងសម្រាប់ផ្គត់ផ្គង់ទីផ្សារ ក៍ដូចជាលើកកម្ពស់ទីផ្សារកសិកផលរបស់កសិករ ។ អនុប្រធានសភាពាណីជ្ជកម្មកម្ពុជា ថាកម្ពុជាបានចំណាយថវិកាពី ៣០០ ទៅ ៥០០ លានដុល្លារនៅក្នុងការនាំចូលបន្លែត្រីសាច់ពីបរទេស ។ ការទប់ស្កាត់ការនាំចូលខុសច្បាប់បាននឹងធ្វើចំណូលពន្ធកើនឡើង ហើយកសិផលមានទីផ្សារកាន់តែធំ ៕
ចែករំលែកព័តមាននេះ