ប្រទេសថៃ ៖ សេដ្ឋកិច្ចថៃនៅតែខ្លាំង និងអាចទប់ទល់ជាមួយការជះឥទ្ធិពលពីការបន្តអូសបន្លាយដែលរងនូវភាពរង្គោះរង្គើដោយសារហិរញ្ញវត្ថុសកល និងទីផ្សារមូលធន ខណៈដែលបំណុលបរទេសរបស់ថៃនៅមានកម្រិតនៅឡើយ។ នេះបើយោងតាមធនាគារថៃ បានឲ្យដឹងកាលពីពេលកន្លងមក ។
ទេសាភិបាល លោក Veerathai Santiprabhob បានមានប្រសាសន៍ថា ៖ « សម្រាប់ម៉ាក្រូសេដ្ឋកិច្ចថៃ ពួកយើងមិនចាំបាច់ព្រួយបារម្ភឡើយ ។ ប្រទេសជាច្រើនបានរងនូវផលប៉ះពាល់យ៉ាងខ្លាំង ដោយសារហិរញ្ញវត្ថុសកល និងទីផ្សារមូលធនជាងប្រទេសថៃទៅទៀត ខណៈដែលពួកគេបានពឹងផ្អែកលើកម្ចីពីបរទេស » ។
បំណុលបរទេសរបស់ថៃមានចំនួន១២៩ប៊ីលានដុល្លារ ឬស្មើនឹង៣២%នៃផលិតផលក្នុងស្រុកសរុបនៅត្រីមាសចុងក្រោយកាលពីឆ្នាំមុន ។ នេះបើយោងតាមទិន្នន័យរបស់ធនាគារកណ្តាលថៃ ។
ចំណែកបំណុលបរទេសរយៈពេលខ្លីស្មើនឹង៥១,៣ប៊ីលានដុល្លារ និងបំណុលបរទេសរយៈពេលវែងស្មើនឹង៧៨,១ប៊ីលានដុល្លារ ។
លោក Veerathai Santiprabhob មានប្រសាសន៍បន្តថា ៖ « បំណុលថៃមិនខ្ពស់ឡើយ បើធៀបនឹងប្រទេសដទៃទៀត ខណៈដែលសាច់ប្រាក់នៅតែស្ថិតក្នុងភាពរឹងមាំ ។ វាគ្មានអ្វីត្រូវព្រួយបារម្ភនោះទេ ដែលថៃនឹងអាចជួបបញ្ហាសាច់ប្រាក់លើលំហូរមូលធន ។ ធនាគារថៃនឹងគ្រប់គ្រងបញ្ហានេះកាន់តែខ្លាំងឡើងថែមទៀត ដើម្បីធានាបាននូវសាច់ប្រាក់គ្រប់គ្រាន់នៅក្នុងប្រព័ន្ធហិរញ្ញវត្ថុ ព្រមទាំងសម្រួលដល់ការរើបឡើងវិញនៃសេដ្ឋកិច្ចជាតិផងដែរ » ។
លោកបន្ថែមថា ៖ « ការធ្លាក់ចុះនៃការនាំចេញកាលពីខែមេសា គឺគ្មានអ្វីគួរឲ្យភ្ញាក់ផ្អើលទេ ខណៈដែលទស្សនវិស័យនៃការនាំចេញនៅតែមានការប្រកួតប្រជែងនៅឡើយ ។ កត្តាដែលធ្វើឲ្យប៉ះពាល់ដល់ការនាំចេញរួមមាន តម្លៃប្រេង តម្រូវការមាស ការកែប្រែរចនាសម្ព័ន្ធឧស្សាហកម្មរថយន្ត និងការបញ្ជាទិញផលិតផល មុនពេលការផលិតត្រូវបានផ្អាកក្នុងរយៈពេលខ្លី » ។
ធនាគារកណ្តាលបានព្យាករថា ការនាំចេញនៅឆ្នាំនេះនឹងបន្តក្នុងអត្រា២% ដោយសារផ្អែកលើកំណើនផលិតផលក្នុងស្រុកសរុបមានកំណើន៣,១% ។
ក្រសួងពាណិជ្ជកម្មបានរាយការណ៍ថា ការនាំចេញបានធ្លាក់ចុះ៨% ពីមួយឆ្នាំទៅមួយឆ្នាំនៅខែមេសា ដែលមានទឹកប្រាក់ចំនួន១៥,៥ប៊ីលានដុល្លារ ចំណែកការនាំចូលបានធ្លាក់ចុះ១៤,៩% ស្មើនឹង១៤,៨ប៊ីលានដុល្លារ ។
« ដោយឡែក វិធានការទម្លាក់ប្រាក់យន់ របស់ធនាគារកណ្តាលចិន គឺមិនបានជះឥទ្ធិពលដល់រូបិយប័ណ្ណក្នុងតំបន់ឡើយ ។ ចលនារូបិយប័ណ្ណនេះត្រូវបានជះឥទ្ធិពលយ៉ាងខ្លាំង ដោយសារការកើនឡើងនៃអត្រារំពឹងទុករបស់ធនាគារកណ្តាល » ។ នេះបើតាមប្រសាសន៍របស់អ្នកស្រី Chantavarn Sucharitakul ជំនួយការផ្នែកធនាគារថៃ ដែលត្រួតពិនិត្យលើប្រតិបត្តិការទីផ្សារហិរញ្ញវត្ថុ ។
អ្នកស្រីបន្តថា ៖ « វិធានការនេះ គឺមានទំនាក់ទំនងស្របនឹងនិន្នាការរូបិយប័ណ្ណក្នុងតំបន់ និងចលនាប្រាក់យន់លើការពង្រឹងប្រាក់ដុល្លារ ដែលបានជះឥទ្ធិពលលើការរំពឹងទុករបស់វិនិយោគិន នៃការកើនឡើងអត្រាមួយជាក់លាក់ដោយធនាគារកណ្តាល » ។
អ្នកស្រីបន្ថែមថា ៖ « ការធ្លាក់ចុះខ្សោយនៃប្រាក់យន់នាពេលថ្មីៗនេះ ដោយសារតែរូបិយប័ណ្ណមិនបានកត់ត្រាពីការធ្លាក់ចុះជាបន្តបន្ទាប់ បើធៀបនឹងរូបិយប័ណ្ណរបស់ប្រទេសផ្សេងទៀត ខណៈដែលអាជ្ញាធរចិនបានរក្សានូវស្ថិរភាពទីផ្សារដើម្បីទប់ស្កាត់នូវការរងឥទ្ធិពល » ៕
ចែករំលែកព័តមាននេះ