រាជធានីភ្នំពេញ ៖ វេលាម៉ោង៩ព្រឹកថ្ងៃទី២៨ មីនា ២០១១ ដូចការគ្រោងទុក ដំណើរការសវនាការលើបណ្តឹងសាទុក្ខក្នុងសំណុំរឿងក្តី០០១ របស់កាំង ហ្គេចអា៊វ ហៅឌុច អតីតមេគុកទួលស្លែង នៅតុលាការកំពូលបានចាប់ផ្តើមដោយមានការចូលរួមតែសហមេធាវី និងចៅក្រមប៉ុណ្ណោះ ហើយសវនាការនេះចាប់ផ្តើមពីថ្ងៃទី២៨ ដល់ថ្ងៃទី៣១ មីនា ២០១១ ។
ក្នុងបន្ទប់សវនាការមានជនជាប់ចោទកាំង ហ្គេចអ៊ាវ ហៅឌុច អតីតមេគុកទួលស្លែង ដែលជាដើមបណ្តឹងសាទុក្ខ សហមេធាវីទាំង២រូប សហព្រះរាជអាជ្ញា រួមទាំងសហចៅក្រមជំនុំជម្រះតុលាការកំពូលដែលមានសមាសភាព៧រូប និងចៅក្រមបម្រុង២រូប ។ ឌុចបាននិយាយថា គាត់នៅតែបន្តដាក់បណ្តឹងសាទុក្ខនេះដដែល ហើយបានផ្តល់សិទ្ធិទៅឱ្យសហមេធាវីរបស់គាត់ ។ មេធាវីរបស់ឌុច លោកការ សាវុធ បានថ្លែងថា សាលាក្តីនេះកាត់ទោសទៅលើតែមេដឹកនាំជាន់ខ្ពស់បំផុត និងអ្នកទទួលខុសត្រូវខ្ពស់បំផុតប៉ុណ្ណោះ ។
លោកកាំង ហ្គេចអ៊ាវ ហៅ ឌុច ត្រូវបានចោទប្រកាន់ពីបទឧក្រិដ្ឋប្រឆាំងមនុស្សជាតិដែលបានប្រព្រឹត្តនៅមន្ទីរ ស-២១ ហៅគុកទួលស្លែង និងទីតាំងផ្សេងទៀត ដែលជាប់ពាក់ព័ន្ធក្នុងអំឡុងរបបកម្ពុជាប្រជាធិបតេយ្យខ្មែរក្រហម។ ឌុច ត្រូវបានអង្គជំនុំជម្រះសាលាដំបូងផ្តន្ទាទោស ដាក់ពន្ធនាគាររយៈពេល៣៥ឆ្នាំកាត់កងនៅសល់១៩ឆ្នាំ។
យោងតាមមន្ត្រីសាលាក្តីឱ្យដឹងថា មេធាវីការពារ ក្តី សហព្រះរាជអាជ្ញា និងដើមបណ្តឹងសាទុក្ខ (ឌុច)បានដាក់ប្តឹងសាទុក្ខប្រឆាំងនឹងសាលក្រមរបស់អង្គជំនុំជម្រះសាលាដំបូង ដែលកាត់ឌុច ឱ្យជាប់ទោស៣៥ឆ្នាំ។ សវនាការនៅថ្ងៃទី២៨ មីនា ដល់ថ្ងៃទី៣១ មីនា ២០១១ មិនមានសាក្សី ឬស្ថាប័នជំនាញពាក់ព័ន្ធចូលរួមទេ ហើយក៏មិនជជែកពីអង្គហេតុនៃការធ្វើទារុណកម្មសម្លាប់មនុស្សនៅគុកទួលស្លែងដែរ។ សវនាការនៅអង្គជំនុំជម្រះតុលាការកំពូលលើកនេះនិយាយអំពីថាតើឌុច ជាអ្នកទទួលខុសត្រូវខ្ពស់បំផុតក្នុងរបបខ្មែរក្រហម ឬយ៉ាងណា? ហើយការផ្តន្ទាដល់ទោសឌុច រយៈពេល៣៥ឆ្នាំនោះ ជាការសមស្របដែរឬទេ?
ចែករំលែកព័តមាននេះ