ខេត្ដព្រះសីហនុ ៖ ថ្វីបើមានដាក់កម្លាំងត្រួតពិនិត្យ និងរឹតបន្តឹងច្បាប់ចរាចរណ៍ផ្លូវគោកនៅក្នុងខេត្តយ៉ាងណា ក៏ចំនួនគ្រោះថ្នាក់ចរាចរណ៍ នៅភូមិសាស្ត្រខេត្តព្រះសីហនុ ហាក់ពុំមានការថមថយនៅឡើយ ។ នេះបើយោងតាមការបញ្ជាក់ពីលោកវរសេនីយ៍ឯក អុី សុខា ស្នងការរងទទួលផែនសណ្តាប់ធ្នាប់នៃស្នងការដ្ឋានគរបាលខេត្ត ។
លោកវរសេនីយ៍ឯក អុី សុខា បានថ្លែងបែបនេះ នៅក្នុងវគ្គបណ្តុះបណ្តាលស្តីពីហានិភ័យនៃការបើកបរក្រោមឥទ្ធិពលនៃគ្រឿងស្រវឹង ត្រូវបានរៀបចំឡើងនៅស្នងការដ្ឋាននគរបាលខេត្ត រយៈពេល២ថ្ងៃគឺថ្ងៃ៣០និង៣១ ឧសភា ដល់មន្ត្រីនគរបាលចរាចរណ៍ក្នុងខេត្តចំនួន៥០រូប ។
លោកបានលើកឡើងថា ដោយឡែកចំពោះករណីបើកបរក្រោមឥទ្ធិពលនៃគ្រឿងស្រវឹង ក្នុងរយះពេលដើមឆ្នាំ២០១៦នេះ អង្គភាពនគរបាលចរាចរណ៍ខេត្តបានរកឃើញជនល្មើសជាអ្នកបើកបរមានជាតិអាល់កុលលើសពីច្បាប់កំណត់មានចំនួន១៤៥នាក់ (អ្នកបើកបររថយន្តចំនួន៩៣នាក់ ម៉ូតូ៥២នាក់) ក្នុងនោះបានធ្វើការផាកពិន័យមួយចំនួន និងបានកសាងសំណុំរឿងបញ្ជូនទៅសាលាដំបូង៥ករណី ។
ដោយឡែកចំពោះគោលបំណងចម្បងនៃវគ្គបណ្តុះបណ្តាលនេះមាន៖
១-ផ្តល់ចំណេះដឹងបន្ថែមទៅលើការត្រួតពិនិត្យជាតិស្រវឹងចំពោះអ្នកបើកបរ
២-បង្កើនជំនាញវិជ្ជាជីវៈក្នុងការប្រើប្រាស់ឧបករណ៍វាស់ស្ទង់ជាតិអាល់កុលក្នុងខ្យល់ដង្ហើម សម្រាប់រឹតបន្តឹងលើបទល្មើស បើកបរក្រោមឥទ្ធិពលជាតិស្រវឹង
៣-ភ្នាក់ងារនគរបាលចរាចរណ៍ មានសមត្ថភាពក្នុងការបង្កើនផែនការរឹតបន្តឹងច្បាប់ប្រកបដោយប្រសិទ្ធភាព និងមានសូចនាករវាស់វែងជាក់លាក់
៤-ភ្នាក់ងារនគរបាលចរាចរណ៍ មានសមត្ថភាពពន្យល់ពីឥទ្ធិពល និងផលវិបាកនៃការប្រើគ្រឿងស្រវឹងដល់អ្នកធ្វើដំណើរ និងជនល្មើសនៅតាមគោលដៅរឹតបន្តឹងច្បាប់ និងណែនាំអ្នកប្រើប្រាស់ផ្លូវឱ្យមានការផ្លាស់ប្តូរឥរិយាបថ ជាពិសេសបណ្តុះវប្បធម៌មិនបើកបរក្រោមឥទ្ធិពលនៃគ្រឿងស្រវឹងចាប់ពីពេលនេះតទៅ ។
មានប្រសាសន៍ក្នុងពិធីបើកវគ្គនោះដែរលោកឧត្តមសេនីយ៍ទោ ទី ឡុង បានបង្ហាញពីកិច្ចខិតខំប្រឹងប្រែងរបស់នាយកដ្ឋាននគរបាលចរាចរណ៍ និងសណ្តាប់ធ្នាប់សារធារណៈ អគ្គស្នងការនគរបាលជាតិ ជានិច្ចកាលបានខិតខំពង្រឹង ថែរក្សាសន្តិសុខសណ្តាប់ធ្នាប់ ជាពិសេស ក្នុងការកាត់បន្ថយចំនួនគ្រោះថ្នាក់ចារចរណ៍ដល់អាយុជីវិត និងរងរបួសដែលបានក្លាយជាបន្ទុកដ៏ធំធេងចំពោះគ្រួសារ និងសង្គមជាតិ ។
សូមបញ្ជាក់ផងដែរ យោងតាមរបាយការណ៍បឋមនៃប្រព័ន្ធព័ត៌មាន ជនរងគ្រោះដោយគ្រោះថ្នាក់ចរាចរណ៍ផ្លូវគោកក្នុងឆ្នាំ២០១៥កន្លងមក មានអ្នកស្លាប់ចំនួន២.២៣១នាក់ និងរងរបួសធ្ងន់ចំនួន៥៤៥០នាក់ ។ គ្រោះថ្នាក់បណ្តាលមកពីការបើកបរក្រោមឥទ្ធិពលជាតិស្រវឹង នៅតែជាមូលហេតុនាំមុខទី២ក្នុងអត្រាអ្នកស្លាប់ប្រមាណ១៧% ពោលគឺមានមនុស្សស្លាប់ចំនួន៣៨៧នាក់ ។ ក្នុងរយៈពេល៥ឆ្នាំចុងក្រោយនេះអត្រាស្លាប់ក្នុងគ្រោះថ្នាក់ចរាចរណ៍ ដោយសារបើកបរក្រោមឥទ្ធិពលនៃជាតិស្រវឹងបានកើតឡើងគួរឱ្យគាត់សម្គាល់គឺរហូតដល់៤២% ស្ថិតក្នុងលំដាប់ទី២បន្ទាប់ពីបើលឿន ៕
ចែករំលែកព័តមាននេះ