ថ្ងៃក្រោយឲ្យរាង ! កុំចេះតែហ៊ានលក់ឲ្យសោះ
ខេត្តសៀមរាប ៖ ភោជនីយដ្ឋានចិន យីហោ អ៊ិល អ៊ិល អ៊ីន អាយ ស៊ីហ្វូត ដែលមានទីតាំងនៅតាមបណ្តោយផ្លូវជាតិលេខ៦ ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប
ខេត្តសៀមរាប ៖ ភោជនីយដ្ឋានចិន យីហោ អ៊ិល អ៊ិល អ៊ីន អាយ ស៊ីហ្វូត ដែលមានទីតាំងនៅតាមបណ្តោយផ្លូវជាតិលេខ៦ ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ត្រូវបានសមត្ថកិច្ចចម្រុះចុះទៅបង្ក្រាបកាលពីវេលាម៉ោង៤ និង៣០នាទីល្ងាច ថ្ងៃទី២៩ ខែឧសភា ឆ្នាំ២០១៦ ព្រមទាំងឆែកឆេររកឃើញសត្វព្រៃមួយចំនួនផងដែរ ។
តាមប្រភពពីមន្ត្រីផ្នែករដ្ឋបាលព្រៃឈើបន្ទាយស្រីបានប្រាប់«កោះសន្តិភាព»ឱ្យដឹងថា ដោយមានការតាមដានពីមន្ត្រីជំនាញយ៉ាងល្អិតល្អន់ ទើបកម្លាំងរបស់រដ្ឋបាលព្រៃឈើបន្ទាយស្រី សហការជាមួយសង្កាត់រដ្ឋបាលព្រៃឈើប្រាសាទបាគង ដឹកនាំកម្លាំងដោយលោក ហេង សំណាង ព្រះរាជអាជ្ញារងអមសាលាដំបូងខេត្តសៀមរាប ចុះទៅដល់ទីតាំងភោជនីយដ្ឋានរបស់ជនជាតិចិននោះតែម្តង ។ បន្ទាប់ពីធ្វើការត្រួតពិនិត្យទីតាំងភោជនីយដ្ឋានរបស់ចិន ដែលមានយីហោ អ៊ិល អ៊ិល អ៊ីន អាយ ស៊ីហ្វូត កម្លាំងជំនាញបានរកឃើញនូវភស្តុតាងដូចជា អណ្តើកចំនួន៧ក្បាល ស្មើ៨គីឡូក្រាម និងពស់ព្រៃ ចំនួន២ក្បាល ស្មើ៤គីឡូក្រាម រួចនាំយកមកធ្វើការផាកពិន័យទៅតាមច្បាប់រដ្ឋបាលព្រៃឈើ ។
ប្រភពបានបញ្ជាក់ថា ក្រោយពីធ្វើការឆែកឆេរ និងដកហូតបានវត្ថុតាងរួចមក សមត្ថកិច្ចក៏បាននាំខ្លួនតំណាងម្ចាស់ហាងចិន យីហោ អ៊ិល អ៊ិល អ៊ីន អាយ ស៊ីហ្វូត មានឈ្មោះ ហួន ហត់ ភេទប្រុស អាយុជាង២០ឆ្នាំ មុខរបរអ្នកគ្រប់គ្រងទូទៅ ស្នាក់នៅភូមិ-សង្កាត់ខាងលើ ដើម្បីទៅធ្វើការសាកសួរផងដែរ ។
គួរបញ្ជាក់ផងដែរថា ក្រោយពីធ្វើការដកហូតបានវត្ថុតាងខាងលើ មន្ត្រីផ្នែករដ្ឋបាលព្រៃឈើបន្ទាយស្រីបានដឹកយកសត្វទាំង២មុខនោះទៅប្រគល់ឱ្យខាងអង្កកាអាល្លឺម៉ង់សង្គ្រោះសត្វ (ACCB) នៅក្បាលស្ពាន ស្រុកបន្ទាយស្រី ខេត្តសៀមរាប នៅព្រឹកថ្ងៃទី៣០ ខែឧសភា ឆ្នាំ២០១៦ ដើម្បីធ្វើការព្រលែងនៅទីនោះ ៕
ចែករំលែកព័តមាននេះ