ខេត្តឧត្តរមានជ័យ ៖ នៅក្នុងស្រុកត្រពាំងប្រាសាទ គេបានសង្កេតឃើញកើតមានឡដុតធ្យូងជាច្រើនកន្លែងដុះរីករាលដាលពាសពេញស្រុកតែម្តង ដែលកំពុងតែមានសកម្មភាពដឹកជញ្ជូនឈើចូលដាក់ក្នុងឡដុតធ្វើធ្យូង រួចយកទៅលក់ឱ្យក្រុមឈ្មួញ។ ហេតុការណ៍នេះ បានកើតឡើងនៅភូមិអូរសោម ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ គិតត្រឹមថ្ងៃទី១៦ ខែធ្នូ ឆ្នាំ២០២១នេះ។
បើតាមប្រជាពលរដ្ឋក្នុងស្រុក បាននិយាយរៀបរាប់ឱ្យដឹងថា ជារៀងរាល់យប់ថ្ងៃ គេបានសង្កេតឃើញគោយន្តកន្ត្រៃមានសកម្មភាពដឹកជញ្ជូនឈើថ្មីៗ ទើបតែកាត់ដែលមានមុខចាប់ពី១តឹកទៅ២តឹក កាត់ជាកង់ៗចូលទៅកន្លែងឡធ្យូងសម្រាប់ដុតធ្វើធ្យូងជាច្រើនកន្លែង ដោយមិនមានតែក្នុងភូមិអូរសោមនោះទេ បើនិយាយរួមគឺពាសពេញក្នុងស្រុកតែម្តងយ៉ាងគគ្រឹកគគ្រេង ដោយមិនដែលឃើញមានមន្ត្រីជំនាញ ឬស្ថាបន័ពាក់ព័ន្ធមួយណាធ្វើការបង្ក្រាបនោះទេ ហើយខណៈពេលនេះ គេបានសនិដ្ឋានថា អាចមានការត្រូវរ៉ូវគ្នាក៏អាចថាបានដែរ។
ប្រជាពលរដ្ឋបានបញ្ជាក់ទៀតថា សព្វថ្ងៃនេះ គេបានឃើញក្រុមឈ្មួញដើររកទិញធ្យូងជាច្រើននាក់ ដោយឱ្យតម្លៃ១ការុង១ម៉ឺនរៀល រួចដឹកជញ្ជូនចូលទៅលក់ក្នុងប្រទេសថៃ ខ្លះទៀតដឹកជញ្ជូនទៅលក់ឯប្រទេសវៀតណាមផងដែរ។
ទាក់ទិនហេតុការណ៍ខាងលើនេះ នៅព្រឹកថ្ងៃទី១៦ ខែធ្នូ ឆ្នាំ២០២១ កោះសន្តិភាពបានទូរស័ព្ទជួបលោក ជៀល សុផល នាយសង្កាត់រដ្ឋបាលព្រៃឈើ ស្រុកត្រពាំងប្រាសាទ ហើយលោកក៏បាននិយាយបំភ្លឺយ៉ាងខ្លីថា ឈើទាំងនេះ គេបានដឹកចេញពីក្នុងដែនជម្រកសត្វព្រៃ ហើយលោកកំពុងជាប់ប្រជុំ។
គួររំលឹកផងដែរថា នៅក្នុងស្រុកត្រពាំងប្រាសាទ គេបានសង្កេតឃើញក្នុងការកា.ប់បំផ្លិចបំផ្លាញព្រៃឈើដែលនៅសេសសល់បន្តិចបន្តួច ហើយត្រូវបានគេកា.ប់រួចយកមកដុតធ្វើធ្យូង និងខ្លះទៀតកា.ប់យកមកពុះជ្រៀកដឹកចូលរោងសិប្បកម្មកែច្នៃជាគ្រឿងសង្ហារឹម បន្ទាប់ក៏ដឹកជញ្ជូនទៅលក់នៅតាមបណ្តាខេត្តនានាក្នុងប្រទេសយ៉ាងគគ្រឹកគគ្រេងជារៀងរាល់យប់។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ